Lal Isua chanchin zawnna thar ber leh a pathumna (1980 – tun hun)
N. T. Wright, English mi, Thuthlung Thar lama mi thiam chuan Lal Isua mihring chanchin zirna thawh thumna hi a lo chher chhuak a; mi thiam dangte pawhin kum 1980 aṭang khan Lal Isua chungchang zirna bikna leh zir zauna lam hawi lo awm te sawina atan an hmang a. Rudolf Bultmann leh a zuituten Lal Isua chanchin an zir dan leh ngaihdante chu an lo liam zo ta a, Bible leh Kohhran hmasate sawi dan ni loa Lal Isua chanchin zirna vawi thumna (The Third Quest of the Historical Jesus) chu Sap ṭawng hmangtute khawvelah lo langsar ta a. Judate sakhuana, khawtlang nun, ei bar dehchhuahna leh ram inrelbawlna zawn aṭangin Isua chu hriat fiah an rawn tum ta a.
Heti zawnga thlirna hian Juda mi thiam tam tak (J. Klausner, M. Buber leh G. Vermes, adt) chuan Isua chungchang an ngaihven phah hle a. Hetiang bawk hian Juda ni lo mi thiam tam takin Isua lo chen tawhna Judate khawvel chu an ngaihvenin kum zabi 1-na huna Juda sakhuana mila Isua hriat fiah chu an tum ta a. Lal Isua thusawi leh a thiltih zawng zawngte kha eng vanga sawi leh ti nge a nih tih kha an zir chiangin, a chhan pawh an hre fiah lehzual thei dawn ta bawk a ni. Isua kha mihring awm leh cheng a nih ngei chuan chumi hun leh hmun (context) mil chuan eng emaw chen tal a awm tur a ni a, chu chu Chanchin Ṭha buten Isua an lantir dan nen eng chen nge a inzul tih lai kha a pawimawh ber tura chu a ni bawk. Tin, Bible atana pawm lehkhabu (cannon) piah lamah thuziak dang (non-canonical) te pawh thu lakna har atan an lo hmang chho ta a ni.
Lal Isua chanchin chhui thar a nihna chhante mi thiamte’n Lal Isua chanchin an zir vawi thumna hi chu ringhlel taka Lal Isua chanchin an zirna aṭangin a kal hrang ta a. Kum zabi pakhatnaa khawvêl, a bîk takin Judate khawvêla Isua chanchinte chu hriat fiah an tum ta a. Judate chanchin leh an thu leh hla (literature) chungchangah hriatna hmasa awm tawh mah se, hmasang chanchin zir mite leh Judate sakhaw chanchin zirna lama mi thiamte hriatna infinkhawm lo pung chho zel chuan Thuthlung Thar lama zirna chu nghawng chhoin, thlir dan zim tak aṭanga Thuthlung Thar zirna chu a lo nek chhuak ta a.
History lam zirna hmanraw lo ṭhang chho zel leh hnam hrang hrangte nun dan leh khawsak dan zirna chuan Nazareth Isua an lo hriat thiam dan chu zau leh zual zawkin kawng a lo hawng chho ta a. Ziaka zawhna awmte chhanna turin general hypotheses (thil chiang awmsa aṭanga enchhin theih tur ngaihtuah) hmangin bung thar an kaiin an chhui ta a. Chungte chuan hun kal tawha zawhna an lo ngaihthah fo ṭhinte rawn hrut chhoin Judate sakhuana, khawtlang nun, ei bar dehchhuahna, leh ram inrelbawlna zawn aṭangin Isua chu hriat fiah an rawn tum ta a ni.
Lal Isua chanchin zira inhmuhkhawmna
Isua chanchin zir tura mi thiamte intawhkhawmna (Jesus Seminar) hian mi thiam pawl pakhatin Isua zawn chhuahna kawng zawh tura an thawhhona a entir a. North America rama Thuthlung Thar lama mi thiam lar tak Robert Funk-a’n kum 1985- a din a ni a, Isua tak tak chu rinna Krista aṭang chauh ni loin Chanchin Ṭha bua Isua a nihna ata pawh chhuah zalen turin a din a ni, tiin he seminar hi din a nih thu a sawi. J.D. Crossan, Irish-American, Thuthlung Thar lama mi thiam chu co-chairperson a ni a. Chutah chuan mi thiam za chuang vel kalkhawmin kum 300 hma lama ziak, Kristian hmasate lehkha ziak leh Thuthlung Thara Lal Isua thusawi mal te te chu a dik leh dik loh chungchânga mi thiamte inrem dan tehna tûra inkâwmkhâwm an ni a.
