Kumina Union Public Service Commission (UPSC) exam result chhuakah, kan state (Mizoram) aṭangin pakhat mah kan tel lo va, pawi an ti hlawm hle a, zahthlak hlea ngaite pawh an awm. Kan education system leh kan taimakna thlenga sawiselte pawh an awm bawk.
He ziaktu erawh hi chuan, pawi ka ti lo va, ka zak bawk lo. Mizoram State-in kan hloh a awmin ka hre lo. Indian Administrative Service (IAS), Indian Police Service (IPS), Indian Forest Service, etc te hi mipui hna min thawhsak tur leh rawng min bawlsak tur (public servant) te an ni a, chu vangin tlingte zingah kan state aṭangin an tel lo a nih chuan, state dang aṭangin mi an lo kal ang a, hna min lo thawhsak ang a, rawng min lo bawlsak mai ang chu, an chunga thuneitu politician te kan nei tho a lawm tih ngaidan ka neih a, rilru hahdam takin ka awm a, ka zing thingpui in ṭhin pawh ka ṭhlulh hran lo.
Colonial hun lai khan, anmahni, United Kingdom (UK) rama Crown Civil Service an tih kalhmang zulzuiin, India ram tan Indian Civil Service (ICS) an siam a. Colonial hun laia ICS-te kha British mite vek an ni ṭhin. Colonial hun lai a ni bawk a, chu vangin India mite chunga intih milen dan pawh an thiam hle. An milian hle reng bawk. Colonial hun tawp lamah India mi tlem te ICS-ah an dah a. India miin ICS a han ni chu, Sap ICS-te inti milian thiam ai pawhin an inti milian zawk zia sawi te a awm ṭhin. A dik ang. India-ah chuan tun thlengin VIP, VVIP hnamzia kan la vawng nung hi maw. VIP Ration Card te pawh a awm kha maw!
India-in zalenna a hmuh hnuah erawh chuan, ICS tih ṭhin kha IAS tia thlak a ni a, service dang tam tak siam belh a ni. Khawvel ram tam takah erawh chuan, central leh state service hna nghet (security of tenure) system siam chu ṭul lova milian (bureaucrat) tihpunnaah an ngai a, an siam tawh hlawm lo. UK ngeiah pawh Crown Civil Service member chu tlem te chauh an awm tawh a, civil department bik chauh an enkawl tawh a ni awm e. Line department-tea thawk tur chuan, an line-a thiamna nei mithiamte an la zel tawh. Indiaah erawh chuan, central service leh state service te hi engkim thiama ngaih an ni chék a ni ang chu, civil department-ah chauh lo pawh, line department-ah te thlengin thawhtir an ni. Hei hi kal dan ṭha ber leh ṭul berin a lang hran lo.
Central service leh state service officer hna nghet (security of tenure) kalphung hi a awm lo a ni pawhin kan kal thei tho ang. Entirnan, Public Works Department (PWD) ah hian Director hna chauh ni lovin, Secretary hna thawk tur pawhin, engineer senior-te aiin IAS, MCS leh Central Service Cadre dangten an hriat zawkna tur thu leh an thiam zawkna tur thu a awm lo.
A nihna takah chuan, PWD Secretary hna thawk tur chuan, Bachelor of Engineering (BE) kum 4 zir zawh hnuah, internship kum khat tia, chumi hnuah engineer leh PWD admin hna kum 30 thawk tawh chuan, Bachelor of Arts (History Honors) aṭanga IAS tling a, thla eng zat emaw training neih a, kum eng emaw zat service neitu ai chuan, engineering hna leh admin kalpui dan tur a hre zawk em em ang. Chutiang bawkin, Health Secretary hna thawk turin, Bachelor of Medicine, Bachelor of Surgery (MBBS) kum 5 zir zawh hnua internship kum khat ti a, Doctor leh Hospital enkawl hna kum 30 thawk tawh chuan, Bachelor of Arts (BA general) a zawh hnua Mizoram Civil Service (MCS) tling a, thla eng emaw zat training neih a, service kum eng emaw zat neitu ai chuan, Health Department kalphung leh kalpui dan tur a hre zawk ngei ang.
Chuvangin State thuneihnaa tih theih a nih chuan, director chauh lo, secretariate-a secretary hna thawk tur pawhin, anmahni line ṭheuha mithiam leh senior-te aṭanga thawhtir zel ni se la, hmasawnna a awm thei zawk phian mai thei. Danin a phal chuan, Deputy Commissioner (DC) hna pawh hi IAS leh MCS ni loten an thawh theih lohna tur chhan a awm lo. Prime Minister, Chief Minister, Chief Executive Member hnate an thawh thiam chuan, DC vel hna te hi chu an thiam lohna tur a awm lo.
Central service-a tling kan awm lo avangin sun reng tawh suh ang u khai. Sawrkar hna a ni mai a, ram hmasawnahte chuan sawrkar hna hi chu mi tam zawkin an thlan duh ber hna a ni hran lo. Mipui tam zawk chuan mahni private business – company, factory, industry, etc te din an duh zawk daih. Chutianga private business din thei dinhmuna ding lote pawhin an zirna leh an thiamna hmangin private company, etc tea thawh an duh fe zawk a ni.
Chuvangin, state sawrkar meuhin ṭhalaite central service tlin theihna tur ngaihtuah a, coaching te buaipui a, scholarship te pek hi tih tawh loh a ṭha. Central servicea luh duhte chu anmahniin zir se la, coaching te kal se la, an in-exam ve mai tur a ni. Kan ṭhalaite lehkha thiam thei an tam tawh. Tling an awm chho zel mai ang.
Kohhrana “Central service kan tlin theih nan” tia ṭawngṭai thupui thawh ṭhinte pawh hi, Chung lamin engtin nge a ngai ang tih te ngaituah chian a ṭha hle. Central service tlin theihna tura ṭawngṭai ai chuan, kan ṭhalaite Pathian hriatna leh ṭihna nei a, dikna, rinawmna, thianghlimna, hmangaihna, finna leh taimakna nun an neih theihna turin ṭawngṭaisak zawk ila, Chung lam a tilawm zawk phianin a rinawm.
Central service-a kan ṭhalaite an lut ṭhin chu a ṭha. Lut an awm lo a ni pawhin khawvel tawpna a ni hran lo. Kan hloh a awm lo va, kan zahna tur chhan a awm bawk lo. An tlin chuan lawmpui ila, an tlin loh pawhin i pawm mai ang u. India mipui nuai 140,000,000,000 (1,400 million) te compete tur chuan, Mizoram mipui nuai 11 lekte tan chuan a hautak hle bawk a ni. Chuti chung pawh chuan kan ṭhalai lehkhathiamte an tling chho zel mai ang.
Central service leh state service te aia pawimawh zawk a ni lo pawhin, a tluka pawimawh leh ṭangkai chu, mahni line ṭheuha mi thiam, professional ṭhalai tam tak an chhuah hi a ni. Chutiang chuan state, national leh international private company, etc tea thawktu kan tam ang a, chhungkua, khawtlang, ram leh Kohhran tan malsawmna thlenpuitu an ni ang. Delhi leh state dangtea Mizoram State aṭanga central service cadre-te an awm chu kan state mite tan an ṭangkai ṭhin ngei mai. Chutih laiin, an awm lo a ni pawhin, kan tih turte chu kan ti thei tho ang.
Central service hi kan pathian biak palh ang tih a hlauhawm hle. Cenrtral service hi hna ṭha ber leh hna rôpui leh sang berah ngai tur pawh a ni bik lo. Sawrkar hna (public servant) pakhat a ni ve mai. Central service lo pawh hna ṭha leh ropui tam tak a awm tih hriain, kan ṭhalaite fuih phur ila, India state dang leh foreign hospital, university, bar council, hotel, airline, tourism, information system leh company dangtea professional thawktu ṭha tam tak nei zel turin hma i la ang u. Chutiang professional hna leh hna dang thawk duh loh leh thawk thei lohten central leh state service-ah te luh tum se la, an tlin chuan a ṭha hle bawk. An tlin loh pawhin a pawi lo. Beidawn tur a ni lo.
Hna zawng zawng hi a ṭulna leh a hlutna a inang tlang a. Hna ṭha zawk leh chhe zawk emaw, hna lian zawk leh te zawk emaw a awm hran lo. An pawimawh vek a, a pawimawh ber chu, eng hna pawh ni se, Pathian hre reng a, Amah ṭihna nen dikna, rinawmna, thianghlimna leh hmangaihna nunte nei chung a, taima tak leh fin taka thawk a, kan mawhphurnate hlen ṭheuh hi a ni. Chutianga thawktute chu ramina a mamawh thawktute an ni.
- Laiu Fachhai

