DISTRICT
Inthlan a hnai a, district hran ngiat ho thawm a ring leh ta hle mai. District hrang neih leh district hmunpui (headquarters) nih an awmzia leh phuzia lah chu an sawi thiam em em hlawm a. District hrang din a pawimawhzia an sawi thiam em em bawk. Chutah chuan tuna an awmna district hmunpui hlat dan te, a mihring tam dante leh thil dang tam tak an sawi a. An han sawi tak tak chuan awihawm tak a ni.
Tuna district hran ngiattu-te hi kum 2008 inthlan hma lawka khatihlaia MNF sorkarin district-a a puan ve ngawt te bakah Darlawn lam an ni a. Khami tuma Cabinet thukhawmin district 3 siam tur an puang ngawt kha ka la hre chiang ve viau-in ka hria. Sorkar inrelbawlna kawnga inawpna (administrative convenience) lam ngaihtuahna a awm miah lova, district ramri tur pawh tihfel a awm hek lova, politics a hlawkna tel tum avanga khatianga district thar pathum puang ta ngawt kha an ni a. Kum 1998 inthlan hma lawka khatihlaia Congress sorkarin district thar 5 a puang ngawt nen khan a danglam chuanglo.
A danglamna ber chu MNF sorkar khan Congress sorkarin district thar 5 a puan kha sum awm ang angin muang changin a tipuitling chhova, Congress erawh chuan MNF-in district 3 a puante kha tun thlengin a takin a la tipuitling lo thung hi a ni. Congress sorkarin kum 1998 a hnawhchih taka politics-a hamthatna neih theih beisei a district thar 5 an puang leh kum 2008-a chawpchilh tak leh inthlan hma lawka district thar 3 an puang ngawt bawk kha a inang hle a, zawlbuka e-tang ve ve tih loh rual a ni lova, mahse an puan chhan berah erawh an hlawhchham eve ve.
Kum 1998 assembly inthlan hma a Congress sorkarin Aizawl district ni thina district dang 4 a pian tira, Chhimtuipui district ni thina Saiha leh Lawngtlai district a pian tir khan an tum angin politics-ah hlawkna an hmu lemlo a niang, chiang takin an tla a, assembly inthlanpui-ah MLA 6 chiah an nei a, kum 10 lai a zawna Chief Minister nihna lo chelh, an party president Pu Lal Thanhawla pawh a tlin reng thinna bial leh district thara a puan Serchhip aṭangin a tla a. Mizoram hmar chan lamah phei chuan MLA pakhat chauh an nei. Chutiang bawkin kum 2008 inthlanpui-ah khan sorkar lai MNF chu an tla chiang hle a, MLA 3 chiah an tling a, an thawhpui MDF 1 a tling ve a. Chief Minister Pu Zoramthanga pawh chiang takin a tla bawk. Politics a hlawkna tur ngawr ngawr ngaihtuahna avanga district thar siam leh rikngawt thin hi mipui-in an vote phah lem lo tih a chiang hle.
Inawp dan leh inrelbawlna tha leh awlsam zawk ngaihtuah vang ni hauh lova district thar siam thin hian mipui sum a ei hek em em mai a, chubakah Mizoram te ang mihring nuai 10 awrh awmna hi mi state a district pakhat pawh nasa taka zat lo kan lo nih ve nen a inhmeh lova, a lo thlawna sum senna mai mai a ni. State dang dinhmun lo en ila. India rama state lian leh mihring tamna ber Uttar Pradesh khu mihring vaibelchhe 20 thelh chenna a ni a, district 75 an nei. Mihring tamna ber district – Allahabad-ah chuan mihring 59,54,391 an cheng a. District 13 chu mihring nuai 40 chuang vek chenna a ni a, district 19 chu mihring nuai 30 chuang chenna a ni a, district 13 chu mihring nuai 20 chenna, 13 dang pawh nuai 10 chuang chenna leh a dang zawng pawh nuai 9 leh nuai 8 bawr vel chenna te a ni.
