India ram pumpui puitling zatve zet hi an fit tawk lo tiin The Lancet Global Health report chuan a tarlang. WHO-in mihring hrisel nana chet velna (physical activity) kan mamawh tawk a tih (recommended physical activity) hi kan pha lo tihna a nih chu.
Khawvel ram hrang hrang 195 zingah India ram hi hriselna atana chet vel tam loh dan tehnaah 12-na a ni pha hial a; che vel tlem ram kan ni tihna a nih ber chu.
Hetiang zela kan kal chhoh chuan kum 2030-ah chuan mipui 60% vel hi fit lo kan ni dawn a. Chuvang chuan natna chi hrang hrang - lung natna/heart attack, stroke, zunthlum, thisen sang, alzheimer leh cancer-te kan vei hma sawt dawn tihna a lo ni.
WHO chuan kar khat chhungin minute 150-300 tal exer (moderate aerobic activity) la turin min duh a. Ni tin minute 30-45 tal exer lak tur a ni. Zing lama exer la hman lo tan pawh tlai lamah emaw, mahni remchan hun hunah lak mai tur a ni.
ALZHEIMER'S DISEASE
Rih lutuk (obesity) leh meizûk hi Alzheimer natna thlentu langsar (key trigger) a ni. Alzheimer chu thluak natna benvawn, zawi zawia zual lam pan zel ṭhin hi a ni a; hriatna hloh, awm dan phung hriat lohna, rilru fîm hman theih lohna, ni tin hna leh tih tur tih theih lohnate a thlen a, harsatna nasa tak anmahni leh chhungte tan a thlen ṭhin.
Meizûk hian thisen zâm a tichhia a, chu chuan thluaka thisen supply a titlem a, thluakin thisen duh tâwk a hmuh loh chuan thluak timûr (brain cells) an lo chhe ta ṭhin a ni. Thau lutukna pawh hian kan taksaah insulin hnathawh a tibuai a, insulin resistance a siam a, chu chuan thluak a tichhe thei bawk. Heng avangte hian Alzheimer natna a thlen hma phah a ni.
The Lancet Medical Journal chuan hriatna hloh leh rilru fim hmang thei loa awmphung hloh natnate hi kum 2050-ah chuan a let thumin a pung dawn a ni tiin a sawi.
Thau lutuk pawh hian zunthlum leh lung natnate a thlen thei a, heng hi Alzheimer awm hmatirtu an ni bawk. Heng hian kan thluak hriselna an tichhia a, thluaka thisen zamte tichhiain hriatnate a hlohtir a, Alzheimer a thlen ta ṭhin a ni.
Meizial aṭanga a túr insiam 'nicotine leh tar' te hian thisen zâm an tichhe thei a, kan taksa pêng pawimawhte'n thisen an dawn tlem phah a, chu chuan Alzheimer leh hriatna hloh natna dang tam tak a thlen hmatir thei.
Chuvangin, heng natna lak aṭanga kan fihlim theih nan, nunphung dika kan nun a, ei leh in a tawk chauha ei a, taksa sawizawi hi kan tih ngei ngei tur a ni. Meizial zu ṭhin chuan sim a, a la zu ngai lo chuan tih miah loh tur. Tichuan, mithiamte'n pung zel tura an sawi Alzheimer natna kan pumpelh theih ang. Kan lo hriselin Pathian leh a kohhran tan te, khawtlâng leh kan chhungkaw tante hrisel takin rei tak kan ṭangkai thei dawn a ni.
- Dr J Lalramchhuanga,&nbsp; MD

- Dr J Lalramchhuanga

I FIT EM?

Kan sawi dan tlânglâwn angin, tuna kan sawrkar hrawn mek ‘ZPM Sawrkar’ chu kum chanve erh-awrh kan hmelhriat ta. Sawiselna ri pawh hriat tur a awm nual ta mai. A ṭhente phei chuan dâwt an hâl ral an ti. Sawrkar term khat hi kum 5 a nih avangin, an thusawi an tihpuitlin dawn leh dawn loh erawh la hriat theih chiah loh tam tak a awm ngei ang. Politics na na na chu, ZPM party a din tuk hnih tuk thumna lekah khan chanchinbuah sawiseltu a nei nghal mai ve hrim hrim a. Mipuite'n kan ngaihtuah tur leh kan hriat atana pawimawh ta em em chu, ‘Sawrkar sawiseltu chu tu nge?’ tih hi a ni ta ber âwm e. ‘Aigupta sa bel ngai phunchiar’ thawm te, ‘Zah thupna thiltih’ te leh ‘rorelna dik duha selna’ hi kan thliar thiam a ngai dawn niin a lang e.