Lal Isua chanchin chhui dawn theihna hmanraw awm zawng zawngte chu zir chian turin an lakhawm vek a, Apokrifa (Bible-a pawm loh lehkhabu) leh Lal Isua chanchin sawina lehkha ziak them chenin ngun taka zir turin an lakhawm vek a ni. Tin, mi thiam kalkhawmte chuan Lal Isua chanchin chhuina hmanrua (material) chu a dik leh dik lo thliar hranna turin secret ballot hmangin vote an la a. Rawng (colour) pali hmangin chu Seminara Lal Isua chanchin an chhuina hmanrua chu thliar hrangin an sawi ho a. Hetiang hian an ṭhen a –
Rawng sen – Rinhlelh rual loha Lal Isua thusawi ngei a ni tih an pawm
Rawng sendang – Lal Isua thusawi ni theia ngaih an pawm
Vut buak rawng – Lal Isua thusawi ni lo, mahse Lal Isua thusawi hnaih tak
Rawng dum – Lal Isua thusawi ni miah lo, mahse, hun lo kal zela mite ngaih dan
Heng an thutluknate hi a zau thei ang berin an theh darh ta a ni. He Seminar-in a tum bulpui ber chu – mi thiamte zirna huanga Lal Isua thusawi leh chanchin te a dik thei ang bera hai lana zir chhuah kha a ni a. Kohhran mite hnenah kum 200 chhung zeta Lal Isua chanchin an zirbingna chanchin chu an ban phak turin a chhawp chhuak ta a. Kohhran mipuite chu Lal Isua chanchin zirna dik tawk lo aṭanga zalen taka awm turin mi thiamte hian an duh bawk a ni.
Lal Isua hi Pathian zawlnei ringawt ni loin he khawvela ei leh bar, sum leh pai leh ram leh hnam inrelbawlna thila hrehawm tuar mekte tan pawh zawlnei ropui tak a ni a. Lal Isua rawngbawlna, a mimal nun leh a zirtirna te chuan Pathian ram awmzia a sawi fiahin a lantir a; Pathian hmangaihna, khawngaihna leh zahngaihna te pawh chiang taka lan tirin a puang chhuak a ni, tiin mi thiamte hian Lal Isua chanchin an zirna aṭangin thutlukna an siam a. Mi hausa leh thiltithei, ram leh hnam hausa zawkte rorelna khawvel, sorkar rorelna fel lo avanga mi rethei zawkte rah behna leh tawrhna avanga hrehawm tuara rumte tan hian Lal Isua chu mihring rintlak, beiseina petu leh rintlak a nihzia kha mi thiamte chuan an zir chhuak a ni.
- Rinfela Zadeng

- Rinfela Zadeng

MI THIAMTE ZIRNA AṬANGA LAL ISUA CHANCHIN (Historical Jesus)–III

Political analyst tih leh Political scientist tih hi thil thuhmun sawina a niin a awmzia berah chuan ram chhung leh pawn pawh nisela politics dynamics chungchanga hriatna, hrilhlawkna leh tehna pe thei tura political trend, thil thleng leh policy hrang hrangte zirchian leh ennawn thin a, kawng hrang hranga media, academia, sorkar leh think tank-ahte hna thawk ṭhin tute hi an ni tiin sawi ila a fiah thei mai awm e. Political analyst lar leh hmingthang tak tak an awm a, chung zingah chuan Fareed Zakaria, Rachel Maddow leh George Will te hi tunlaiah chuan a lar zual an ni.
Kan ramah hian Political analyst-te ṭangkaina leh lansarhna hun tak tur pakhat political debate ang chi hi kan la uar lo viau nain tun hnai deuh aṭang khan kan ching ve ṭan chauh emaw tih mai tur a ni a. Media kaltlang emaw kaltlang kher lo pawha political debate neih hi thil ṭangkai tak a niin party propaganda puanchhuahna atan thil ṭangkai tak a nih bakah party dangte hnehna atan ngei pawha thil pawimawh tak a nih avangin political debate neihnaa tel turte pawh an uluk ṭhin a, briefing an nei hmasain uluk takin sawi tur leh sawi loh turte, sawi uar turte leh sawi pial ngai a awm pawha thiam taka sawi pial dan turte thlengin ruahmanna an nei hmasa ṭhin. Chutianga uluk taka inbuatsaihna an neih hnua debate neih chu an thusawi pawh ngaihthlak a nuamin beng a verh duh bik bawk a, mipui an hneh thei em em ṭhin a ni.
