Kan Ral Mek

Keini ang thiamna leh hriatna tlachham, cooker leh dekchi bêl bak chhuan tur nei ve lo, Kristmas ruai sa bak sa hmeh ve ngai lo pawh hian kan ṭhalaite nuna ruihhloin bu a khuar nasa ta lutuk hi mutmawh hnarmawhah neih loh rual pawh a ni ta lo. Rilru a nâin a rûm vawng vawng mai a ni hi. Bawhchhiatna fa hrin hi a famkim thei lo va, fel lohna silhpuan inbelin, rinawm lohna pheikhawk kan bun a, hlemhletna kawrchung hain, mite hmaa dikna tiang lek ṭhin pawh hian mite nun kan teh a, mi nun sual kan vei a, kan sualna leh ka u kan nau, kan fate sualna erawh kan en liam thei a. Mahse, kan ni tin nun hman dana erawh kan pal luih, ruihhlo avangin kan nun a ral mek a ni hi.

Kan tuihalnain min chhâwk zo lo va, kan zawng a, kan dap a, kan ti a, kan ral zel si. Mi ṭhenkhatin kohhran inkhawm leh committee, programme tam lutuk hian khawtlang inrelbawlna a tiṭhuanawp a, YMA pawh a duh angin a kal thei lo, tih ri hriat tur a tam ta khawp mai. YMA hi kohhran fa hrin a ni a, kohhran hi YMA pa a ni, a zai a ngai tur reng a ni. Hetiang khawpin kohhranin programme a nei chung pawhin heti hi kan ni a, tun aiin kohhran inkhawmte hi tihtlem ni ta se la, kan ṭhalaite nun hi a bâwrâw zawk ngei ang.

Kan vêla buh lak tur tam tak an hmin ta. A ât turin kohhran leh khawtlang a pên chhuak a, a zualzapui vailenhlo tih ang mai, ṭhalaite nuna sualnain bu a khuar lian tulh tulh a. Engtia hmalak zel tur nge ni ang? Heng ruihhlo zuar khaw tin, veng tina kan kawl mekte laka hian kohhran hian action la ve tawh se la, an chunga thununna tiang lek ve tawh se la, kan ziaawm phah ang em? YMA te pawh hian ensan ve mai se la, hma kan sawn zawk mai lo vang maw? Heti ri ngawt hi zawngin kan hnam hi a ral tak tak dawnin a lang ta.

Kan ram leh hnam hmel a bâl ta lutuk em mai, nangni mi fing ngawi hle hlete u, au chhuak u la; nangni mi fel kuangkuahte u, in bân rawn phar chhuak ve teh u. Mimawl zawkte au aw hi hria u la, mi remhriate rawn pen chhuak mawlh teh u.

Kan hnam ram mek hi in thlir liam mai mai dawn em ni? Kan ram leh hnam hi a dam lo asin. In chhungkua in rel fel avangin duh tawk mai suh u; mi fel lo zawkte kawng dik kawhhmuh turin Lalpa’n in koah mawhphurhna a nghat asin. Missionary châwm nan in sum tam tak in pek ṭhin kha ring lo mite ringtua siam in duh tluk zetin kan ṭhalaite nun, Krista tluksantu te, khupzawi, bân uaithlate tungding turin Lalpa mite’n hna an thawh theih nan, kan hnam tan hian in sumte han chhung lut ruih ruih ta che u. Chu chuan ngawlhveite a chhan chhuak ang a, vana in lawmman tur chu a va ropui dawn em.

Aw le, harsatna kara beidawngin kun mai lo ila. Ni a tla a, a pil hlen ngai lo angin, kan ram, kan hnam tan hian a êng zawngin i thlir tlat phawt mai teh ang aw.

- Zothansanga, Chhiahtlang Kawnveng. 9612333536.