Assembly Secretariat-a thawk tur lâkna July 6, 2023 ral hma ngeia sût an phût

Mizo Zirlai Pawl leh Mizo Students' Union chuan thuchhuah inṭâwm siamin, tun hnaia Assembly Secretariat-a thawk tur lakna chu July 6, 2023 ral hmaa sût (cancel) an phût a, sût a nih loh chuan Assembly Secretariat pisa kawtah zirlaite an punkhawm dawn thu an tarlang.

Assembly Secretariat-a thawk tur lak dan chung­changah MZP leh MSU hruaitute chu nimin khan MSU Pisapuiah an ṭhukhawm a; tun hnaia Mizoram Legislative Assembly Secretariat-a thawk tur - translator, assistant, upper division clerk leh lower division clerk laknaah thil fel lo leh chhungkhat laina, vua leh vâng induhsakna uchuak a awm nia sawi chungchang an ngaihtuah a ni.

MZP leh MSU chuan, document hrang hrang enin, Assembly Secretariat hna lak danah thil fel lo a awm ngeia an hriat thu an tarlang a, "July 6, 2023 ral hma ngeia hna lakna order cancel vek turin kan ngen. July 6 hmaa order cancel a nih loh chuan Assembly Secretariat office kawtah zirlai punkhawm ni se kan ti," an ti.

Zirlai pawl hruaitute hian nimin khan Assembly Secretary chu a pisaah an hmu a, an ngenna leh phût chu Assembly Secretariat-in an zawm ngei an beisei thu an hrilh.

MZP leh MSU chuan, a thiam, tling leh tlâkte'n an thiamna phû tâwk an hmuh theih nan leh dik leh felfai taka hna an hmuh theih an duh tih an tarlang a, "Hna zawng mekte tibeidawng zawnga hna lak kalpui a ni hi hriatthiam har kan tiin, a mawhphurtute kan dem tak zet. Hetiang thil hi Mizorama hna lak reng rengah thleng nawn tawh lo se kan duh," an ti.