Tun hnaiah Mizoram sorkara mi pawimawh tak fanu chu social media lamah doctor kut a thlak lai a darh chiam mai a. He mi chungchangah hian a nuṭa chuan mipuiah thil awm dan sawifiahin thupha a chawi tawh a, social media lam a luah hneh viau a ni. 
Kan tunlai khaw­vel hi a danglam tawh hle mai a, social media khawvelah kan cheng a ni ber tawh. Hei vang hian, 'Social media mai mai thu taka lâk tur a ni lo,' ti zawnga kalpui chi ngawt a ni tawh lo. 
Hetihlai hian tute emaw chet chhiatna remchanga laa a tel ve lo an nu leh pate thlenga hmer tel tlat te, politics zawnga lo kalpui tum ṭalhte leh an chhungte mi langsar an nih avanga midang beihna atana hman tlat maite hi a fel lo hle. 
Tun hnaia thil thlengah pawh hian chhungte tana hriat zui nuam lo khawpa beihna tam tak hmuh tur a awm a, pawi khawihtu lam dem mai duhtawk loa a tel ve miah lo an chhungte politics-a mi pawimawh an nih vanga hmer tel hramte hi tih tawh loh atan a duhawm khawp mai. 
Mipui mimirin kan hman tawh miau avangin social media hman dan hi inzirtir thiam tik a awm kher lo thei a, mahni ṭheuh inveng­in na tak taka mimal inbeihte tlansan ila, lungawi lohna lam kan sawi chhuak duh a nih pawhin ṭawngkam mawi leh hawihawm zawk hmang hram ang u. 
Mizo mipui hi nuai 10 chuang vel lek kan la ni a, kan la in hre pawh deuh vek mai si a, a chhe thei ang bera social media-a inbeih vak vak hi i insum deuh ang u.

Mimal inbeihna leh social media

Siaha district-a Siasi leh Chakhei inkar kawng siam hna thawh chhe lutuk, res­tricted tender hmanga Kamrul Laskar-a hnathawh dan a hmuna rawn enfiah turin Road Transport and Highways minister Nitin Gadkari a lo zin dâwn niin BJP Mizoram Pradesh chuan thu an chhuah. 
Thuchhuaha an tarlan danin Siasi-Chakhei kawng siamna turin sorkar laipuiin CIRF scheme hnuaiah Rs 47,22,41,887 (vbc. 47.22) a pe a, kum 2019-ah thawh ṭan a ni. Contractor Kamrula'n a thawk chhe hle a, a nih tur angin a siam lo ni. 
Mizoram sorkar hnuaia contractor langsar tâk Kamrul Laskar-a hian restricted tender hmangin hna a hmù thei hle tih chu tlâng hriat a ni a, a hnathawhte hi hna lian tak tak leh sum ṭhahnem tham awmna a ni ṭhin. A hnathawh pakhat Lengpui Airport chu a saklaiin a chim a, a thawk ṭha lo hle tih chiang takin a lang chhuak. Chu mai ni loin Lengpui Airport chei hna a hmuh danah thil fel lo a awm nia hriain mi ṭhenkhat chuan chhui chiang turin thuneitute hnenah an thlen mêk bawk. 
Heti taka hna hmù thei hi chuan Mizoram tana sum lo kal hmang hian ṭha takin hna thawk mai se a ṭhat dawn tehluh nen, BJP thuchhuah hi a dik a nih ngai chuan Mizorama kawng siamna tur sum lo kal chu a hmang chhe hle tihna a ni a, Mizo mipui zahlohna pawh a ni thei hial ang. 
Tender pangngai pawh ni lo, midang chhan ve remchang vak loa restricted tender hmanga hna hmutute ngei pawhin hna an thawk ṭha lo fo mai hi a pawi a, chutiang miin sorkar duhsakna a chang chhunzawm zel hi a pawi lehzual a ni. 
Union Minister-in a enfiah ngai khawpa hna ṭha lo a awm tak tak a nih chuan a zahthlakin a thinurthlak a, a contractor leh amah thlangtute thlengin an inenfiah a ṭha hle ang.