Selna neuh neuh zingah hmunphiah hralh chungchanga selna kha keini ang, politics lam hrethiam pha ve lem lo, ram hmakhaw ngaia phak tawk tawka ngaihtuahna seng ve ṭhin te tan pawh beng tuna ngaihven loh theih loh thil a ni a. Amaherawhchu, khatih lai kha kan sawrkar tharin anmahni pual budget pawh an la pharh êm lova tiin mahni leh mahni kan lo inhnem lungawi ve thei mai e. Kum lokal leh turah erawh chuan Sawrkar monitor-a hmunphiah hralh a nih leh nih loh chík peih deuh kan lo awm a nih pawhin ‘Phunchiar’ tia indem lohvah kan ti ang!
Sawhthing mawlh mai hi, zuvaten zah an ngai ang a, kan thar ṭeuh dawn. Hralhna tur tiam (guaranteed) a nih hma khan quintal 100 (Ton 10) thar thei pa an awm nawk a. Rs. 50/- aia hniam lo tiam a nih hnua sawhthing ching kan pun nasat dan enin, Ton 100 aṭanga Ton 500 thar khua an awm fur thei mai awm e. Mizoram puma sawhthing kan thar zat tur hi ton nuai fe a ni dawn. Hei hi chu mipuiin ZPM kan thlan chhan lian berte zinga mi a nih avangin a thu a te thei lo. Kum 2025 ṭhâl chho aṭang chuan mipuiin sawhthing hi kan sawrkar tehna dâr mum khaiah an hmang tawh ngei ang, hmang turin right an nei kan ti thei bawk ang.
Open Tender leh Restricted tender chungchang hi erawh chu sipai bâng ka bo map. Tender tur chi leh tender ngai lem lo departmental work, party-a thawkrimte inhlawhfakna tur, TV pakhat man daih vel tur te hi a awm ngai emaw chu! Eng pawh ni se, restricted tender chungchanga selna awm kha chuan beng a verh ve ringawt a, ‘Hemi te pawh hi engah nge maw kan duh loh langsar tak kha an rawn tih ve mai chu le’ tih ngaihdan hi a piang tih zep thu a cheng lo ve. Mahse, a mawl thei ang bera ngaihtuahin ‘Vai contractor an pe’ tih thawm awm lo erawhin min thawi dam deuh tho tho e.
Eng pawh ni se, ZPM Sawrkar rual ruala, kuhva ro phurhna tura motor lei la thar ṭha tak tak, phurh tur a awm tak loh avanga zawrh an ni chum chum mai te, Electric man ba kan rul chak hle tih thawm te, Ration buhfai dik taka kalpui a ni dawn tih te, zirtirtu hna lak a fair hle tih te, zirtirtu transfer ah hlauh kan nei dawn lo tih thawm te, tin chu'ng te chu a taka kan han hmu deuh riai ruaite hian ngaih a tiṭha thawkhat viau e. Sawrkar hnathawkin hlawh ṭha taka an han la ta te hi thil lawmawm tak a ni. Sawrkar hnathawk hlawh hi kan ram economy pui ber a ni hial ang. Sawrkar hnathawk hlawh lak zarah dâwr te neiin hlawh a lo la ve a, chawhmeh zuar tuk khat hlawh a lo pung ve a, sumdawng lian leh te deuh zawng zawng bungraw hralh a lo pung ve a. Zêpnâk emaw, Kohhran thawhlawm chenin nghawng a nei lian hle. Sawrkar hnathawk hlawh hi kan ram economy khawih a nih avangin ngaihpawimawh tur dik tak a ni.