- Laiu Fachhai

CENTRAL LEH STATE SERVICE CADRE-TE An awm loh pawhin kan kal thei

Kum 1987 khan Mizoram chu amahah inrelbawl theiin State nihna pek a ni. Kum 2023 kan lo chuang kai ta a, karei maw, Party pahnih Congress leh MNF hian min hruai chhawk ngat ngat a, an pahnih hian an chhe lailet deuh kan ti lo va, mahse State hmasawn lo ber zinga min dah reng avang hian chîk zawkin han luhchilh dâwn teh ang hmiang.
A hmasa berah chuan Sem Policy hi a ni. Congress hian mipui rilru sukthlek hi an man tlat a, rangva sem aṭang tawh khan a thlawna sem hi mipui rilṭam hian an hnàwl phal lo tih an hria a ni. An insem tling zel a, hnathawh chhuanawm sawi tur an neih tam loh pawhin NLUP hmanga pawisa sem an tlinpui a ni. Congress an rawn lal nawn theih leh chhan kha Pu Lal Thanhawla kan duh em em vang niin a lang lo, NLUP Ṭha Mi an tiam vang a ni. NLUP hnuaiah chuan cheng Nuai 1 tawp an han sem chu kum 2013 Election khan Seat 40 zinga 34 an la thei a ni. Congress ṭhatzia kan sawi chuang lo va, an chak em em chhan chu Sem Policy vang a ni.
MNF an harh chhuak chiang hle a ni. Kum 2008-ah MNF an tla, a kum 2013-ah chuan tho leh ngei ngei turin an inngai awm si a. Mahse a lo ni awzawng si lo. Kum 2013-ah MNF chu kum 2008 aia chiangin an tla a ni. MNF an tlak hian an tlak chhan an zir chiang a, Congress aia an chhiat vang aiin Congress-in Nuai 1 an sem vang a ni tih an hmu chhuak. MNF chuan Money Game chu an rawn play ta chiah a, Sem Policy lamah zuangin Nuai 3 an tiam ta hem hem mai a ni. Pi Zoramthanga phei chu a sawi uar khawp a, 'NLUP dawng tawh zawng zawng pawhin an dawng vek ang,' tiin SEDP hnuaia Nuai 3 sem tur thu a sawi. Nuai 3 hnar phal lo Mizo mipui rethei te te chuan a hmaa kum 2008 leh 2013-a an lo hnawl hnu MNF chu an pianthar em em pawh an hre miah lo chungin 'Nuai 3 min pe dawn si' tiin an han vote ta sup sup a. Karei maw, kum 2013 inthlana Nuai 1 vanga chiang taka tling Congress chu MNF Nuai 3 chuan a vaw hlum a. MNF chu hneh takin an tling ta a ni.
MNF chuan ro an han rel ta a, chhuanlam tur tingin Covid hripui a lo leng bawk si nen, pawisa an indaih thei lo. Sorkar hnathawk hlawh an pe thei mang lo va, thla chawhnu lamah an pek chang a tam a, kan finance minister ber Pu Zoramthanga lah chuan, 'An hlawh tur a kiam chiang lo, thla tir leh thla tawpa dawn a danglam lo,' a lo ti tawp mai. Thla tira in luah man pe ṭhin, dawr luah man pe ṭhin, school naupang fee pe ṭhin, loan rulh ngai chu an buai map map a ni. Sorkar hnathawk vawi tam tak an inhmukhawm tawh hial a ni hlawh lâk tlai an ngaihtuah tel ṭhin a ni. Pawisa awm lo awm lo an ti a, a Health Care System hnuaiah vaibelchhe tam tak an ba ṭun a ni. Health Care pawisa ba rulhna tur hian Asian Development Bank aṭangin pawisa an puk an ti bawk. Ba rulhna tura an bat belh chuan a buaithlak a ni. Pawisa awm loh lai hian Kamrula an tih Kamlova Chhangte inti chuan vaibelchhe chhe tel telin contract a thawk char char thei a, Lengpui Airport cheina hnathawh chu document fel hma hmain a lo ṭan fel der tawh. Mi tam tak chuan Kamrula hi a hnathawktu tak tak a nih an ring lo va, a phenah hian thil tithei tak mai- Kamrula hminga hnathawk a awm an ring, Social Media lamah phei chuan hre chiang inti tak tak Kamrula tak tak zawk sawi chhuak an awm a ni.
An intiamna Cheng Nuai 3 sem chu an thei dawn ta lo. Pu Robert Romawia khan MNF-in Nuai 3 an sem theih thu a sawi a, ṭawng uchuaka a sawi tel chu- a semna tur hre lo chu mawl a ti. Tunlai hian SEDP an sema an sem zat chu Cheng 25000 a ni. SEDP dawng hmasa tawh pawhin an dâwn leh hian Rs 50000 chiah a la ni. Congress sem chanve lek a ni. An intiamna chu cheng 250000 in an la phak lo a ni.
Kum 40 a ni dawn tawh, State kan nih hi. Party 2 hian min hruai pawh a ni tawh lo va, min hrual tawh a, kan hmasawn chak lohzia chu kan hmu a ni. ZPM hi an ṭhat em em chu ka zuk hre thûk lo va, ka sawi ve theih chin chu ZPM hi vote ka tum a ni. ZPM Candidate neih ṭhat leh ṭhat loh pawh ka sawi dawn lo, mawlmang tak hian ZPM an nih chuan vote tawp ka tum chhan chu- mi retheite retheihna hmangin vote an zawng a, inthlan a hnaih ve leha SEDP an sem hi ka ten a ni. Congress hruaitu zingah 'Vawk chaw pek hun ka hria' ti an awm an ti a, heti em em hian mipui min zah loh avang pawh hian hruaitu thlak hi ka duh. ZPM hi an ṭhat loh phei chuan BJP leh AAP pawh ka vote tawh mai ang. Kum 1987 aṭangin hruaitute min hruai dan hi chu ka hmu chiang tawh. Tun aia sang hi beisei thar thut tur ka hmu ve lo. ZPM hi a thlakna atan tun ṭum chu ka vote dawn a ni.
- Lalliansanga