Hnathawh enfiah a pawimawh

Pachhunga University College (PUC) chuan tun hnai khan kawng hrang hranga an hlawhtlinna hmuh lawmna hun an buatsaih a, Chief Minister-in a hmanpui. PUC hi NAAC-in A+ grade a pe a, a grading hmuhah hmarchhakah a sang ber a; National Institutional Ranking Framework (NIRF) tehnaah India rama college-ah 45-na a ni phak a, hei bakah hian hlawhtlinna hrang hrang ṭhahnem tak an nei bawk. 
Mipui nawlpuiin kan ngaihtuah lem loha kan sum hmanna lian tak pakhat chu zirnaah hian a ni a, a bikin state pawna zirna in ṭha pana kan senso hi a tam tham hle a ni. Mizo zirlaite hian zirna in ṭhaa seat an hmuh a, hnam dangte ang bawka zirna ṭha an chhim theih chuan result ṭha tak tak pawh an nei ṭhin tih a takin kan hmu a, hei vang hian zirna in ṭha mamawhna hi a sang hle.
Tun hnaiah Mizoram chhung­ah pawh private sikul ṭha tak tak a awm chho mek a. Zirlaite pawh an thiamna, ṭawng leh hawiher thlengin India ram sikul ṭhate el phak tur khawpin an changkangin hma an sawn a tih theih ang. Hei hi hmasawnna lawmawm tak a ni a, private sikul-in hma a sawn viau lai hian sorkar sikul lam erawh hmabak a la ko hle tih chu a taka hmutu vek kan ni. 
PUC-in a kum tela hma a sawn zel mai hi thil lawm­awm tak a ni. Hei hian college dangte tan chona a siam a, zirlaite leh zirtirtute pawhin intihsiakna hrisel an neih phah a, Mizoramah zirna in ṭha hi i din belh zel ang u.

Zirna in ṭha Mizoramah

Chief Minister chuan SEDP kalpuina turin sorkarin cheng vaibelchhe 326.13 a ruahman thu Independence Day-ah a puang a; chhungkaw 60,000 hnenah ṭanpuina Rs 50,000 ṭheuh pek a nih tur thu leh, MLA constituency tinah beneficiary 1,500 an awm tur thu a sawi. 
Ngaihdan insual lian tak awm reng chu a thlawna thil sem ṭha ti leh ti lo hi a ni. A thlawna thil sem duh lo pawl an awm laiin a thlawna thil sem hmanga mipui vote zawng an awm ve bawk. Tuna sorkarna chelhtu MNF hian inthlan hma khan a thlawna thil an sem tur thu hi an aupui nasa a, an au hla pakhat chu Rs 3,00,000 sem a ni. 
Rs 3,00,000 hi sem an tum mai ni loin NLUP dawng tawhte pawhin an dawn leh vek tur thu tuna Chief Minister ngei hian a puang a, hei hi mipuiin an phût vang ni loin an inzawrhna atana a sawi niin a lang. Chuti a nih chuan an sorkar term tawp lama MLA bial khata chhungkaw 1,500 thlan chhuah hnenah zel chauh pek an tum thu a sawi hi chu a inhmeh ta lo hle a; chu mai ni loa an aupui ber Rs 3,00,000 sem tur a nihlaia an sem tura tuna an sawi hi chu Rs 50,000 chauh a ni a, hei hi an sem tura an sawi Rs. 3,00,000 aṭanga 16.6% a ni. 
Mahni intiam ang zawng zawng tih hi a harsa a nih pawhin mipuiin hriatthiam chin an nei ngei ang a; nimahsela pawisa sem tur intiam aṭanga 16.6% chiah pek chhuah tur thu sawi hi chu mipui zahlohna rawng a kai thei hial awm e.
Mizoramah hian khawi party pawhin inthlan hmaa an intiamna hi thlan tlin an nih hnuah zawm hram hram se. Chhungkaw tin hnena Rs 3,00,000 tiamtute'n chhungkaw thlan bik 60,000 hnena Rs 50,000 chiah sem an tum ta mai hi chu thil inpersan tak a ni.