Ṭumkhat chu Lunglei Municipal inthlan dawn hnaihah khan LDF Cable-ah party tin aṭanga an aiawh thlanchhuahte chuan live discussion an neiin political party tinte chuan Lunglei Municipal inthlan turah hian eng nge an inbuatsaihna leh inpuahchahnate zawh nisela, Lunglei khawpui tana an hmathlirte pawh sawi tir nisela tiin hun buatsaih a ni a. Chumi ṭumah chuan party tinte hnena zawhna inang – common question tur atan pawh heng zawhna pahnihte hi ruahman a ni a;
1.	State sorkarin Municipal nei turin ruahmanna a siam takah chuan kan lo mamawh rengin in hria em. Nge barhluih lam rawngkai zawk?
2.	Lunglei Municipal Council hi atakin function ta ila Lunglei khawpui danglam dan tur eng nge ni ang?
Heng bakah hian party mal hnenah zawh tur pakhat ṭheuh siam a ni bawk a.
Amaherawhchu Lunglei khawpuia party hrang hrang aiawhte khan beisei an pha lo deuhin a hriat a, party aiawh turin mipuiin kan hmu lo deuh niin a lang a, an thusawi pawh sawizui a hlawh vak lem lo. Hei hi anmahni mimal hmuh tlin lohna lam vang ni loin party lam inbuatsaihna ṭhat loh vang zawk niin a lang. Ka hriatsual loh chuan party aiawha rawn telte kha an party chhung inkhawmnaah pawh thusawina hun la chang lo an ni hlawmin party tana ṭangkai tak an nih rualin pawn lam mi tan chuan party aiawh turin an tling chiah lo deuhin a hriat. Anni chuan party aiawhin ṭha takin hun an rawn hmang nain hruaitu lam aṭanga briefing engmah dawng lo an ang a, party hruaitu lam zawkte kha tinge an tel zawk loh tih zawhna lian tak a awm a, khatiang hun kha remchanga lak a rem tehlul nen khan chulam hawia thusawi pawh a awm ta chiah lo deuh bawk a.
Political analyst ni tur hian party-ah hruaitu niha chanvo neih kher a ngai lo a, ram hruaitu nih pawh a ngai kher lo. Party tan erawh thluak bur tak tak an niin an mahni party propaganda duannaah leh puanchhuahnate an ṭangkaiin party hruaitute debate-na hmunah phei chuan rinrawl ber an niin engkima engkim an ni ṭhin. Khawvel chanchin kan thlir chuan political debate hi ngaihnawm tak tak alo thleng tawhin vawiin thlenga kan la hriat lar zingah chuan; Kum 1858-a Lincoln leh Douglas inhnialnate, kum 1960-a Kennedy leh Nixon inhnialnate leh kum 1980-a Ronald Reagan leh Carter inhnialte kha hriatreng an hlawh bik emaw tih mai tur a ni. Abraham Lincoln leh Stephen A. Douglas inhnialnaah khan saltanna leh ram thar zuan chungchang kha thupui pawimawh bera neih a ni a, khang lai hunah khan tualchhung indona (Civil war) pawh a thleng fo reng a, an inhnialna thu leh hla chuan ngaihven pawh a hlawh viau reng a ni.
Kennedy leh Richard Nixon inhnialna (1960) pawh kha TV kaltlanga inhnialna hmasa ber a niin thlirtu pawh an ṭhahnem viau a. Domestic policy, foreign policy leh economy lamte kha an inhnialna thupuite a niin Kennedy chevel leh thusawi chuan mi rilru pawh a hneh viau a nih kha. Kum 1980-a Ronald Reagan leh Jimmy Carter inhnialna pawh kha sum leh pai lama harsatna leh Carter-a kaihhruaina hnuaia ramin harsatna a tawhte chu thupui pawimawh zualte a niin Reagan thusawite chuan mi rilru a hneh hle. Kum 1996 presidential debate neihnaa Bill Clinton leh Bob Dole inkhin ṭum te khan Bill Clinton kha debate-ah a che ṭhain, America ram hruai a tum dan a han sawi vel chuan Bob Dole chu Senator lar ṭhin ni mahse boruak nei thei lo hial khawpin a siam hial a. Bill Clinton chuan Health care reform, zirna lam leh welfare reform lam a sawi bakah "Kei chuan America hi hun kal tawhah hruai kir ka tum lova, kum sangbi thar lo awm tur hi hmachhawn thei turin, hun lo kal tur atan buatsaih che u ka tum ang" tiin han sawizui bawk a, mipui lawm a hlawh hle.
