Chelsea leh Costa boruak a sang zel

Diego Costa-a'n misual ang maia Chelsea-in an cheibawl thu a sawi hnu lawkah London club an ngawi mai mai bik lo a, Costa hi an hnena kir vat turin thu an pe niin khawthlang media-te chuan an tarlang. Spain international hi a pianna ram Brazil-ah chawlh hmangin a awm mek a, Daily Mail-in an kawmnaah Chelsea-in an enkawl dan chungchang hi a sawi chhuak.

Premier League champion chuan an player thusawi media-a hmuh tur a awm hnu lawkah Costa hi tihtur pali an tuk sak nghal; 1)Amah chhawrtu club hnenah a kir nghal tur a ni 2)Training nei turin a in report tur a ni 3)A in fit tur a ni 4)First team-in an mamawh hun apianga chhawr theih turin awm tur a ni, tihte a ni.

Hetihlai hian ESPN hnuaia Chelsea correspondent Liam Twomey chuan London club hian an player hi kar hnih chhung a hlawh chawi turin an ti niin a tarlang bawk a, Atletico Madrid lama kir a duh thu sawitu striker hi an club player a nih lai chuan an duhdan la puitlin turin an beisei.

Season hman zawh taka Premier League-a Chelsea an champion theih nana league match 35 khela goal 20 khungtu Costa hian Atletico-ah kir duh viau mah se Chelsea-in a man zat atana an chhiar zat chu Spanish club hian an phak lo hle niin report ṭhenkhat chuan an tarlang bawk.