SEDP-a pawisa dah zat

Tun hnai khan New Siaha East II-ah Myanmar aṭanga vawk lakluh 10 chu man niin suat nghal vek an ni. Heng vawkte hian a pul hri (African Swine Fever) an kai a, vawk neitute hi police-in an man a thubuai an ziak lut nghal bawk a ni. 
Mizoramah vawk pul hri leng avangin vawk vulhtu tam tak an mangang em em a, vawk pul hri lo luh ṭanna chu dan loa ram pawn aṭanga vawk lakluh vang niin an sawi. Chhungkaw tam tak rûmtirtu vawk pul hri hi a damdawi a awm loh avangin vawk suat hial a ngai ṭhin a, chutiang a thlen tawh hnua ram pawn aṭanga vawk pul hri a leng tih hre reng chunga vawk lakluh chhunzawm hi sual lian tak a ni. 
Tun hnaiah ram ṭhenawm aṭangin mi chhiatna tur sumdawnna kalpui a awm nual a, chung zingah chuan dan loa vawk lakluh hi thil langsar tak a ni. Chutiang bawkin Myanmar aṭanga ruihhlo lo lut hian chhungkaw tam tak a tichhe mek bawk a, mi chhiatna tura sumdawnna hi tihtawp vat a ṭul hle a ni. 
Midangte chhiatna thlentu dan loa sumdawnna dang awm leh chu khaw chhak aṭanga kuhva rah tawlh luh hi a ni. Kuhva lak luh hi ruihhlo leh thil pawi tak anga a lan loh avang hian a sawi mawi pawl awm bawk mah se Mamit District-a kuhva chinga eizawngtu chhungkaw tam tak rumna thlen mektu a ni a, sorkarin a tihtawp a tul hle a ni. 
Myanmar aṭangin dan loa sumdawnna midangte chhiatna thlentu hrang hrang hi sorkarin na taka a do a, a tihtawp ngei a ṭul khawp mai.

Mi chhiatna tur sumdawnna

India chuan British awpna aṭanga zalenna a hmuh champhaphak vawi 75-na vawiin hian a hmang dawn a, he kum lo thleng tur lawmna hi hun rei tak chhung kalpui tawh a ni a, Mizoramah pawh he hun hi ropui taka lawm a ni ang.
Kan duh emaw duh lo emaw tunah chuan India hnuaiah kan awm ta a, India sorkar aṭanga hamṭhatna tinreng dawng chung leh, a hnuaia hlawh late meuh zingah pawh India nih hreh tlat leh India hi ram hrang anga ngai tlattu kan la nei a, a inhmeh lo hle.
Indian nih duh loha tal hran tum berte pawhin India zalenna ni lawm taka an hman tawh hnuah hi chuan India khua leh tui nihte pawh hi tlawm leh zahah nei loin, chhuang tak chunga awm mai hi a zahawm tawh zawk a; zalenna ni lawmna pawh India sorkar hnuaia awm duh tho si tan chuan uar taka hman ve mai a ṭha tawh zawk awm e.
Tun hnaiah India hnuaia awm nih hreh si, India sorkar aṭanga hamṭhatna tinreng dawng duh tho si hi kan la awm nual a, engpawhnise ngaihdan a inthlaksak theih si loh avangin India hnuaia lungawi taka awm tura innawr chiam chi pawh a ni lo a, tuna kan dinhmun erawh India ramah awmin India khua leh tui niin Indian chu kan ni ta vek a ni.
India zalenna champhaphak vawi 75-na chibai vek ule.