Kan rama thil ṭha lo deuh mai, term khat chhunga thutiam tihpuitlin hman loh hi intihhmuh atâna ṭha lo tak a ni. Kan ram Dânpuiin Sawrkar pakhat hnathawh hun chhung atâna a ruat kum 5 chhung hian thiltiam zawng zawng hi tihhlawhtlin vek tur a ni ang, tihhlawhtlin theih loh tur chu tiam loh mai a ṭha zawk ang. Tihpuitlin tam tak, thawh mêk tam tak, bul ṭan tam tak a awm tur a ni a, ‘Tum mêk’ hi chu hnathawhah chhiar chi a ni lo.
Eng pawh ni se, sawrkar sawiseltute hi tute nge? tih hi kan sawrkar pawhin en ran se la. Sawiselna hmun tura ngaih loh ‘Kohhran inkhawmpui Platform’ aṭang te, sawiseltu tura ngaih loh ‘Sakhaw Puithiam’ te au ngai lo turin fimkhur hle sela a ṭhain a rinawm. Tuna kan sawrkar dinhmun ni bera lang chu, thil lian tham an la tisual lo va, thil lian tham an tiṭha em em chuang rih lo a ni ber awm e. Rawngbawltu te pawh hi, hna em em thawk lo pawi em em pawh khawih lova awm mai mai, tu mah ti lungni lo lem lotu tan maha thil tangkai em em pawh ti chuang lo hian a awm theih a. Chutiang velah chuan kan sawrkar hi a thên khawtlai rei lutuk lo turah ngai ila.
Sawi leh sawi hnu, eng emaw chen hi chu siam rem a, siam ṭhat ngai chu a tam khawpin a rinawm. Mipui sum party mite sem dan tur ringawt buaipuiin kum 10 kan hmang liam zo chauh a ni a, hna lian tham thawk thei tura kan system her rem hi thil hautak tak a ni dawn a, mihring siamṭhat ngai tur mawlh mai hi a huphurhawm ang. Ziah puna sawrkar heu bawk, ziah tlema sawrkar heu bawk dan thiam riau te, tihṭhat dan aia tihchhiat dan expert tak tak, awmtir dan aia awm lohtir dan thiam fe fe, hna exama a endiktu ni chunga entawn ru tlat ṭhinte kha an ther fur emaw a ni awm si a. Eng pawh ni se la, Kalphung thar, mipui sawrkar hi beiseina sang tak neia thlangtu mipui ten uluk takin kan lo thlir reng dawn a ni.
- Rev. Jh. Za Hluna ( Paula Pû)

- Rev. Jh. Za Hluna ( Paula Pû)

SAWRKAR SAWISELTU CHU TUTE NGE?

Lehkhabu ziaktu: Zalianthanga,Tahan
Zalianthanga lehkhabu pahnihna Pholêng a rawn chhuak thei hi ka lawmpuiin ka chhuang hle mai. Tun ṭuma a lehkhabu pawh hi, chhiar a nuamin a bengvarthlak hle. Mizoram Publication Board Thuhma ziaktu, Board President Carol VLMS Dawngkimi thuhma ṭhenkhat hi han suan lut ila; “He lehkhabu hi article hrang hrang 34 zet dah khawmna niin bengvarthlak tak te, rilrua thu ngaihtuah zui ngai tak leh tlanglawn deuh tak te a ni hlawm a. Lehkhabu chhiar manhla tak leh ngaihnawm tak a ni,” tiin. He lehkhabu ziaktu hi a nihlawh hle a, a lehkhabu hian khaw eng a hmuh theih nan Mizoram Publication Board-in an chhutsak a ni.
He lehkhabu hi phek 229 a chhah niin India pawisain cheng 200 a zawrh a ni a, Tahanah erawh k. 7000-a zawrh a ni thung. Cheng thlengna rate-a chhut chuan Tahana lei a hlawk fe zawk.
He lehkhabu hi chin pawr ka tum lova ka thiamnain a phak hek lo. Keimaha awm, thusawitu sawi a ṭhen azar ka ziak chhuak mai chauh a ni.