- Lalliansanga

Kum 40 dâwn min hruaitu Congress & MNF

Tlang rin loh tak maia Congress Treasurer aṭanga bang thut Pu Zodintluanga ban chhan lehkha kha ka lo chhiar a, Congress hian insiam ṭhat an mamawh tih a lang a ni. Congress MLA chhuanvawr ber, 2008-a an sorkar hma pawha 2003-a MLA ni tawh a ni a. Congress tlak runpui 2018-ah pawh tla ve lo Pu Zodintluanga Treasurer aṭanga a bang hi a mak khawp mai.

Pu Zodintluanga ban chhan kha a tawi thei ang ber hian dah tum ta ila, Party Leadership ah rinna a nghat lo tihna a ni. Pu Lalsawta kha Party dan kalha che ṭhin tiin a puh. Pu Lalsawta kha dan pawisa lo, ama duh dan dana Party hruai angin a puh. Pu Lalsawta kha a thawhpuite rawn lova decision siam ṭhin niin a puh. Pu Lalsawta kha OB pui ngei ngei pawhin an hriatpui loha decision siam ṭhinah a puh a ni.
Khi'ng puhna zozai khi a dik leh dik loh kan hre phak lo nachungin MLA meuhin MLA ni ve lo, President ni mek hnena banna a thehluh chhan lehkhaa ziah lan a nih avangin dawt a nih a rinawm lo a, dawt ni ta se a bang duh dâwn bikin a lang lo a, Pu Zodintluanga banna lehkha en mai hi chuan Congress hi lian takin a phel a ni. Congress chhungah Pu Lalsawta Leadership ring lo an tam hle tihna a ni. Pu Lalsawta hi dikna duh tak niin kan lo hria a, a thawhpui hnai ber Treasurer aṭanga bang chuan inluling tia puh theih turin a banna lehkhaah a ziak lawi si a ni.
Pu Lalsawta hi tun hnaiah hian Congress inhmuhkhawm apiangin thu a sawi a, amah hlir hi TV-ah kan lo hmu a, Facebook han en ve chang pawhin amah bak hi kan hmu mang lo. Pu Zodintluanga chu a lang tawh lo khawp mai, a pil hlen dawn a ni thei. Congress hian Politician hlun Minister hial pawh ni tawh heti zat an nei chung hian Congress Official Platform aṭang hi chuan Media lamah an tilang khat raih raih tawh hle a, Pu Lal Thanhawla nau Pu Lal Thanzara meuh pawh a lang tawh mang lo. Pi Hawla chawlh ruala 'Ṭhat Loh Theih Lohna Bawm' an tah khan Pu Hawla kha ṭhat theih loh chhanah an puh tih a chiang si a, Pu Zodintluanga ban chhan hi a ril raih raih asin. Congress hian mi fing thil hrethiam an ngah si a, Dictator kawng zawh pakhat hian mi dang hi a beng hniam em ni- Congress mi leh sa Congress chhuahsan an pun chhan? tiin zawhna a awm.
- K Lalmuanpuia (MP Khawlhring)

- K Lalmuanpuia (MP Khawlhring)

