Benfica mualah PSG an lut dawn

Champions League champion nih an duh a, chumi tur chuan sum pawh an hmang hnem - mahse awlsam taka champion ngawt theih a ni si lo. European champion nih châka tuihal Paris Saint-Germain chuan zanin dar 12:30 hian Benfica an lenchilh dawn.

Group H-ah PSG leh Benfica te hian match hnih aṭangin point ruk ve ve an hmu a, group hmahruaitu inchuhna a nih avangin inkhel pawimawh a ni. Group hmahruaitu nih loh chuan last 16-ah team ṭha hmachhawnna chance a sang a, group-a pakhatna nih hi a hlu hle.

Juventus chuan Maccabi Haifa an mikhual dawn thung. Old Lady hian point an la nei a, an player neih dan leh sulhnu thlir chuan last 16 lut tura rinkai an ni si, zanin hian point thum hlawhchhuah ngei a ṭul ang.

Hmatawng hlauhawm
Premeira Liga hmahruaitu Benfica tan PSG mikhual hi thil châkawm tak a ni dawn lo, a bik takin an tlarhnung tan hna a tam dawn. Defender tawnhriat ngah Nicolas Otamendi leh a ṭhian ten hna hautak an thawh a ngai dawn.

Lionel Messi hming a lian a, a chanchin sawi tam a ngai lo. Ani chauh pawh ven a huphurhawm tawh nak a laiin ball thiam bik Neymar leh tlan chak Kylian Mbappe an la nei tel, tu club tan mah hmachhawn châkawm lo tur an ni.

PSG coach Christophe Galtier-a'n UCL a ngai pawimawh, kar tawpa Ligue 1 an khelh ṭum pawhin Mbappe chu a tirah a hahchawlhtir. France international hi zaninah chuan a bul aṭangin a lut ang, goal khung chaka tuihal huam huam reng a ni tih hriat a fuh ang.

Verratti tel lohna
Tlarhma ringawt sawi theih a ni lo, anmahni chawmtu leh siamsaktu an awm a ngai. Chutiang hunah chuan Marco Verratti hi player pawimawh bik a ni ṭhin, zaninah erawh Italy international hi hliam vangin a khel thei dawn lo - Renato Sanches pawh a khel bawr a hliam.

Verratti a awm loh chuan Portuguese midfielder Vitinha chungah mawhphurhna a sang dawn, ani hi Spain international Fabian Ruiz nen an inkawp ang - a laiah ball pass thiam pahnih chhawr tur an la nei tho tihna a ni.

Malpui hliam Presnel Kimpembe a inlan thei dawn lo. France international defender hi awm lo mah se, tawnhriat nei ṭha Sergio Ramos leh Brazil tlarhnunga ding phak Marquinhos an nei tho a, buaina tur a awm lo ang. Ramos-a'n bul a ṭan tawhna inkhelah PSG hi an la tlawm ngai lo.

Zanin Inkhel Tur
Salzburg 10:15 PM Dinamo Zagreb
RB Leipzig 10:15 PM Celtic
Chelsea 12:30 AM AC Milan
Real Madrid 12:30 AM Shakhtar Donetsk
Manchester City 12:30 AM FC Copenhagen
Sevilla 12:30 AM Borussia Dortmund
Juventus 12:30 AM Maccabi Haifa
Benfica 12:30 AM Paris Saint-Germain