Thuziak a dah hmasak ber hi, ‘Mizo Bible Ṭawngkam’ a ni a, Bible hi a chhiar nasa mai ni lovin a chik a, a chhui peih bawk tih hi a lang chiang hle. Ṭhangthar zawk te tana Bible thu hriat thiam harsa deuh tur te lehlin thara an thlak danglam dan te min kawhhmuh nasa hle. Entir nan: Mt 5:15, ‘Miin khawnvar halin hrai hnuaiah an dah ngai lo’ tih chu, ‘Miin an khawnvar chhit chu khovin an khuh ngai lo’ tih te, Tirh 20:12, ‘Thlamuan namenin an thlamuang ta lo va’ tih chu, ‘An thlamuang ta em em a’ tia thlak a nih dan leh Mizo Bible lehlin tan dan thlengin min hrilh dap bawk.

Kohhran pakhat leh pakhat kan ṭawngkam hman duh dan chu sawi loh Kohhran pakhat chhunga mi te pawh kan ṭawngkam hman duh dan a inang vek kher lo a ni tih chu ‘Lalpa ṭawngṭaina’ thuziak chhiar hian a hriat theih. He thuziak hian Lalpa ṭawngṭaina lo chhuah tan dan a chhui nasa hle a, bengvarthlak leh manhla tak a ni.
Mihringte hi kan tlakna mual azirin kan ṭawng hman a dang a, kan thil lam a hrang daih bawk. Kawl phaia cheng Zofate hian Mizorama cheng Zofate thiam ve loh Mizo ṭawng hi kan thiam tam hle a ni tih chu i hriat duh chuan KAWLRAM MIZO ṬAWNG hi chhiar la, chu tah chuan, Sin Pi, A Kaih lo, Lan Siauh, Law Law Se tih te leh a dang tam tak a lo lang uar uar mai ang. A dang chu i chhiar zawm atan le!
Sayama (Zirtirtu hmeichhia tihna–Miss) Ringi’n a pa Rev. Vulchuka hriat reng nana ‘Rev. Vulchuka literary award’ a buatsaih ṭum khan, kum 2012 chhuak Myanmar Mizo chanchinbu hrang hrangin an tihchhuah thuziak ṭha bik pathum an thlan chhuah tuma runner up dinhmun hauhtu chu, ‘Welcome to chiauau’ hi a ni. Chuvang chuan he thuziak hi a ṭha lo thei lo va, chhiar a nuama a zang khai bawka chhiar loh atan chuan a uiawm mah mah.
HK Vanlalbela’n a thian kawmngeih em em, Laikunga hriat reng nan thu inziaksiak buatsaih a duh chu, Tahan, Young Mizo Literature Club-in a buaipui ta a. Thupui atan Thian ṭha thlan a ni a, chuta lawmman pakhatna a lakna thuziak ‘Ṭhian ṭha’ a rawn telh hi he lehkhabu tihlutu zinga mi a ni ngei ang.
‘Han nui leh la’ tih hi a original-ah chuan ‘Nui ve teh’ tiin a dah a. Biakkima hla ‘Han nui leh la’ (D loh D Album-a Pachhunga Khiangte sak)-in a lung a len zawk nge maw ni dawn ni a thupui a thlak a, a mawi viau mai. A enga pawh chu ni se, a chhung thu a thlak lo hlauha a lawmawm tho. He thuziak hi chanchinbu-a tihchhuah a nih tum khan Tahan parawn nih tling tak pakhat chuan, “He thuziak hi chu eng chanchin bu atan pawh, tihchhuah atana iaiawm loh a ni,” a tih kha a ni a. Sawi mai aiin a ṭha a, a chhiar lo tan hriat chi a ni lo.
A kam chhuak aṭanga mi te sawiselna leh dèuna thu tichhuak ve ngai lovin ‘Fak lo thei ka ni lo’ tih a ziak hi a ziah awm hliah hliah a ziak a ni. He thuziak chhiartute hian nunpui hram se, tih hi ka duhthusam a ni. A chhung thu hi la chhuak ila, “Kan ṭhianten thil an tihṭhat a, an tlin lohna sawi ai chuan an thil ṭha tih kha sawipui ta ila, kan hlim tlang zawk thei ang,” a tih leh, “Thih hnua infak aiin damlai ngeia infak hian lukhawng a nei zawk mah awm e,” a tih te hi a va ṭha teh lul em. Hei erawh kan hriat tel atan min hnutchhiah, “Infak derna kan tih, hmai hmachhawna infak leh infak ar ek hi a awm thei,” a tih pawh hi hriat tel a ṭha khawp mai.