India zalenna champhaphak

Transport Department-in RTI Act hmanga zawhna an chhannaah Aizawlah two wheeler taxi permit 3,646 a awm mek tih a ni a, district-ah permit 385 pek tum a ni. 
Aizawl khawpui tana awlsamna siamtu ṭangkai tak chu two wheeler taxi-te hi an ni a, man tlawm zawk leh rang zawkin an duhna hmunah mi an hruai thleng zung zung thei a ni. Hetihlai hian Aizawl khawpuia traffic jam tizualtu leh harsatna ṭhenkhat thlentu an ni tel bawk tih erawh phat rual a ni lo ang.
Sorkar tan two wheeler taxi permit pek chhuah hian ṭangkaina tam tak a nei a, chu'ng zinga langsar tak chu mipui tana remchang a nihna piah lamah eizawnna ṭha tak siamna a ni. Sorkar hna pakhat siam belh pawh thil harsa a nih laiin a taima leh tiṭha duh tan chuan two wheeler taxi hi eizawnna ṭha tak a ni a, chhungkaw 3,000 chuangin eizawnna an neih phah angin a sawi theih ang.
Two wheeler taxi-te hian hmasawnna tur tam tak an nei a. Traffic rules zawm kawngah ṭan la thar se, traffic jam-a midangte zai ngaia kal thiam te, hmanhmawh vanga midang tlan pelh zung zung chin te, sorkarin a rate a bithliah aia chuan man sanga lakte pawh tih loh atan a ṭha ang. 
Tunah chuan Aizawl khawpui hi lirthei a tawt em avangin intlan­chhawk te a ngai ta hial a ni. Hetihlaia two wheeler taxi permit dang pe chhuak zawnga hmalak chu thil tih chi a nih tawh hmel lo a, sorkar pawhin hei hi a hria niin a lang.

Aizawl khawpui leh two wheeler taxi

Mizoram Chief Minister chuan, Mizoram leh Assam ramri buai chu minister leh chief minister level-ah chinfel tuma hmalak a nih thu a sawi a, harsatna awm zawng zawng chinfel vek a nih dâwn thu leh, kumin August thla tàwpah emaw, September thla tìr lamah emaw Assam Chief Minister nen an inbiak dawn thu a sawi. 
Assam-in kan ram min chuhpui avanga buaina hi a tawp hleithei lo a, boruak a dai deuh tihah khawi laiah emaw harsatna thar a awm leh ṭhin, a pawi ngawt mai. 
Mizoram chhung ni ngeia kan pawmah huan leh lo neitute an feh ngam lo a, kan ram chhungah Assam lamin kut an rawn thlak leh ṭhin. Ramri buaiah hian 'hnehtu' awm hleithei lo mah se a buai zawk chu kan awm chiang a ni. 
Tunah erawh Chief Minister berin harsatna chinfel tum a nih thu mai pawh sawi loin, harsatna zawng zawng chinfel vek a ni dâwn tih a sawi a, hei hi thil lawmawm tak a ni. 
Ramri chinfel turah hian khawi lai nge kan ramria kan pawm tur tih hi hriat chian theih ni se a lawmawm dâwn a, Mizoram sorkar cabinet meeting-in ramria a pawm chu kum 1875-a Bengal Eastern Frontier Regulation of 1873 behchhana ramri a siam kha a ni. 
Assam leh Mizo­ram Chief Minister-ten ramria inremna tur kawng an zawng hi thil lawmawm tak a ni a, Assam-a BJP sorkar leh Mizorama MNF sorkar hi NEDA leh NDA-a thawk dun sâ an nih bawk avangin inbiaknaah pawh thil a awlsam phah theiin a rinawm. Chutih rualin Mizo mipui, pawl hrang hrangte leh Cabinet meeting ngei pawhin kan ramria an pawm tlan 1875 ramri hi chu 'harsatna zawng zawng chinfel vek' tur zingah hian a tel ngei turah i beisei phawt ang.

Khawi ramri nge kan pawm dâwn?

YMA Central Executive Committee (CEC) ṭhukhawm chuan ruihhlo do pawl din leh an rel a, tun hnaia Aizawla YMA branch hrang hrang office bearer kal khawmte pawhin ruihhlo dotu tur pawl bik insiam hi ṭha an ti tlang a ni. 
Tun hnaiah Mizo­ramah ruihhlo a hluar a, tun hmaa ruihhlo tamzia kan sawite ai khan tunlai hian a tam zual niin a lang. Khawvel huap pawha ruihhlo hlauhawm, sim harsa em em, man to leh vang tak ni ṭhin heroine no. 4 chu tun hnaiah Mizoramah man tlawm te tein hmuh tur a awm. A man a tlawm mai ni loin lei tur a tam em avangin kan ṭhalaite a eichhe mek a ni.
Tunah hian a si ruk laa ruihhlo do kan kalpui lo a nih chuan kan hma lam hun hi a chhe zual dawn niin a lang. Hetiang hunah hian sorkar chak leh huaisen, taima leh thatho neih a chakawm ṭhin hle mai. Kan khawpui berah pawh kawngpui lunlaiah ualau taka ruihhlo an zuar ngam tawh chungin kan sorkar mi rawihte chuan an veng hneh lo hle tih a lang. Hetianga kan sorkar mi leh sate'n min veng hneh ta lo lutuk hian ngaih­tuah a tithui hle. 
Tunah chuan hlawh nei lo zawk leh a zir chhuak ve lo zawk, mi naran (layman) lamin ruihhlo do hna an kalpui leh dawn ta phawt a, tihsual leh tih dik loh a awm leh a nih pawhin a mak lo ang. Hetihlai hian tun hmaa an tihsual palhte hre rengin YMA hian fing tak leh fimkhur takin ruihhlo hi do thiam se a lawmawm hle ang.