Bill Clinton-a hian term hnih a hman zawh hnuah chuan a Vice President Albert Gore leh George W. Bush chu an rawn inkhing ve thung a, dabate-ah chuan Albert Gore kha a che ṭha viau ṭhin nain, sorkarna an chan hnua tih turin thutiam a ngah lutuk a! A thil tum leh tiam zawng zawngte chu Political Analyst thiam rualte duan chhuah vek niin, US tan leh khawvel tana ṭha lutuk tak vek a ni nain an debate zawh chuan CNN palai leh Political Analyst Adam Steinhouse inkawmnaah chuan Steinhouse chuan "Albert Gore khan thutiam ṭha tam tak a sawi chhuak a, mahse, chungte chu term khat chhunga a tihpuitlin hman loh tur thil a tam hle a. A tak ram enin thil tih theih loh tur a ni" tiin a sawi a, a dik hmel viau a ni.
Hetianga ram hruaitute’n langsar taka debate an neih ṭhin hi sawi tak ang khan propaganda thehdarhna hmanraw ṭangkai tak a nih theih laiin ṭhenkhatte tan chuan boruak vuak chhiat derna hmun a ni thei. Ka la hriatchian em em pakhat chu kum 2008 inthlanpui dawnah khan Khawzawl Ṭhalai Pawl huaihawtin Candidate-te puala hun buatsaih a ni a, chutah chuan Candidate pakhat chuan sawi tur a hre lo nge a zam kan ti zawk dawn, a ‘hai’ ringawt a nih kha. Political analyst/ Scientist pawimawhna chu kan hrethiam mai awm e. Analyst leh scriptwriter hi sawi pawlh awl tak leh thliar hran har ang reng tak a ni a, analyst-te hi chuan data, trend leh pattern lam buaipui leh hrilhfiahna lam an buaipuiin party chhungah a thluak bur ber angin an awm a. Scriptwriter-te thung chuan media lam hmachhawnna hmuna thusawi tur ziah, narrative leh dialogue buatsaihte an hna deuh bik ṭhin.
Mizoramah hian hetiang Political analyst/ Political scientist kan tih ang chi hi kan la awm lo niin a hriat a, Kum 1972-a mahnia ro inrelna kan chan aṭanga vawiin thlenga kan ram hruaitute ngei pawh hian mahni ir-awm chhuak leh mahni ngaihtuahna ang angte hi mipui hmaa an la auchhuahpui kan ti thei bawk ang. Hetianga mahni ir-awm chhuak anga auchhuah mai hi a ṭhatna awm bawk mahsela mipui beng a fah zawh lohna hi a awm theih ṭhin avangin ram changkang zawk leh India ramah ngei pawh analyst-te hi an hmang ṭangkai ṭhin a. Analyst ṭha tling tur chuan party ruihchilh loh leh party boruakin a chim buai ve loh nih angai a, mipui mar deh thiam pawh thil ṭul tak a ni bawk. Tuna kan ram hruaitute ngei pawh hi an fela an ṭhat em em rualin an kiangah analyst ṭha tak awm reng thei phei sela chuan an ṭhatphah lehzual ngeiin a rinawm.
-Mahmuaka Chhakchhuak

-Mahmuaka Chhakchhuak

POLITICAL ANALYST KAN MAMAWH EM?

Khawvel Chhandamtu lo lan hma zawng kha leilung hunbi chhiar dan chuan 'B. C' tiin kan sawi ṭhin a. Mi ropui leh hmingthang tak tak, tun thleng pawha kan la ngaihsan em em he leiah hian an lo piang a. An taksa, leilunga a luanral hnu kum za tam tak hnuah pawh an sulhnu ropui takte avangin kan la theihnghilh thei lo a nih hi. Greek mi fing Socrates, Plato etc thu leh hlate chu tun thlengin kan finna tuikhur tlan ber a la ni reng. 