Pu Zodintluanga bàn chhan kha

Ka pu,
Ni 20. 06. 2022 khan, Mizoram hmun hrang hranga National Highway & Infrastructure Development Corporation Limited (NHIDCL) kawng laiin environment humhalhna dan leh hrai an bawhchhe nasa lutuk titawp tura ngenna lehkha ka rawn pe tawh che a, a copy pawh EF&CC minister leh a changtu department-a mawhphurna lian nei zawng zawngte ka pe vek bawk a. Kha ka lehkha rawn thehluh khan awmzia a neih loh vangin open letter hi ka rawn thawn che a ni.
Environment venhimna lama sawrkar hmalakna awm lohzia ka hmuh chhuah laiin, environment tichhe thei zawnga hmalakna awmte kal chakzia pawh ka hmu a. Chuvangin, ni 27-30, May,2022-ah khan sit-in demonstration (strike) neiin EF&CC office kawtah ka ṭhu a. Ka ngen angin PCCF, EF&CC chuan hma a la a ni.
Sit-in demonstration ka neih hnuah ka thawhpuite nen kan environment humhim turin, nang leh district magistrate leh mawhphurhtu department-ah ngenna kan thlen zui zel a. Khatia thuneitute hnena thu kan thlen hma khan district chhunga thil rapthlak tak tak thlengte hi thuneitu lamin an lo hre lo emaw ni teh chek ni?
Ka pu, i hnena open letter thawn pawh hi i tan a lo fiah loh takin, i tih dan entawna thil thleng tak tak tehkhin thuin chhunzawm lawk ka duh a:
Pacific thliarkarah khuan keimahni ang chi hnam chi khat an awm a, an sawrkar chu Nauru sawrkar a ni. An sawrkar leh i sawrkar hian inan deuhna in nei emaw ni tih theihin thil a awm tlat mai. Anni pawh hian environment lam ngai pawimawh loin tangka sum an ngai pawimawh zawk tlat a, an leilung hnuai lama awm, puak thei siamna leh lei tih ṭhatna atana hman theih (phosphate) laih chhuah nan an ram zau zawng 90% lai an hmang a. He an thil laih chhuah avang hian mi tam tak chuan an hausak phah em em a, mahse, an MAWL hle hlawm. Hausa mawl an ni ringawt. Tichuan, kum 2000-ah khan New York Times chuan, “Nauru aṭanga phosphate laih chhuah tur awm chuan kum 10 vel chu a la daih thei ang a, heng hnuah hian ami chengte hian eng nge an ei ang?” tiin an chhuah a. An sawrkar hian i sawrkar ang thoin minister dàwn táwi deuh deuh an nei ve ngei a ni ang, an Finance minister chuan, “Naktuk chuan naktuk atan a tlachawpin a inngaihtuah mai ang,” a ti a ni. Amaherawhchu, a ngaihsam ang ngawt a lo ni lo a, naktuk chu a lo thleng ta si a, an environment an tihchhiat vek avangin an ram chu chenna tlak loah an siam a, thlai, thei, buh leh bal engmah an ching thei ta lo a, tui in tur pawh ram dang aṭanga an lak a ngai ta hial a. Chu hmun chu mihring chenna tlak loh ram tih niin “Failed State” an lo ti ta hial a ni. Mi ṭhenkhat, power-a awm te natna, Thluaka sum lut natna hian, mipui mimirte tan vanduaina nasa tak a thlen theihzia chu Nauru sawrkar awm dan hian a tarlang chiang hle a ni.
Kan state chungchang bikah lut dawn ta ila, Mizo mipuite hian ram hmangaihtu nia ngai chein Chief minister dinhmunah kan dintir che a. Ram hmangaih kan tih hian Mizoram chhung sik leh sa, mihring chengte, nungcha leh thing leh mau bakah lui leh lui chhunga nungchate a huam vek tih ka hrilh duh tlat mai che. Mi tlem tete tana hamṭhatna siamna kawnga chak taka hma i lakna hian heng kan sawi, environment hi a tihchhiat vek si chuan, ram hmangaihtu nia ngaitu che mipuite chanvo hi a chhe chho hle dawn a ni.
I ke bula sei lian leh nangmah hnaihtu tam takte ngaihsam ṭawngkam, “Development a awm dawn chuan environment-in a tuar ve a ngai,” tih leh “Fur a lo thleng ang a, lui tui chu a kuang liamin a luang leh mai ang,” tih thu hriat fote hian rilru a tihah ngawih ngawih ṭhin a ni.
NHIDCL-in kawng an laih chungchangah nasa taka environment pawngsual a nih lai leh, VC-ten an thuneihna ni miah loa lui kam balu leh lungte construction company te hnena an hralh lai te, ram hnuai pilril chhunga Burma lam thingzai mi hoin thing an lak ruk reng lai te, kan ṭhenawm state-ten lui kuang khat tlata kan mau an tawlh char char laite hian, hlawh neia venghim tur department-a hnathawkte hian eng nge an tih le? tih zawhna tal hi chhang thei awm se ka ti ṭhin. I thu sawina ṭhenkhatah Mizoram boruak hralh i tum thute kan lo ngaithla a, hemi hi “carbon trading” an tih hi ni ngei turah ka ngai a. Heti laia kan statistic erawh chuan boruak hralh lam chu a kawk lo nasa hle mai. Heti hian internet lamah kan lang tlat mai, “Kum 2010 khan Mizoram hian 1.881 MHA natural forest kan nei a, chu chu a ram pum zau zawng 85% a nih laiin, kum 2021 ah chuan 27.3 KHA natural forest kan lo hloh tawh a, kan forest hloh zat hi 13.7 Mt carbon dioxide emission tlukpuia ngaih a ni,".
Heti zat rate-a forest kan hloh chuan Mizoram boruak hi kan zuar thei lo mai ang tih a hlauhawm khawp mai.
He khawvel hi mihringte chenna tlak a nih hram hram theih nan development hmanga environment tichhe lo hram tura hmalakna nasa tak karah, hnam mawl zawk leh mi thil tithei sum atchilhte avangin environment chuan nasa takin hliam a tuar mek a. Kan state ang lehkha thiamna lama sang phian angreng, environment ṭha pawimawhna hrethiam mai thei tur mipui zingah NHIDCL kawng laih vanga chhiatna kan hmachhawn mekte tihtawp a nih loh chhan hi hriat thiam harsa ka ti a ni. I hriat tho angin NIT Lengpui leh Chalfilh (Vanzau) a tourist destination sak chungchanga National Green Tribunal (NGT) thuthlukna chuan Engkim aiin Environment a ngaipawimawh hmasa zawk a nih kha.
Mizoram state zim angreng tak, ruah tui dawng ṭha em emah environment ṭha leh duhawm tak, ami chengte pawh kan hrisel phahna ngei theihna leh, chumi avanga khualzin pawh hip thei kan nih lai hian, i sawrkar hmalakna hian environment humhalh aiin sawisak hi a phurpui zawk ang maiin ka hmu a, rapthlak ka ti che u a, he ram hi in ta bik ni loin a chhunga chengte chanpual pawh a nih ve zia hi hrethiam ula ka va duh em! Environment pawngsual a nih mekna point-te ka hriat theih chin a hnuaiah hian ka tarlang e:
1. Kawng zau leh lian tak kan mamwh dan pawh bihchian hmasak awm loin, central sumin NHIDCL-in hmun hrang hrangah kawng an lai a. State sawrkarin dan an zawm leh zawm loh pawh ngaihsak loin an duh ang angin kan ramhnuai, lui leh ramngawte kan suamsamtir a. Leivung paih bikna turte an nei tur a nih laiin endikna lama hmalakna a chhe hle tih theihin an kawng siamna lam apiangah ramngaw a chereu a, lui tui a sawp rawp a. NHIDCL hian state dangah pawh hna an thawk tho a, keini ang em ema an zuam state dang chu an awm emaw hriat a ni lo. Zuamawm tlata kan awm chhan hi sum thiltihtheihna bak a nih a rinawm lo a, sum thiltihtheihna avanga mihring leh nungchate tawrhna nasa takah mawhphurhna i lak a ngaih tak avang hian hun tlem te siam ṭhatna hun i la neih lai hian eng emaw tal i tih ka va beisei tak em!
2. Forest department hian Lui leh lui kam, ramngaw leh nungchate an humhalh tur a nih bakah thing phunah te hma an la tur a nih laiin, ngai teh, ka pu, Village Council te hian thuneihna dang an lo nei a, lui kama mi balu leh lungte chu state pawn lam construction company te hnenah an hralh a, a lak dan chungchangah inkawhhmuhna ṭha a awm si lo a, kan lui kamte hi hmuh tlak pawh a awm tawh mang lo a ni. Kan hetih lai mek hian Nagaland CM chuan an state chhunga hmun ruak zawng zawnga thingkung chi khat kum 10 chhunga puitling tur a phuntir a, an environment tan a ziaawm dawn bakah, thing lama eizawnna nasa tak kum 10 hnu chuan an ṭan thei dawn tih a hmuh tlang theih a ni. Mi state CM te hian mipui/mimirte tana ṭha eng emaw tak an ti ṭhin a, an va awhawm em! A chunga kan sawi, ramngaw leh nungcha bakah luite suasam an nih lai hian, EF & CC department hi khawiah nge an awm le? An buai viau reng em ni? A nih chuan eng hna thawk tura awm nge an nih le? I department enkawl PWD-te hian NHIDCL kawng laih hi an enpui thei ngang lo bawk emaw ni le?
3. Bawlhhlawh paih chungchangahte hian hma kan sawn thei lo hle mai. Hman lai aṭangin Mizote hian kawrah bawlhhlawh paih kan ching a, tunah erawh chuan ṭawih thei lo thil tam tak kan neih tak avangin system nei taka bawlhhlawh paih a ngai a. Ṭawih thei leh thei lote thliar hrang tura hrilh kan nih laiin, bawlhhlawh phurtute hian an chawhpawlh leh vel mai mai nite hian a lang a. Keini aia khawpui lian pawhin an tih theih hi kan harsat leh hle mai. Kan lui tam tak kan tihchhiat phah avangin mawhphurtu department-te hian hma la se la a va duhawm dawn em.
4. Lei vung paihna tur bik hmun bik ruatte hi thil harsa tak a nih loh hmel nen, chutiang chu kan neih loh avangin leivung paihtu leh bawlhhlawh phurte hian remchang laiah an paih mai a, chung chu lui lamah tawlh lutin harsatna a lo awm ta ṭhin chu a nih si hi.
5. PMGSY, Agriculture link road, economic road leh khawtlang hmalaknain inkalpawhna kawng an siama lei vungte pawh kan hnawl liam mai mai a, dan mumal kan neih loh avangin inthlahdah takin lei vung hnutchhiah ṭhin a ni.
6. Sava leh ramsate humhimna kawngah hmalakna mumal hmuh tur a awm lo.
7. Lui leh Tuikhur hnar kangchat chungchang pawh hi bihchian a va ṭul em, PHE pawh hian an tui lakna, lui source tal hi chu humhim thei turin hmalakna awmze nei an neih hriat a ni lo tlat bawk a.
Tichuan, ka pu, environment lam hi i ngaihven zawng a nih vak lo zia tilang chiang deuhtu chu: I MLA te zingah hian forestry expert i neih reng laiin he lama thiamna nei miah lo kutah he department, Mizo mipuite dam khawchhuahna tana mawhphurtu hi i'n dah mauh mai chu a ni si a le! I chief minister chhung hian Mizoram hun paltlang tawh zawng zawngah environment-in sawisak a tuar nasa ber hialin a rinawm. Heng hi kan sawi ngai loin statistic hian a pho lang zel bawk si a, ṭhang leh tharten an rawn hriat zui dan tur che hi a duhawm lo hle thei dawn a. A awmzia chu mahni ram leilung leh a hausakna tichhetu tia history-ah i hming a chuan loh nan, siam ṭhat hna tlem tal thawk i la thawk thei asin.
'Ta se' tiin ngaihtuahna hmang lawk ang aw, Mizoram hian tuihna nei lo ta se, air condition hmang loin khawsak theih loh ta se, power supply te hi chhe lutuk chho zel ta se la, tui awm loin thlai chin theih a ni dawn lo a, khawlum tuar thei turin AC leh power supply kan mamawh a, tui in tur hi state dang aṭangin lei ngai ta se, nang leh i chhungte chu in la survive mahna, amaherawhchu, i sorkar chhunga pung thur thur BPL leh chhungkaw chet harsa ve tak takte hi engtin nge an awm tak ang le?
Kan chhehvela Zo hnahthlakten buaina an tawh avanga an rawn raltlanna hi thuneihna i chan chhung hian chenna tlak loh ramah a chang mek tih hi hre duh lo mah la ka hrilh duh tlat che a ni.
Mizo mipui, rilru tluang tak leh hmangchang hre takte state danga pem chhuah ngai ang dinhmuna kan indah chhin hian, mawhphurtu an awm ngei a ngai dawn si a, nangmah lo chu kawh tur an awm tlat si lo a nih hi.
I duh chuan kan environment suasamtua ka puhna che zawng zawng khi i siam ṭha nghal thei. Thiltih harsa pawh a ni lo. Environment hi Development hmakhalhtir lo la, India danpui leh a hnuaia dan tesepin a phût angin, khawlum leh tui harsatna kan tawh hi harsatna ni mai loa buai manganna rapthlak takin a chhunzawm mek tih hriain, “Hmasawnna hnathawh zawng zawng chu environment dan leh hrai zawm chunga thawh tur a ni,” tih hi i dinna ni tawh se la, tam tak i la siam ṭha thei ang.
I rinttlak
(VANRAMCHHUANGI)
Alias Ruatfela Nu,
Chaltlang, Aizawl.

