Juve leh Sarri champion hun?

Season dang chu ni se, Pathianni zan hian Allianz Stadium-ah mipui an pungkhawm ang a, Italian champion an nih lawm tumin Juventus fans an sapatal ang - kuminah erawh coronavirus vangin mipui an 

awm dawn lo.

Pathianni zan dar 1:15-ah Juve leh Sampdoria an inhmachhawn dawn, ni 3,000 chuang Italian football roreltu ni tawh Juve ropuina belhchhahin a awm dawn - a zawna league nomawi vawi kua chawi hi record theuneu lo tak a ni.

Old Lady coach Maurizio Sarri chuan, "Kan hma lam hun zawhna tam tak kan dawng, chhan theih ka nei rih lo. Tunah chuan Sampdoria chauh ka rilruah an awm, inkhel kan ngaihtuah tur a ni a, rilruah nomawi a lian zawk tur a ni lo," tiin a la ṭawng fimkhur hle.

Napoli a enkawl laiin Sarri-a'n nomawi chawi lo mah se inkhel hmuhnawm a chhawp chhuak a, a hnuah Chelsea chu Europa League nomawi a chawipui. Team lian Juventus hi a champion pui theih a nih chuan league title a lak hmasak ber tur a ni ang. 

Juventus hi Coppa Italia final-ah Napoli ngam loin an tlawm, Champions League last 16 first leg-ah Lyon chu 1-0 in an ngam lo bawk - UCL quarterfinal lut tur chuan Ligue 1 club an lehthal a ngai dawn; chumi hmain league nomawi humhim chu an hna pawimawh hmasa ber a ni.