India lal ropui Ashoka rorel dan mawi tak te, nawmchenna tlansan Gautama Buddha te pawh tun thlenga mihring ngaihsanawm ber ber zinga chhiartel an la ni reng a. Chutiang bawkin, ram hrang hrangah sulhnu hnutchhiahtu mi ropui, an thih hnu pawha an sulhnu thi ve thei lo mi eng emaw zat an awm tih ka hria. Heng mite hi lo piang ta lo chu ni se, khawvel hi engtin tak kal ang maw! Khawvel lunghlu mawi ber an va ni teh lul em.
Isua lo lan hnu, A. D (Anno Domini) tia kan sawi ṭhin aṭanga chhut pawhin khawvel hian kum sang hnih hmel a lo hmu ta reng mai. He kum sanghnih chhung hi kum zabi (Century) khat zela kan ṭhensawm chuan kum zabi sawmhnih zet a tling a. Kum zabi hmasa ber (1st Century A. D) aṭanga a hnuhnung ber, kan thlah liam tak, kum zabi sawmhnihna (20th Century A. D) chhung khan khawvel hi a inlumlet nasa em em a. Chhiatna rapthlak ber aṭanga thil ropui ber ber chenin khawvelah hian a thleng inkahpukchaw chho zut a. Lal Isua lo lan hnu, kum zabi sawmhnihna tluka mak danglam leh ropui chungchuang a awm lo va, a aia chhinchhiahtlak bik a awm lo ti ila, ka uar hauh lo vang. Kum zabi zawnga khawvel hmel tidanglam nasa ber a la ni. 
Kum 1900 A. D aṭanga kum 2000 A. D inkara khawvel awm dan zawng zawng kha han chhui kir ta ila. Kum zabi 20-na kawl a lo en aṭanga ṭhangkhat lian a ral awrh tihah indona awm tawh zawnga la rapthlak ber 'Indopui Pakhatna' chu khawvelin a hmachhawn a. Khawvel hi a rûm a ni ber. Chuti khawpa tuarna rapthlak chu he leiah hian thleng tawh lo se a duhawm tehlul nen, a hnuah 'Indopui Pahnihna' chu a lo chhuak leh ta mai a. Mihring maktaduai tam tak thisen a luang a, khawvel hi nasa taka sawp chhiatin a awm a nih kha. 
Khawvelin chutiang hun rapthlak a tawh lai vék chuan thil ropui leh chhinchhiahtlak tak tak a tawng ve tho mai. Leilung piantirh ata thil hmuh chhuah ropui ber pakhat 'Atom Chakna' chu hmuhchhuah a ni a, chumi kal zel chuan Nuclear ralthuam hlauhawm pui pui a hring chhuak ta zel a. Thil tih theih rual loha ngaihpawh mihringten ti theiin, thlaah te hial an zin/inkap kai thei ta zel a. Science thiamna hmanga kum zabi 20-na chhunga khawvelin hma a sawn nasat zia sawi fiah thiam rual a ni awm lo ve. 
He kum zabi chhunga khawvel hmel tidanglamtu langsar ber pakhat chu Ram hmangaihna (Nationalism) thinlung pu a, inawpbehna huang aṭanga talchhuah tuma beihna meipui a lo alh chhuak ta hluah hluah mai hi a ni. Ram chak leh thiltithei zawkte awpbehna aṭanga talchhuak turin awpbeh ram hrang hrang aṭangin zalenna sualtu mi huaisen leh rorum tak tak an lo chhuak ta phawk phawk a. Chu'ng zinga hmahruaitu leh ka rawn tarlan duh bik chu India hnampa 'Mahatma Gandhi' kha a ni. A kaihhruaina chak tak, tharum tel hauh si lo hmangin ram ni tla sengloa roreltu (British) chu a rawn hneh ta mai a. Chu hruaitu ropui hnung chu zuiin, ram hrang hrangah zalenna sualchhuah tumna thlipui a tleh ta hum hum mai. Gandhi hnung zuitu langsar ber pakhat chu S. African mipuite tana zalenna dar vawtu - Nelson Mandela hi a ni nghe nghe. 
Heng hruaitu tumruh, huaisen leh ṭhahnemngaite vang hian, ram eng emaw zat chu tlukchhiatna lak aṭang khaichhuahin an awm a. Heng mite hi khawvel rosum leh lang thei lamah chuan chhuan tur nei lo tak vek an ni a, mahse an thiltih ropui tak tak avanga an ram mipuite tana malsawmna chhiar sen loh thlentu an nih avangin, khawvel hian a ngaisangin a zah lo thei lo a ni. Mi ropuia siamtu chu an hausak lam a ni lo a, an dam rei leh rei loh a ni hek lo, khawtlang, ram leh hnam tana an inpumpek vang chauh a ni zawk e. 
