KHAWTHLIR

Aizawl DC R Lalram-nghaka chuan thupek chhuahin, Covid-19 laka mipui an him zawk theihna atan Aizawl khawpui huam chhung­ah phalna nei loin van­tlang hmunah mi panga aia tam awm khawm a khap a, hei hian August 31, 2020 thleng a huam dawn.

Kolasib District Border Safety Monitoring Team leh YMA Sub-Headquarters ruahmannain, Phaisen khuaa ramri vengtu tur Kolasib Hmarveng Branch YMA aṭanga Reserve Volunteer Force mi 20-te chu nimin khan Kolasib DC pisa tual aṭangin additional DC Lallawmawma'n a vailiam. Hmarveng YMA member-te hi August 10 thleng Phaisena ramri khàn pangate an veng dawn a ni.

Lawngtlai DC Dr Andrew H Vanlaldika chuan nimin khan tun hnaia ruahsur vanga Lawngtlai Chandmary Venga leimin a enfiah. Lei tawlh hi pialtlêp chunga awm a ni a, in ding lai erawh chu khawih chêt a nei lo niin in neitute'n an sawi. 

R Laldanglova (79), Armed Veng lehkhabu ziah pahnih, 'Phu loh di' tih leh 'Ka lungdumtu' tihte chu nimin khan minister of state Robert Romawia Royte-in R Laldanglovate inah a tlangzarh. Lehkhabu pahnih hi Rs. 100 man ve ve a ni.

State Referral Hospital-ah nimin khan Covid-19 vei mi panga leh hripui kai rinhlelh vangin mi pakhat dah luh a ni. SRH-ah hian Covid-19 vei mi 30 enkawl mek a ni a, ICU-ah pahnih, Isolation Ward-ah 25 leh SICU-ah pathum an awm. SRH-ZMC Bulletin tarlan danin, ICU-a awm pakhat zawk chu ventilator hmantir a la ni a, pakhatin hma a sawn zel. Isolation Ward-a awm zingah khawsik leh thawhah nasa vak lo nei paruk an awm a, SICU-a awm zingah harsatna nei an awm lo.