Zalianthanga thuziak ka chhiar tawh zinga keimaha tla na ber chu, “TU NGE KA NIH” tih hi a ni. Hring nuna harsatna tawk mek te khai chhuahna thu ziak a nih avangin ka ngainain ka duh khawp mai. He thuziak i chhiar hun chuan i nun pawh a siam ṭha ngei ang.
Phone-a kan biak zawh apianga lawm thu min hrilh ṭhintuin “LAWM THU MAWLH HI” tih a ziak hi a inhmeh mang e. Tin, ama tuina “Ecology” a ziakte hi zir tham a tling a ni.
Mizo ṭawnga tui em emin “Mizo ṭawng mawina leh danglamna” tih min hlui hi kan nihlawh mang e. Amaha awm, a thulkhung pawh a thahnem tawh nen lehkhabu 10 meuh rawn belhin a ziak hi a rin tlakin a va ropui teh lul em! Chu mai a ni lo, “Zo hnahthlak ṭawng inlaichin dan” tih chu, thu lakna 21 meuh tar chhuaka a ziah hi zir tham a tling a ni e.
Tin, sawi kim sen a ni lo. heng bak hi chu a bu chhunga mi chhiar ve tawh mai rawh u!
- T. Lallawmzuala, Tahan

T. Lallawmzuala

Lehkhabu thlirna : PHOLÊNG (Zofate hmathlir)

Tun ṭum chu Finance Commission (FC) nihna han sawi ve hrim hrim ila, Mizoram tana a ṭangkaina chu kan hre mai awm e.
Sawrkar Laipuiin tih tur a hmachhawp, mipui aṭanga rawtnate khawn khawma hna thawk tur, Finance Commission Chairman, Niyi Aayog Vice Chairman lo ni tawh Arvind Panagariya kaihhruaina Finance Commission 16-na chuan hna an ṭan tak tak ta e. FC hnuhnung ber, Chairman chhiar tela member 5 awmna nikum December thlaa din chuan 2025 October thla hian an rawtna (recommendation)te theh lut hman tura beisei an niin, an rawtnate chu April 1, 2026-a inṭanin kum nga chhung a nung ang.
1. Eng chu maw FC chu?
Finance Commission (FC) chu ram danpuiin a siam ngat taksa (constitutional body) nei niin Sawrkar Laipui chhiah (tax revenue) ) khawn sa, Centre leh State Sawrkarte insem rual theih dan tura rawtna siamtu hi a ni.
2. Engtin nge FC hian thu a tih thlûk ṭhin?
State zawng zawng tana a pum puia Sawrkar Laipui net tax revenue State-ho chan tur a hlawma pek (vertical devolution) leh chung sum (fund)-te State-ho zinga sem sawm leh dan tûr (horizontal distribution)te rêl a ni. Hetianga sum, State-te sem 'horizontal distribution' a nih hian Commission chuan dan naranin State-a mihring awm zat te, inthlah pun chak lam te, sum lak luh zat te, ram leilung awm dan leh a dangte behchhanin a rel ṭhin a. A hmasa zawk ang chi vertical devolution-ah erawh chuan tih dan phung (formula) mumal tak behchhan a awm lo thung. Mahse, tun hnai FC-te chuan State-te chu tax revenue lian zawk pek an rawt a, FC 13-na, 14-na leh 15-na chuan Centre chan atan sum hi 32%, 42% leh 41% ṭheuh a rawt a ni. Scheme ṭhenkhat atan Centre leh State-ten an thawh dun ṭanpuina 'additional grants' hmangin State-te a ṭanpui thei a ni tih hi hriat a ṭha hle.
Finance Commission 16-na chuan tualchhung ro reltute–panchayat-te leh municipality-te chhiah (revenues) tih pun dan tur rawt/rel tura beisei a ni. Dik tak chuan, kum 2015 khan India rama mipui tana sum sen 3% chauh hi tualchhung ro reltutena an hman a tana sèn ral a nih laiin ram ṭhenkhat, entir nan, China angah te chuan mipui tana sum sen chanve zet hi tualchhung inrel bawl nana hman a ni thung.