(VANRAMCHHUANGI)  Alias Ruatfela Nu

To, 		The Honourable Chief Minister of Mizoram, 		Aizawl: Mizoram Subject: 	Mizoram environment pawngsual a nih chungchanga OPEN LETTER.

Tunlai chu kan khawvel leh Zoram hmun tin leh keini vengah ngei pawh thihnain thla a zar a. Ni tin tualthihna rapthlak a thleng reng bawk. Han hawi vel ila, na tuar rumri leh lusun ṭap thawm tlang tinah hriat tur a awm a, thihna kut vawt hian min man tawh chuan sum leh pai ngahin min chhan zo lo va. Chhungkhat laina neih tamin min chhan thei hek lo. Harsatna vantla leh kan siamchawp harsatnain min hnuk hnawk a, chu chuan buaina leh chungpikna min thlen mek bawk a ni. Damdawi an hmuchhuak a, nimahsela, natna tihdam harsa chi dang a lo chhuak zel bawk.
Kan ram ṭhenawm Manipur leh Myanmar rama kan Zo hnahthlakten buaina an tawk a. Chu chuan ka nun ram hi a uai tliak a, a chhan chu kan unau leh kan thisen zawmpui an ni tlat a ni. An tawrhna chu keimaha hnam hmangaihna rilru (nationalism) hi a sawi nghing dawt dawt a ni. An natnaah hian mi pangngai chin chu kan na ve a, kan hmangaihna hi Tuivai leh Ṭiau lui boundary hian a dang zo lo ve. He thil hian insuihkhawm leh zai min neihtir ngei se a duhawm hle mai.
Khawvela remna zawngtute’n remna leh muanna a thlen theih nan theihtawp an chhuah a, silai mu leh bomb hlauhawm karah palai hna thawkin kan ram leh ram inkarah mahni ṭanghma hai hman lo lékin an thawk a. Heng mite hi International Politics buaipuitute an ni. (Party politics ni lovin) Heng mite hi chuan eiruk tih lam an ngaihtuah hauh lo. Khawvelah remna a thlen theih nan an nun an pe a, nimahsela, tih theih loh chin an nei. Ram leh ram an indo reng tho. A chhan eng nge ni ang? Ralmuang hmun reng hi a awm lo, Lalpa hnen kan thlen hma hi zawng.
A nih leh khaw’ nge? Eng tin nge? Hetiang teh nuaih khawvelah hian kan dam khawchhuah tak ang le? Khawvel chanchin chu a hmaa kan sawi tak ang khan, indona, inpawng nekna, natna, lungngaihna leh ṭahna hlir a ni. Nimahsela, khawvelah hian Pathianin min dah si a, kan damna tur chu kan ngaihtuah a ngai si.
Keini nung dama awmte hi kan boral hunah Lal Isua a lo la kal lo a nih chuan ni leh thlate a la eng zel dawn a. Bazarah mihring an la zi muah muah dawn tho a, intihhlimna leh football khelh runpuite a la kal zel dawn a. Phawngpui tlanga chhawkhlei parte a la vul zel dawn a ni. Khawvel a kal ngaia a la kal muah muah tur hi thlan khur aṭangin hre thei ta ila, kan lungawi ang em le? Lunglenna ṭangkai lo bak keimahniah hian a thlen hauh lo vang le.
Khawvelah hian duhtawk chin a awm reng reng lo; a mak teh asin. Mi hausa, sum nei ngahin an duhtawk lo va, thiamna nei sangin duhtawk an inti lo va. Thla leh arsite hi mi thiamte’n hriat belh zel tumin an zir a, sikeisenah khian in leh lo han nei mah se la, lungawina leh hahchawlhna an hmu lo vang. Lalna te leh thiamna te, thuneihna, hausaknate hian lungawina leh hahchawlhna, hlimna tluantling min pe thei hek lo.
Pathian chuan kan rilru, kan taksa leh thlarau kan engkim atan a fapa thisen leh nunna min pe a. Pathian fapa Lal Krista chu kan engkim atan min pe a. Amaha rinna nghattute chuan kan taksa dam nan kan hmang ngam tur a ni. Kan damlo a nih pawhin na chunga rilru damna, lusun chunga khawhar rehna leh thlamuanna, tuar chunga lawmna, hlauhna hmuna muanna an nei a, vanram khi an hnukhnai a, ‘Nang I awm chuan lei van a chang ṭhin,’ an ti nia.
A hmangaihnaah chuan kan nun hi hahchawlhtirin, a hruai theih turin kan nun hi a hnenah hlan ila. A malsawmna lo sur chu keimah niah a dawnthleng lo rem dikin, Ani chuan lei sual hmun thim ber pawh a rawn chhung eng ngei dawn e.
Halleluiah, Aw! Halleluiah Amen, Kalvarya hmangaihna thisen zarah; Ṭahna ram leh lungngaihna zanthim hi, HLIMNA VAN PIALRAL khian a rawn ên.



