2023 preview leh tunlai Mizoram politics
Kum 2023 ah mai kan inthlan tawh dawn avangin tunlai hian political party chuan an candidate tur an dap suau suau a. A ruka dap mai duh tawk lovin an inlen chilh ta huai huai tihte chu keini David Sailo ni miah lo pawh hian kan hre thei a, MNF meuh pawhin an MLA neih sa an sit nia ngaih theiha neutral lama mi hming ṭha an rim kual takah chuan titi khawchang angin i han puak dup dup mai teh ang.
Lunglei MLA kawngpui chhiat zia Assembly House a an pu ber sakei hlauha an hlauh awm lai a sawi ngam chu a bial mipuiten an lawm hle a, a sawi ngam ve lo Lunglei MNF MLA ngawi reng te sitna a na sauh bawk an ti.
Heng mite hi inthuruala RTPCR mamawh lo ang maia ngawi tlat tawh leh voter aia an pute hlauh zawk avanga mipuiin an aiawha au chhuak tura an mamawh laia Aizawla MNF hotu liante hlauh vanga Lunglei mipui ṭan ngam lotute kha an ni a, kum 2023 a huhurhawm ngei ang le.
MNF lamah Hachhek bial hi CM tana hauh leh tu emaw tlanchhiatna tura hual ru an awm tihte hi chu ka awih lem lo. Covid19 hripui len laia Health Department audit duhtute khan Health Minister inah Covid laia CM hming a lam tlem avanga titi puitu tur mi an tir tihte pawh titi a ni leh zel.
"ZPM hian an MLA neih sa bialah candidate tur an nei ru khiau" tih Whatsapp group pakhata nikum lama kan hriat tawh chu tun hnaia an mi chal langte che zia en hian a dik dawn a nih hmel.
Candidate thar hi an tlin pui dawn nge dawn lo chu nakumah kan hria ang a, ZPM OB hian seat an chang kim dawn nge dawn lo tih pawh kan hriat phak ni suh le. Val Upa Council tiha kan la hriat ngai loh sawitute hian inthlan dawn candidate set hun tak takah VUC an tih hi thu an neih tir ngam nge ngam lo kan lo en ang.
Congress hian candidate dap run pui neiin Congress pawh ni lo mi 10 vel Aizawla ding tur an phek zawn ve bawk a. Sorkar hnathawk lai mi pahnih pathum chu pension tur in an nawr an tih hi an hlawhtlin chuan an ṭhat pui thut ve thei bawk a. A ngai an din chuan beisei a sang lem lovang.
BJP hian bial 5 vel concentrate tawp leh MLA 3 tal neih ngei ngei thupui berah an nei an ti bawk.
- Sawmtea Zote