Turkey-Syria lirnghing : In chimin a delh mi 8,000 chuang chhanchhuak

Turkey leh Syria rama lirnghingin chhiatna rapthlak tak a thlen vanga thi zat an pun belh zel a, nimin thleng khan thi zat tarlan chu 37,000 an chuang tawh. Hetih lai hian in chimin a delh zinga mi 8,000 chu him taka lakchhuah an ni.

Turkey thuneitute chuan an rama lirnghing vanga thi zat hi 31,643 an tlin thu an sawi a, United Nations leh Syria sorkar pawhin Syria rama thi chu mi 5,800 chuang an ni tawh tih an tarlang bawk.

UN chuan ram pahnihah hian lirnghing vanga harsatna tawk, ei leh in lama hmanhmawh taka ṭanpui ngai mi nuai 9 dawn an awm niin a sawi. Syria ram bikah mi maktaduai 5.3 vel chu chenna nei loin an awm phah dawn niin a sawi bawk.

Ram pahniha magnitude 7.8-a naa lir a nghin aṭangin nimin kha a ni riatna a ni tawh a, chhanchhuah hna thawktute pawhin in chim hnuaia tangte nungdama chhanchhuah beiseina a tlem tawh hle tih an sawi. Hei vang hian thi zat pawh hi an la punchhoh zel rin a ni.

Syria sorkar chuan eptu lamin an thunun, an ram hmarthlang lama lirnghing tuarte chhawmdawlna ṭha zawk pek an nih theihna atan ramri chu hmun hnihah hawn belh a remti. Hemi hma hian ramri hi hmun khata chauhah hawn niin, hemi kaltlang chauh hian chhawmdawlnate hi phurh luh a ni.

UN chuan ram pahniha chhiatna thleng hian naupang maktaduai 7 chuang a nghawng tih sawiin, chhungkaw tam tak an chenna in chimte chu khawvawt vin tak hnuaiah awmna mumal nei loin an awm mek a, hei hian an tawrhna a belhchhah a ni, a ti.