 
- Hruaia Sailo, Tuikual North.

- Hruaia Sailo

HLIMNA VAN PIALRAL

Tunlai chu ZPM beih rawn hri a lêng mêk a ni. Congress hian kum 2023 chu beisei an neih loh avangin 2028 atan tlin theihna turin ZPM sorkartir loha MNF sorkartir an tum nasa a ni. MNF chuan tunah chhe taka to an rel avangin sorkar mêk thiltihtheihna leh sum nen 2023 hi tlin leh hram hram, 2028 chu beisei nei tawh lo an nih an inhria a ni. Hei vang hian Congress hian ZPM hi sorkar lo se an duh. MNF lahin Congress an beih chuan Congress an té anga ZPM lam an lian dâwn tih an hria a, Ruling Party ber hian Party naupang ber ZPM an bei char char a ni.
MNF President ber Pu Zoramthanga thusawi YouTube kha en ula, 'Congress chu beih tham an ni tawh lo,' ti ang zawngin thu a keuh thlu daih a ni. Pu Zorama hi pa fing tak a ni. Pu Zorama hian Congress an beih nasat poh leh ZPM an káng dawn tih a man phak vek a ni. Mizoram Chief Minister ni thei ngat a ni a, thil hi a man a ni. MNF Sorkar lehna tur hian Congress hi an hnawksak tawh lo tih a hria a ni. MNF sorkarna tur chuan ZPM an hnawk a, chu vangin ZPM beih tur a ni. Political strategy ṭha tak a ni. MNF survival atan chuan hei hi tih makmawh a ni.
Congress President Pu Lalsawta tehreng pawh hi anmahni paih thlatu MNF a bei tawh mang lo, ZPM a bei ngat ngat a ni. Opposition Unity tih lam chu hla tak a ni. Congress chuan MNF an beih a rinawm lai hian ZPM beih hi a thupui a ni. Pu Sawta thusawi ka ngaihthlak leh chhiarah hian MNF beihna aiin ZPM a beihna a tam zawk a ni. Congress hian 2023-ah MNF tih tlin an tum. 2028-ah chuan MNF chu beih tham an awm tawh lo vang a, Congress bawk an sorkar theihna turin a ngaihtuah a ni. Congress hian thluak an vawrh vir a, MNF an fak hreh chung pawhin an attack lo, ZPM hlir an attack a ni.
MNF Party hruaitu zingah hian pa fel tak tak an awm. Lehkhathiam pui pui pawh an awm, mahse an sorkar hi mipuiin an ring tawh lo. Sorkar hausakpui Minister leh MLA an ngah lutuk. Sorkar a ṭhat chuan mipui an hausa tur a ni a, mipui an la rethei a ni. Chu sorkar chuan a hnathawh sawi tur nei mang lovin Political Platform an neihin ZPM an bei daih zel. Pu Zorama khan kan el ber tur chu ZPM an ni tih a sawi kha Lunglei Municipal Council inthlan hma, Zemabawk Local Council inthlana MNF an nil hma kha a ni. Pu Zorama hian ZPM lian zel hi a lo hmù chiang hle a ni. MNF tán chuan ZPM beih hi a pawimawh a ni.
Social Media lamah MNF an beih rawn a, ZPM an duh rawn avangin MNF pawhin Social Media indona an puang a nih kha. Khani hnu khan Graphic mawi tak tak nen MNF fakna a rawn chhuak a, a lawmawm hle a ni. MNF fakna aia nasa ZPM beihna a lo chhuak bawk a ni. Youtuber ṭhenkhat phei chuan an ṭan an thlak hlawk a ni. MNF hian pawisa an pe tih sawi theih a ni lo, MNF an ṭan thut hi mipuiin rin dan an nei a ni. ZPM bei tur hian a bei theitu hi an zawngkhawm zel niin a lang. ZPM lah hi ngawih mai mai hunah hian an lo chhang ṭhin a. ZPM tán an boruak liansâ tihtet tum beih let a ngai lo. Mahse, Politics thiam lo ZPM chuan a beitu an bei let a, inang rengin an awm dawn a, beih a ngai lo ZPM tan, ngawih mai mai hun a ni.
Social Media lama beih tawk nasa zual Vanlalsailova, Jeje, Tetea Hmar, Baryl, TBCA etc hi chu an ngawi thei khawp mai. Party worker hian ngawih harsa an ti. Beihna awmze nei lo leh phuahchawp hi chu ngawih bopui tur a ni. Pu Zoramthanga Nuai 3 Sem tur video te, Pu RRRa Nuai 3 sem dan hre lo mawl a tihzia video te, Pu Ruatkima Assam Rifles um chhuak video te, Pu Rintluanga Sailo video hrang hrangte hi chu inpuhna ni ve lo; anmahni ngei sawi a ni, Chief Whip ngei pawh a ṭawngvai tawh a ni.
He War hi ZPM hian a Music an man thiam a ngai. Congress chuan mi dang zawng dah ṭhain Pu Sawta an zuar ngar ngar a, Pu Zodintluanga an MLA chhuanvawr chu an nawr bet char char a, Congress hian Pu Mama hi an dah hnial tawh hle a ni.
- Lalremruata

- Lalremruata.