Ram leh hnamin hun khirh a tawh lai leh, kawng bumboh a zawh lai hian hruaitu ropui leh ropui lo chu fiahin a awm ṭhin. Sawi ringawt lova a taka thawktute hi ram leh hnam chawimawitute an ni. Kan ram pawh hian hetiang mi hi kan mamawh ber a, kan ram khawsak rel dan (economy) en phei chuan kan mamawh lehzual niin a lang. Hruaitu ropui, hnam pasalṭhate chanchin a tlangpui ka rawn chhawp chhuah aṭang hian chhiartu duhtak, khawtlang leh ram hmel tidanglamtu, mi dangte tana malsawmna thlentu nih ṭheuh i tum ang u. 
- Nathan Lalruatpuia Ralte

- Nathan Lalruatpuia Ralte

HRUAITU ROPUI

Nungchate chuan anmahni hunbi ṭheuh­ah Siamtu an fak a. Reilote chhung atan hunbi a lo inher chhuak a, chu hun ropui, mawi leh duhawm takah chuan siamtu kutchhuak ropuizia nungchate chuan an rawn fak ṭhin. 
Kan ramah hian hunbi pali - thlasik, fur, ṭhal, favang te chu anmahni hun ṭheuh zelah a lo thleng a, heng hun pui pali te zaia rawn awi turin nungchate chuan an aw rawl neih chhunin Siamtu thilsiam mawina chu an rawn fak ṭhin. Nungchate chu Siamtu ang maiin an danglam ve lova, mihringte erawh chu kan lo danglamin fakna hla pe chhuak tur pawhin zirtir kan ngai ṭhin. 
Nungchate awrawl chu a mawi a, hriatna tura beng nei chuan sawi selna tur an hre lo. An awrawl mawi takte chu a tira siamtu in a pek original dik takte an la ni a. An chaw zawn nan ṭangkai lo mah sela, thilsiam mawina te an hmuhin an ngawihbopui thei bik lo a ni. Favang hun nuam tak chu kan hma lawkah a awm tawh a. Losul therengte chuan feh hawngte chu kawng lakah zaiin an lo awi a, hlim takin In an thleng ṭhin. 
Mizoramah rimawi a awm hma pawhin kan pi pute zaia lo awi tleitu an ni. An nin ram lamah fakna an pe chhuak a, keinin in lamah fakna kan hlan thung a ni. Dawlrem te, nipui therengte bakah uleuh leh ngirtling hram ngatte phei hi chu a ri a mawi bik a. Rual u te lo awi tleitu an ni a, lunglenna inthup tlat, rilrua riak rengte chu a rawn kai harh a, kum tam liam hnua kan sulhnute kan va hre chhuak a, kan lung a leng vawng vawng ṭhin. 
Khuanu in a thil siamte fakna tura nungchate aw mawi tak mai a lo pekte chu mihringte siam chawp rimawi hian a tluk thei ngai lova, an thawm ri mawi takte chu kan bengin alo hriatin, rilru a tiharhin, nun a tihlim ṭhin - chu chu taksa tan hriselna a ni. 
Nungcha ṭhen­khatte chu an tet em em avangin an aw ki sang lutuk leh te lutukte chu mihring bengin a zuk hriatpui phak lo a ni. Mahse anmahni chenna khawvel zimteah chuan Siamtu an fakna thawmte chu thil ri ring ber ang maiin hla tak atang pawhin an inhre tawn thei a ni. Rannungte pawh hi tihhlum mai mai loh tur a lo ni. Keini aiin siamtu an fak thiam zawk a, a hunbi tak zelah an rawn fak a, an aw rawl a chuai ve ngai lo, engkim siamtu chuan duat taka a lo enkawlte an ni si a. 
Hei hi ngaihtuah teh ramhnuaiah chuan i hlam khat bial lekah khan Lalpa'n a duh taka a siam rannung sang tam takte chhun zan zawmin an khawsa a. Chulai chu an tan khawvel zau pui a ni a, siamtu thil siam hausakna ren rual loh chu kumkhuain tah chuan an chen a. Engkim siamtu chuan khawvel tifamkim tur leh timawitu atan anmahni an hrang ṭheuh angin mak leh danglam taka siam ṭheuh an ni. 