3. Engati nge Sawrkar Laipui leh State sawrkar inkarah inhriat thiam lohna a awm ṭhin le?
Sawrkar Laipui leh State-te hi hun eng emawti chhung chu chhiah (tax) insem chungchangah an inhmu thiam lo ṭhin hle. Chhiah tam zawk, entir nan- income tax, corporate tax leh goods and services tax-te a la khawm a, chutih laiin, State-te chuan GST huam phak loh zu leh tui alh thei (fuels) an hralh aṭanga chhiah lak kawmah an innghat deuh ber thunga; Chutih laiin, State Sawrkar-te chu zirna (education), hriselna lam (healthcare) leh dan leh hrai ken kawhna lam (police) tel vekin State Sawrkar-te hian an khua leh tui/miptuite tana hna an thawh hi a tam em em mai si a ni; hei hian State Sawrkarteah lung awi lohna a thlen a ni. Centre chuan State Sawrkar-te chhiah khawn theihna chanvo (thu neihna) ti hniamin, an mawh phurhna a tam ang huin sum leh pai a pe si lo a ni.
4. Centre leh State-te inrem lohna chu engte nge ni?
Chhiah khawn sa aṭangin zaah eng zat nge State-ten an chan ang tih leh a tak taka sum leh pai pek zat chungchangah Centre leh State-te hi an innghirngho fo mai.
State Sawrkarte hi Centre aia mawh phurhna nei tam zawk an nih avangin, State-te chuan FC-in a pe tura a rawt aia tam bi State-te hian sum an hmu tur a ni, tih hi an ngaih dan a ni bur mai. Tin, tuna State-te chan (share) hi a tlem lutuk ṭhin bakah, Centre hian FC-in sum leh pai sem tur a rawt ang zat hi State-te a sem (share) lo tih an sawi bawk; entir nan, mi thiamte (analysts) ngaih dan chuan, tuna kal mek Fifh Finance Commission hnuaia State-te insem theih tura ruahman sum-pai (divisible pool) hi Commission rawt zat dik tak chawh ruala 41% pe lovin 38% a pe zawk a ni.
Chubakah, chawh rualin, Sawrkar Laipui tax revenue pum pui aṭangin eng zat chiah nge State-te sem theih tura ruahman (divisible pool aṭanga State-te pek ṭhin aṭang hian) tih chungchangah State-te chu an lung awi lo hle bawk a ni.
Chubakah, kum ṭhenkhatah, insem (share)chi an nih loh avanga State-te sem (shared) ve loh chi cess leh surcharge chu, Sawrkar Laipui tax revenue pum pui aṭanga zaa 28% lai a ni a, hei hian State Sawrkarte tan chhiah hlohna (revenue loss) a thlen phah nia rin a ni bawk. Chuvangin, FC-te rawtna anga insem chi sum bawm aṭanga sum-pai insem lo pung zel pawh hi cess leh surcharge lâk khâwm lo pung ve zel hian a nih ang tur a nihtir thei lo (offset) ve thei bawk a ni. Dik tak chuan, Sawrkar Laipuia chhun luh cess leh surcharge-te han chhût hian, Centre tax revenue pumpui aṭanga State-te chanvo chu Finance Commission 15-na hun lai khan zaa 32 thlengin a tla hniam thei ni-a chhût a ni.
State changkang leh hma sawn zawka ngaih Karnataka leh Tamil Nadu-te pawhin chhiah (tax)an chhùn luh aia tlêm daih zâwk sum-pai pêk an ni ṭhin chu an lung awi lo hle a ni. Tamil Nadu State hian Sawrkar Laipui sum bâwm (exchequer)-a chêng khat an chhûn luh apiangin pawisa 29 chiah pek an ni; chutih laiin, Bihar State-in cheng khat an chhun luh apiangin cheng 7 aia tam an hmu ziah thung si. Kawng danga sawi chuan, State sorkar hma sawn leh inawp ṭha tam zâwkte chu inawp ṭha lote ṭanpui nan Sawrkar Laipuiin a hrem a ni, tia sawi a ni. Mi ṭhenkhat chuan, Sawrkar laipuiin a ruat Finance Commission member-te hi an independent tak tak thei loin politik thu neihna lakah an fihlim tak tak thei loah an ngai.&nbsp;
- Dr J.T.Vanlalngheta