A upa 2-in a naupang ber an beih rawn (Mizoram Political Speech leh Social Media War thlirna)

Mizo ṭhalaite'n social media kan hmang nasa tawh em em. Kum 30 hnuai lam emaw, KTP member rual velte phei chuan an/kan khawih nasa leh zual. Ṭhalai tam tak chuan WhatsApp status tur, Instagram leh Facebook story turte hi a zawnin an zawng emaw tih mai tur a ni; kei pawh ka tel mai thei!
Social media kan khawih nasat em em lai hian, heng social media-te hi Pathian thu leh Chanchin Ṭha puanzar nan leh thehdarh nan Kristian ṭhalaite hian kan hmang tâwk loa hriatnate a lian a. Chutiang atan ai chuan, mi tam ber hi chuan Pathian thu kaihhnawih ni lo atan kan hmang ber zawk niin a lang.
Social media-ah hian hoh helh cháng te, fiamthu leh nuihzatthlak lam te, tui záwng leh nuam tih záwng te, vei záwngte han tihlan cháng chu a awm tur a ni a. Mahse, chutiang lam ringawt atana hman liam a, Pathian thu leh Chanchin Ṭha thehdarhna atana hman loh ringawt chu a uiawm; Kristian nula tlangval kan ni si.
Mi tam zawk hi thu sawi mi leh thu sawi thiam tak kan ni lo a, Pathian thu sawi tura an duh kan ni lêm lo a; sawina tur hmun nei lo kan ni bawk. Chutiang chu ni mah se, social media avangin remcháng kan nei ve tho a, Pathian thu sawina leh puanzàrna tur nei lo kan ni bik lo, kan neih angte kan hmang thiam dan azir a ni.
Whatsapp status-a kan dah thin te, Facebook leh Instagram-a kan dah thinte hian kan mizia leh kan tui záwngte eng emaw chen chu a tilang kan ti thei ang. Chuvangin, fimkhur thiam a tha hle; a bik takin pawla hruaitu nihna chang pha leh chanvo pawimawh neite tan fimkhur lehzual a ngai 
àwm asin.
I status-ah khan thil ho tê tê dah cháng a awm ang, mahse, holam mai mai hlir dah ngat ngat ringawt lo deuhin, Pathian thu chángte han dah ve zauh zauh teh; i status lo entu zinga mite'n Pathian thu an lo chhiar ve phahna a lo ni reng thei asin. Hlâwkpui an lo awm hlauh phei chuan status hlu tak a ni dawn si!
- Kezo

- Kezo

CHANCHIN ṬHA LEH SOCIAL MEDIA

Mipui tam zawkte rin danah chuan Nipui (Summer) lai hian Ni (Sun) leh Lei (Earth) te hi inhnaih têah an awm a, chumi avangin khua a lum ṭhin. Chutiang bawkin Thlasik (Winter) lai hian Ni leh Lei hi inhlat takah an awm a, chumi avang chuan khua a vawt ṭhin. Hetia han ngaih mai chuan a dik hmel hle a ni. Mahse, a tak takah chuan thil in-opposite chiah a ni thung. Kan hriat ṭheuh angin Lei (Earth) hian Ni hi a hel a, a helna kawng (Orbit) hi a bial ni loin, a sáwl (Elliptical) a ni a. Hemi avang hian Ni leh Lei inkar hlat zawng hi kum tluanin a danglam or a inang lo a ni.
Thil mak deuh mai chu, Northern Hemisphere (India ram awmna)-a mite tan chuan Nipui (Summer) kan tih, khaw lum lai ber hi kan Lei leh Ni a inhlat lai ber a ni a. Thlasik kan tih, khaw vawh lai ber hi kan Lei leh Ni inhnaih lai ber a ni thung tlat a ni. Chuvangin, khaw lum leh vawh chungchangah hian Lei leh Ni inhnaih leh hlat hian kawngro a su ber lo a ni.
Kan awmna Lei hian Ni (Sun) hi a hel a, vawi khat hel chhuah nan ni 365 days, 5 hours, 59 minutes leh 16 seconds a mamawh a ni. Ni hian Lei aiin gravitational force a neih tam zawk avangin Lei hi Ni hel kualtu zawkah a ṭan phah a. Hei hi Revolution an ti a ni.
Lei hian Ni a hel lai tho hian, amah hrim hrim pawh hi khawthlang aṭanga khawchhak zawngin a vir a. Vawi khat vir chhuah nan 23 hrs, 56 minutes leh 4 seconds a mamawh a ni. Hei hi Rotation an ti thung a ni. Hemi avang hian chhun leh zan a awm phah a ni. Ni hnaih/lang lama awm ramte tan Chhun a ni a, ni hlat/lang lo lam a awmte tan Zan a lo ni ta ṭhin a ni.
Kan awmna Lei hian ni a hel kual avangin khawvel hmun hrang hranga miten Ni lumna (direct sun light) hi an inhmuh chhawk a. Hemi avang hian seasons chi hrang hrang a awm phah a ni. Kum tinin June thlaah Northern Hemisphere lamin direct sunlight an dawng a, chutih laiin Southern Hemisphere lamin indirect sun light an dawn thung a. Hemi hun hian Northern Hemisphere lama awmte tan Summer a ni a, Southern Hemisphere-a awmte tan erawh Winter a ni. December thlaah Southern Hemisphere lamin direct sunlight an dawng a, chutih laiin Northern Hemisphere lamin indirect sunlight an dawn thung a. Hemi hun hian Southern Hemisphere lam a awmte tan Summer a ni a, Northern Hemisphere a awmte tan erawh Winter a ni. March leh September thlaah chuan Northern leh Southern Hemisphere-a awmte hian a direct sunlight a dawn dan a inang a, a lum leh vawt dan pawh a inang a, lum lutuk leh vawt lutuk a awm lo ve ve a ni.
A tawpnaah chuan thlasik laia a vawh a, nipui laia a lumna chhan chu hetiang hian han khaikhawm dawn ta ila. Nipui lai chuan Lei-in Nisa (sun light) a dawn danah a chung zawn aṭangin ngil tak, lei a thlen pawhin ni lumna leh satna pawh a insem darh lo a. Chubakah, nipui laiin ni a rei a, Ni (sun) lan leh sat chhung a rei a, chuvangin khua a lum ṭhin a ni. Thlasik lai chuan Lei-in Nisa a hmuh dan hi a àwn a, lei a rawn thlen pawhin a chakna leh satna pawh a insem darh a. Chu bakah, ni a rei lo a, ni lan chhung a tawi a, khua a tilum pha ṭhin lo a ni.
Khawvel sik leh sa kan hman/neih mek dan kan thlir chuan, khaw lum chhung thla (hun) hi a rei tual tual a, khaw vawh thla (hun) hi a tawi tual tual thung a ni. Hetia han ngaih mai chuan khawlum leh vawh hun chhung thla hi inang/chen vel awm hi a ni a. Mahse, khaw lum chhung hi a vawh chhung aiin a rei fe ta zawk a ni. Khawvel hian lum lam a pan zel a, hetiang a nih zel chuan kan chenna khawvel hmun tam tak hi chenna tlak lohah a la chang mai ang tih a hlauhawm hle a ni. Chu vangin, khaw lum zel tur veng turin kan theihna zawn ṭheuhah ṭan lak hi mi tinte mawhphurhna a ni e.