A dawttu Bihar-ah hian mihring vaibelchhe 10 leh nuai 38 chuang an awm a, district 38 a thendarh a ni. Mihring tamna ber district chu Patna niin mihring 58,38,465 an cheng a a dawttu Purbi Champaran-ah 50,99,371 an cheng a. Mihring tlemna ber district Sheikhpure ah chuan mihring 6,36,342 an cheng a ni. Mi state-ah chuan Mizoram pumpui mihring awm zat leh a ram pawh zau zawk hi PWD Executive Engineer te’n an bial a, West Bengal-a Police SDPO pakhat bial-ah chuan mihring nuai 13 chuang an awm a ni. District tam tak neih hi hmasawnna ni lovin a lo thlawna sum tam tak luan ralna mai zawk a ni.
Mizoram mipui tam tak hian ngaihdan diklo zet mai kan nei a, district hrang neih leh district khawpui neitu nihte hi kan chak em em mai a. Kan chapona rilru aṭanga lo chhuak a nih bakah awlsam deuh taka eizawnna kawng a inhawn theihna atan district hrang leh district khawpui hun hnai kha kan duh a ni ber hlawm. Kan ngaihtuah ngai loh chu mihring mamawh zualpui (basic amenities) kan neih chuan loh chuan district hran neih ngawt hian awmzia a neilo tih hi a ni. Tui duhkhawpa hman tur chu sawiloh in tur pawh nei mang lo, hmun dang tlawh pawhna kawngpui chhe em em, electric eng nei thalo ni chunga district hrang neih ai chuan khing thil 3 tal khi tha taka neiha BDO hnuaia awm pawh a thlanawm zawk daih tih lam hi kan ngaihtuah ngailoh lam a ni awm e.
Hetiang hi kan ni tih a chianna chu in chhungkhur lam ngaihthah leh ei tur tha pawh ei pha mang si lova incheina lam uar a, a man to ber bera inchei a, lirthei te, smart phone hlai pui pui neih kha ropui zawka hre tlat hi mi tam tak kan ni. Kan thil neih changkang leh tunlai ber ber, man to pui pui ngaihtuahin kan inchhung khur chu a tlabal hle si a, kan hmasawnna hi thawhchhuah tam lam ni lovin rual-awhna hrin mai mai a ni thin hian hmasawnna dik min thlir tir theilo fo thin a ni.
District hrang neih a pawimawh ber lo kan tihna chhan chu hmasawnna tak tak a thlen chuan lem loh vang a ni. Sawi tawh angin Mizoram mipui aia tam daih leh a ram pawh zau zawk district pakhata PWD EE-in kawngpui tha tak a siam theih laia, district 8 nei, Engineer-in-Chief hnuaia Chief Engineer leh Superintending Engineer rual, EE phei chu tam lutuk nei teuhin kawngpui tha kan neih chuan siloh hi chuan ho tak kan ni. Mizoram aia lian awrh ni mahsela Israel khu mihring nuai 86 chuang chenna a ni a, rambung (state) hrang hrang an nei lova, district 6 an nei thung. Jerusalem District-ah mihring nuai 10 an awm a, Northern District-ah nuai 13 chuang an awm a, Central District-ah phei chuan mihring nuai 20 chuang an awm. An district te ber Judea & Samaria district-ah pawh mihring nuai 4 chuang an awm a ni.
District emaw ram bial then hrim hrim hi inawpna atana a pawimawh chin a awm a, chu chu mipui hmasawnna thlira siam thin a ni a. Mahse, chu chu tuna kan kal dan a ni hauh lo. Congress sorkar hmasa-a district 5 siamte pawh Bawrhsap leh SP leh DTO bak chu kum 20 ral dawnah pawh department hrang hrang district office an la din hlei theilo chu a nih hi. Tuna district kan siam dan, rorellai party-in inthlan leh hun thlira an chak theih beisei-a an siam thar ang chi phei hi chu tih loh tawp tur, tul lova mipui sum senralna mai mai a ni. A tak ram thleng lo, a phaw vuaka mipui tihlawma an vote hui tumna liau liau a ni a, ram leh mipui tana thatna tluantling thlen hauhlo a ni.