Keinin kan duh dana kan tihlum leh ringawt ṭhin hi siamtu duh dan a ni lo va, an khawngaih thlakin duat an ṭul a ni. Hawh u, nungchate hi i duat lehzual ang u. 
He leilungah hian anni te nen awm ho tura Lalpa buatsaih kan ni si a. 
- H.Neihchungnunga, Durtlang North

- H.Neihchungnunga

Nungchaten Siamtu an fak

Sawrkar thar kan nei ta bawk a, duhthute pawh han sam ve dawn chhin ila a ṭha awm e. Mahse, duhthusam hi chu a tlangpui thuin kan duh ber, awh ber, kan han sawina mai mai ṭhin kha a nia. Tunlai khawvel thiamna sang takah erawh chuan thil awm thei lo, ni thei lo tak tak pawh hi a awm thei tawh meuh lo ve. Bazar chungchangah ringawt pawh hian tunah chuan sitting room aṭangin kan han hmet zeuh zeuh a, a tuk tuk leh lawk velah kawtkaiah, "Hei, I bungrua a lo thleng," an rawn ti nghal zel mai tawh a ni. Hetiang khawvel kan nih tawh avang hian ṭhenkhat tan chuan kan duhthusam kha thil ho mai mai a lo ni ve reng thei tawh a ni. Nia, a mihring azirin kan duhthusam chu a inang lo hlawm thei khawp ang le. Kan ram chu ram changkang lo, rethei kan ni a, duhthusam pawh awlai te te, ho te te pawh lo ni se, kan la inhmeh tawk viau zel theiin ka ring. Aw le, duhthusam chu sawi tawh angin thil ni thei tak tak tur lo, ngaihruatnaa kan sawi mai mai a ni a, mahse, vawiinah chuan sam thiam viau kan tum thung dawn a ni. 
Ei Leh Bar – Khaw lai han chhuah chuan lirthei changkang tak tak, chhuak thar ber, kea kalte pawh an sawi tawh ṭhin angin, London khawlai pawha zahpuiawm lo tur tak tak kan ni hlawm. A tlangpui thuin ni tin chaw vawihnih, chhun thingpui, chawhnu, a ṭhenin zan lamah te pawh kan in bawk a. Henga kan ni tin ei leh in tam zawk hi chu state dang aṭanga kan lakluh a ni, a lakluhna tur pawisa pawh chu kan thawhchhuah em em a la ni lo, a ṭhen chu central lam aṭanga kan dawn a la ni. Lehkhathiamte pawh an pung nasa, a lawmawm hle mai, Ph.D, tih vel pawh an awm fer fur tawh mai a nih hi. Kan titi te pawh a sang, kan khaw hawi pawh a zau hle, thil engkim kan hria emaw tih mai tur a ni. Kan hriat ṭheuh angin India ramah pawh kan sang viau mai, mahse, hetih laia lungchhiatthlak deuh thil pakhat awm chu, Silchar kawng a pin hlek chuan kan buai, chuti hlauh chu kan ni zel mai si hi a ni. Ni tin eitur kan mamawh, a tel lovin a awm theih loh, engtin nge ni ang le? Loneih kan peih tawh mang bawk si lo, eng ngati nge kan peih loh, han ti leh ta zel ila, a hlawk lo, an awhawm loh, mi rethei tihna a ni deuh ber mai. Loneitute dinhmun hi a hniam berah middle class-te tal ni thei se chuan kan intih hmuh sup sup ngei ka ring tlat, tichuan, reiloteah Silchar kawng pawh chu lo ping sawmsarih mah se la, eng he huah kan ngai tawh kher lo vang. 