Fimkhur leh fing taka ruihhlo do

Mizoram Police zingah ruihhlo leh a kaihhnawiha harsatna tawkte tan ni 45 awh tur Detoxification and Rehabilitation Camp buatsaih mek a ni a, camping-ah hian mi 334 an lut a ni.
National fund for Control of Drug Abuse aṭanga sum hmuh hmanga Mizoram Police-te'n an mi leh sa chhanchhuah ngaite puala hun an buatsaih hi an tiṭha takzet a, an dinhmun dik tak hre chiangin ṭha awm taka lang loin an ṭhat lohna leh chak lohna an pawm a, mualpho pawh pawisa loin police zinga ruihhlo leh zu ngawlveite puala camp an buatsaih ngam hi an fakawm hle a ni.
Zep thu a cheng lo a, police lâk dan aṭanga a dik tawh miau loh avangin ruihhlo ngaite leh zu-a tal buai sate pawh lâk an ni a, he mi piah lamah police ṭan hnua zu leh ruihhloa talbuai tam tak an awm belh bawk. Sualna do tur leh zu leh ruihhlo dotu tur zingah a bawiha tang sa eng emaw zat an awm avang hian sual do kawngah pawh an thawk chak tawk lo a, hna dang thawk tur pawha tlin lo police hi tam tham tak an awm sa reng a ni.
Mizoram Police hotute'n an fel lohna pawm a, an dinhmun zahpui loa chhanchhuah hna an thawk hi an fakawm a, sorkar hnathawk dangah pawh hetiang zu leh ruihhlo ngawlvei tam tak an awm tela chhanchhuah beihpui thlak theih ni se a lawmawm ngawt ang.

Intuaithar tum police an fakawm

Mamit leh Dapchhuah inkar kawngpui a chhiat lutuk avangin Mamita maxicab-te chu an tlan duh tawh lo a, kawngpui siam ṭhat a nih hma chu tlan loh an rel a, mipui hriatthiamna an ngen.
Chuhvel leh Saikhawthlir khawtlang hruaitute chuan an khaw paltlang Bairabi leh Zamuang inkar kawngpuia lirthei tlante phurh rih theih zawng bithliah turin thuneitute an phût bawk. He kawngpui hi singla lane-ah pawh rural village link road chauh a ni a, tun hnai­ah motor lian rit phur an tlan nasat avangin a chhe tawh hle niin an sawi. 
Mizoram hmun hrang hrangah NHIDCL chuan kawng­pui a siam mek a, fur a nih mek avangin heng kawngpuite pawh hi zawh hleihtheih loh a tam hle. Hetihlai hian state sorkarin a enkawl kawngpui ṭhenkhat chu chei mumal loh avang leh furpui a lo thlen bawk avangin zawh ngam loh a awm nual a, khaw ṭhenkhatah chuan khawtlangin hnatlangin kawngpui an siam ṭha mek bawk a ni. 
Kan ramin a zir lo a, ruah tui tlak tamna hmuna cheng kan ni a, kan lung a chang ṭha tawk loin tlang rama awm kan lo ni bawk nen kan kawngpuite hian mi ram kawngpui a tluk lo hi kan hrethiam tur a ni ang. Chutihlaiin tlang ram ni ve tho, keini ang bawka ruah tui tlak tamna rama kawngpui ṭha leh tlo zawk an nei thei erawh kan mithiamte hian zir chiang se a ṭha khawp mai. 
Mizoramah kawng­­pui chhia hi politics hmanruaah tak kan hmang tawh ṭhin a. Chumi hnuah kan tlawm­ngai pawl CYMA leh sorkar pawhin thawhhona thute an thlung a, kan kawngpui din­hmun erawh a ngai deuh reng. 
Engpawhnise kawngpui enkawl­ah hian hma kan sawn a ngai a, kawngpui nei chhe state nih reng bik loh dan hi kan hotu­te'n zawng se, ṭan han la teh se.