Zokhaw Lam – Chanchinbu, Radio, TV, ah te kan hre hlawm ṭhinin ka ring, khaw fai ber, India ram pawha lang pha an awm leh zauh ṭhin. Khaw tam takah hi chuan faina leh thianghlimna an ngai pawimawh thei hle, khawpui lam aiin an invawng fai daih zawk a ni. Kei hi thingtlang lama kal ngai mang lo, Aizawl mi pawh ni chiah lo, mahse, Aizawla seilian chu ka ni. Hetia ralkhat aṭanga ka lo thlir ve vang vang hian zokhaw lam mite hi hriselnaa inenkawlna lamah hian an va khawngaihthlak ve aw, ka lo ti ve mai mai. Khawpuia mite ang bawka natna kai ve ṭhin, inenkawl ngai, Doctor pan ngai an ni. Khawpuiah chuan Doctor-te pawh specialist, chu'ng zingah pawh duh kan la thlang ṭhin a ni. Damdawi leh thil dangte pawh harsa lem lovin a tih zung zung theih, a panna kawng pawh minute reilote chauh a ni. Hetih lai hian thingtlang lamah Doctor chu sawi loh nurse tak ngial pawh ràwn tur an awm lo ṭhin, lo awm pawh ni se, a damdawi lam hmuh a harsa mai thei a ni. Nia, kan hre ṭhin ang a, thingtlang lam aṭangin damlo chu nileng zankhuaten an rawn kalpui ṭhin a ni. An tan chuan a va hautak lua em aw, a harsa zawk zawk an la ni bawk si, Doctor-ho lah hi an awm ṭha duh mang der lo, hei hi chu India ram hmun dangah pawh a ni tho mai. He an dinhmun harsa leh buaithlak tak mai hi bengsika ngaihtuah ngai a va ni em ve aw. 
Khawpui Lam – Khawpui lamah hi chuan engkim mai deuh thaw hi a awlsam a ni, kan vannei e, i ti mai ang. Tun hma deuh kha chuan kawng diak, han kal chhuaha diak kai lei luaia haw ngai kha a ni ṭhin a, mahse, tun hnu hi chuan kha kha a lo awm ta miah lo, a tih theih a ni. Kan pheikhawk, slipper bunte pawh a ngai ngaiin kan hawpui leh ṭhin a ni, a lawmawm ang reng hle mai, kan lo changkang ve ta deuh a ni deuh ber mai. Tun hnua buaithlak leh tlat ka tih chu tuihawkluankawr ni lo, kawng leh step vela ruahtui luang nasa lutuk ṭhin hi a ni. Eng ngati nge kawng velah chuan a luan chiam zel mai le aw, a luanna tur chu siam a ni ve ngei a, mahse, a ṭangkai vak miah lo, a buaithlak hle mai. Kawngpui dungah emaw kein han kal han kal ve mah teh, bawlhhlawh nawi eng eng emaw hi hmuh tur a tam thei hle mai, a bawmte pawh siam a ni a, mahse, a sawt vak lo emaw ni le? a tih theih. Tun hma khan vantlang zunina ek awm nasa ṭhin kha kan buaipui a, kan sawi sup sup ṭhin, a ṭawp hle reng a ni. Mahse, vawiinah chuan kha buaina kha kan nei tawh miah lo, a tih theih a ni, chinfel a ni deuh tlat mai. Hetiang ang bawk hian kan sawi tak, tuihawk luang nasa, bawlhhlawh chungchangte pawh hi a chinfel dan a awm ngei ang, i vei tlang teh ang u. 
Duhthusam ka han ti ngawt a, ngaihmawh zawngte pawh a ni mah awm e. Ka ngaihmawh leh deuh pakhat chu kan mi thiamte biangbiakna/sawihonaa sap ṭawng tel tam lutuk ṭhin hi a ni. A buatsaihtute hian chawpchilh lutuk chuan an sawm/hrilh, ka ring chiah lo va, inbuatsaihna hun chu ni 3/4, vel tal chu an neih ngei ka ring. Nia, technical lam thil hi chu a Mizo ṭawng chuan buaithlakna chin a tam, an tih hi chu ka hria a, mahse, hei pawh hi... ka ti deuh mai mai. Heti tak maia sap ṭawng kan han ngaisang, uar ta lutuk hi chu, inngaihtuah a ngai chu ka ti ve deuh. Pu Modi (PM) pawh hian UNO-a thu a sawi khan hindi-in a ni a sawi ni. German Chancellor ni lai mek pawh hian a tlangpui thuin anmahni ṭawng deuh ngat a ni, a hman ṭhin ni. Sawi ta zel ila vai, kan tih hote pawh hi an ṭawng ṭha duh lo reng reng, anmahni ṭawng an ngaisang/duh zawk tlat. Changkang kan intih ve tawh viau lai hian mahni ṭawng kan ngaisang mang tlat lo hi chu kan inngaihtuah chian a ngai, lemchang mai kan nihzia tilangtu mai mai a ni. Aw le, sawrkar tharah beisei takin duhthu kan han sam ve mai mai a ni a, i lo ngaihtuah ve ngai emaw ka hre lo a, ka sawi chin bak hi hunawl i neih chuan i lo chhunzawm ve dawn nia. 
- Lalchhandama Colney
Ph - 9862982321