Kawngpui chhia leh Mizoram

Mizoram sorkarin Covid-19 dotu tura inpe volunteer-te lawmman te, Covid-19 hripui tuar enkawlna quarantine centre leh Covid Care Centre-a ei leh in man cheng nuai 96.30 chu sorkarin a la ba mek niin ZPM Ṭhalai chuan an sawi a, pe thuai turin sorkar an phût thu press conference-ah an puang. 
Mizoram sorkar hian sumah harsatna a tawk tih kan hre tlang a, chutih rualin a ngaih pawimawh lamah chuan kan state sum dinhmun nena inphu lo khawpin sum a seng tam ngam si ṭhin. 
Tun hnaiah health care hnuaiah sum ṭhahnem tak mai a la ba a, tunah Covid-19 dona atana mi inpete sum a la ba tih thu hriat leh, hripui tuar enkawltute ei leh in man a la ba tel tih hriat hian sorkar hi mipuiin an dem lo thei lo ang.
Sorkar hian sum a neih loh tak tak chuan insum ngaiah a insum ang a, inrenna tur thil dangah pawh a inren tur a ni a, chutihlaia pawisa ngah ber ang maia sorkar mi ṭhenkhatin an project khawih lenzia an tlangaupui lai meka hripui kaihhnawiha heti zat leiba a lo la nei hi a inhmeh lo hle a ni. 
Covid-19 kaihhnawihah Chief Minister's Relief Fund-ah pawh pawisa ṭhahnem tak thawh­khawm a ni a, hun rei tak chhung chu khawtlang leh kohhran hmunhma hawhin sorkar sum seng loin hripui veite khung khawm niin enkawl an ni bawk a ni. Chutihlaia cheng nuai 90 vel zet sorkarin a lo la ba reng mai hi chu sorkar ṭha zia niin a lang thei lo. 
Kan sorkar hian a leiba dang a rul thei lo a nih pawhin Covid-19 kaihhnawiha a leiba tal hi chu rul fel se, hripui dona tura mimal leh pawlin sum ṭhahnem tak a thawha an thawhlaia a sorkar berin hripui dona sum a lo la ba reng mai hi chu a fel lo hle a ni.

Covid-19 enkawlna leiba

Mizorama MPS leh IPS officer chawl tawhte leh tuna service mekte chuan tun hnai khan DGP hoin, 'Experience Sharing: Learning from Elders' hun an hmang a, police senior officer chawl tawhten an tawnhriat hrang hrangte sawiin police officer thawk­laite an fuih. 
Mizoramah hian hmasawnna hna te, inrelbawlna lam te, sorkar hnathawh dan kalphungahte a hre zawk leh a tawn hriat nei zawkte lo tih tawh kan ngai pawi­mawh thiam tawk lo hi a pawi a, thil tam takah chuan tun hmaa kan tih ṭhin thil ṭha kan chhunzawm loh avangin kan chhiatpui niin a lang. 
Tun hma ang diak diaka kal tur chu a ni lo chungin thil ṭha na nâ nâ chu chhunzawm thiam a, mahni senior-te thil lo kalpui dan ṭha chhawm nun zel hi thil ṭha tak a ni ang.
Tun hnaia police officer chawl tawhte a thawklaiten rawn nachang an hria hi thik finthlak tak a ni a, hetiang hian department dangah pawh tawnhriat nei thate hi rawn ṭhin se thil ṭha zawk a chhuak thei ngei ang. 
Tun hmaa tih ṭhin tih ṭul tawh lem lote pawh a awm ang a, tun hma aia kalphung ṭha zawk zaha mekte pawh a awm ngei dâwn. Chutih rualin tuna kan chhunzawm loh thil ṭha ni si a kal hmasate hnen aṭanga inzirna tur thil a awm ṭhin. 
Sorkar hna pawn lam leh pawl kan enkawlna thleng pawh hian kan inen léta kan inbihchian ngam fo a ngai. Tun hmaa CYMA leh MHIP kalphung leh tuna kan kal dante pawh khaikhin ngam ila, chutiangin zirlai pawl kan enkawl dante thleng pawhin mi hmasate hnen aṭanga zir tur tam tak a awm thei ang.

Tawnhriat nei rawn taimak

Chief Minister leh Home Minister hoin tun hnai khan Home Department hotute an inkawm a, Department hmasawnna tur hrang hrang an ngaihtuah. Thawktu indaih lohnate sawiho a ni a, hmasawnna ruhrel thawh mekte leh hmachhawpte an thlir bakah venhim hna tihchakna tura hmalak belh ngaite an sawiho a ni. 
Ram himna leh chakna tur hian Home department chak leh changtlung tak neih hi thil pawi­mawh tak a ni. Tun dinhmunah hian Home department hnuaiah thawktu indaihlohna a nasa hle. Police out post hrang hrang, check gate-te leh Battalion lamahte pawh thawktu an indaih loin post ruak hnawh khah loh tam tak a awm. 
Sorkar hian sum harsatna a tawk mek tih chu tlang hriat a ni a, heti chung hian Home department leh Health department lama hmun ruak hi chu hnawh khah dan zawng thei se a duhawm hle. 
Chumi piah lamah chuan Home department thawktu zingah zu leh ruihhlo avanga hna thawk mumal thei lo tam tham tak an la awm a, heng zinga mi ṭhenkhat hi hna an zawm hnua tal­buai an nih rualin ṭhenkhat phei chu police-a lak an nih hma aṭanga heng thila fihlim lo sa an ni hlawm a, police lak kan uluk loh hi nasa takin kan tuar mek a ni. 
Myanmar aṭanga ruihhlo leh smuggling thil lo lut reng te, Assam aṭanga zu leh ruihtheihthil dang lo lut rengte ven a ngai a. Ramri venhim a ngaih reng bakah tualchhungah police mamawhna a sang hle a, sorkar hian Home department hi chak zawkin thuam thei se a lawmawm ngawt ang.

Home department thuam chak ni se

Congress party-a an Vigilance Cell chuan tun hnaiah RTI Act hmanga an zawhna zawhte chuan chhan ṭhat a hlawh lo nia sawiin, "Chief Minister-in a duhsak zawngte thup a duh avangin RTI zawhna a chhang ngam lo," tiin an tarlang.
Congress party hian Mizoramin sum lamah harsatna a tawh mek laia contractor leh supplier an bill la chhuak zung zung thei bik an awm leh awm loh an hre duh a, Mizoram Treasury hrang hrang a cheng nuai 100 chung lam bill neite nihna leh an pawisa dawn dan kimchang RTI hmangin an zawt a ni. 
He zawhna hi Mizoram sorkar tan chhan harsa lo tak, a ziaka engkim awm sa vek a nih hmel a, chutihlaia rinhlelh tizual tur tinga an zawhna chhang chiang loa thawi deuha chhan a ni hi a chhan hriat a chakawm ta tawlh tawlh a ni. 
Hetihlai hian politics-ah hi chuan thil sawi duh dan hi a inang lo a, sorkar hian RTI Act hmanga zawhna hi a chhang ṭha duh lo tak tak nge a thuchhuahtu lam hian an ziak lei ko thiam zawk, tihte pawh zawhna awm thei a ni. 
Engpawhnise thil lang chiang tak mai chu a zawttu lam hian rinhlelh an nei a, chu chu a dik nge dik lo tih hriat chhuah an duh a ni. 
Kan ramin sum leh paiah harsatna a tawhlai mek hian sum la chhuak thei bik riau an awmin an hria a nih hmel a, hetiang zawhna chhang chiang ṭha duh lo sorkar kan hrawn a nih chuan, kan sorkar hian inenfiahna tur a nei ngei a ni.