- Dr Zirlianngura Govt. Zirtiri Science College

﻿﻿- Dr Zirlianngura Govt. Zirtiri Science College

ENG VANGIN NGE NIPUI LAIIN A LUM A, THLASIK LAI HIAN A VAWH A THUNG?

He thu hi MNF President leh Chief Minister ni bawk, Zoramthanga chuan nimin khan Mizo Hnam Rûn-ah a sawi a.
1. Tun hma kum 60 chuang daih tawha an sawia tharum chhuaha awmtir an tum tawh; an hlawhchhampui tawh chu, eng vanga thu thar sawia han sawi leh mai ṭhin nge maw a nih le?
2. Hetianga kan awm theih dan hi India Danpui Article 3-a awmsa a ni a, chu chu Peace Accord-ah ziah a nih thu a sawi a. Kum 40 chuang zet tawh hnu pawha a taka thil thleng a la awm rih si loh chuan eng nge a awmzia a, eng nge a ṭangkaina ni ang?

3. Manipur-a awm te chuan an duh an thlang thei a ti a. “Keini chuan kan bei tawh a, martar thisena baptis tawh an ni. Tunah chuan an kutah a awm tawh a, an inchhandam nan an duhthlanna a pawimawh,” a ti a. An tih ang khan tharum an thawh ve tur a ni a tihna em ni ang? An hlawhchham ang khan rawn hlawhcham ve rawh se, a tihna em ni ang? An tih ang chuan han ti ve se, hlawhtling chuang si lovin thisen chhuahna leh mi tam takin nunna chan phahna awm se, a ti em ni ang?
4. Nationalist inti ve dang te chu, ‘sabengtung sakei vun sin ang chauh an ni’ a ti a. Anni chuan MNF chu thil tum hlawhtlinpui chuang si lova, thisen chhuaha nunna chan tam taka awm phah a, mipui tam tak tan tuarna rapthlak tak thlentir bawk si chu, ‘àt sona’ chi khat an ti ve thung a, tu nge dik zawk ang le?
5. Political Party dang hruaitute pawh hian ‘Zo hnahthlakte rorelna pakhat hnuaia kan awm’ an duh thu leh an beisei thu hi an sawi vek a. Chutianga kan awm theih nan chuan awmze neia thiltih engmah an nei bawk si lo va, eng nge a awmzia?
6. A reng thu-ah awmhran kan duh chhan hi eng nge ni? Independence kan duh a nih chuan Mahni Kè-a kan din a ngai a. Mahni kè-a ding thei tura tih ngai apiang atan Cental Sawrkarin min pe chunga, chawmhlawm titiha awm reng site hian, engtia mahni theihnaa mahni kè-a ding thei tura inngai nge kan nih?
7. Lo awm hrang ta i la, Central Sawrkar thuhnuaia kan awm chung pawha Party hrang hrang thawk ho thei lote hi an lo inngeih kan ring em ni? Kohhran hrang hrang 100(za) chuang awm te hi kan inzawmkhawm theih kan ring em ni? Heti khawpa inthurual lo leh inngeih lote hi mahni-a kan awm hran chuan kan invaw darh vak zawk mai lo’ng maw?
8. Jerusalem han tih leh hluai ṭhin pawh hi eng nge maw a awmzia le? Chawmhlawm, Kutdawh ti tiha awmna hmun hi eng nge a ropuina ni anga, a thlàkhlelhawmna ni ang? Chawmhlawm Kutdawh ti tiha awm tura midang han sawm belh te hi a zahthlak lam deuh zawk lo maw? Jerusalem tak tak pawh khu eng nge maw a nih chiah le? An inkàp deuh bur bur reng a ni lo’m ni? Van Jerusalem pawh mumang lama kan suangtuah a ni deuh lek fang lo maw?
9. India hi hnam hrang hrang awmkhawmna ram a ni a. A neitu bìk tu mah an awm lo va. Politics-ah a ni emaw, sumdawnna thilah a ni emaw, a thiam leh a theite hlawhtlin nana kawng zàu tak inhawnna a ni. A tawizawngin sawi i la, Garo Tribal Tlangval, Purno Sangma Union Cabinet Minister bàka Lok Sabha Speaker a ni thei te khan chu chu a lanchiantir a ni. Khasi, Garo, Naga, Arunachali te zingah Governor, Union Cabinet Minister, Chief Election Commissioner, Union Public Service Commission Chairman/Member an awm fer fur thei te hian chu chu a lanchiantir lehzual a ni.
10. Keinin hetiang nihna kan neih ve theih lohna chhan hi eng nge ni? Ngaihsan tur leh Ngaih hlut tur hre lo va, Huau Huau, Hlim Hlawp leh ṭangkaina nei lo thil dang danga kan inhman ral deuh vek vang hi a ni.
11. Dawtsawi leh Lemchan Nun bansanin Takna hi nunpui ve i la, India ram ropui takah hian midangte ai pawha kan thlensàn theihna kawng a inhawng a ni tih i hria ang u.
12. Thil thleng danglam deuh a awm apianga Politics Khelhna remchanga hman zen chìn hi i bansan bawk ang u.
- M Lalmanzuala

﻿﻿- M Lalmanzuala

MIZO ZAWNG ZAWNG RORELNA KHAT HNUAIA AWMTIR HI MNF THIL TUM A NI - ZORAMTHANGA

Tahrik May ni 30, 2023-a Vanglaini chanchinbu Vol - XxXVIII no. 125 kha kan lo chhiar chuan leia vei ve em em mai zangnadawmna chungchang kha Editorial ah chiang lo leh fiah lo ruaiin in rawn ziak a, kha kha Kolasib MJA lam thu kal zel in rawn ziahna a nih rualin a chanchinbu lian hi chuan zuk kal chilh law lawin zuk zir chiang ta ula ṭha tur a nia, ral aṭangin a him chinah midang chhui chhuah sa in rawn tarlang ve lek fang a, hemi kawngah hian Mizoram Journalism hi a la sang tawk lovin a la hriam lo tihte min ngaihtuah chhuah tir a ni.
Vanglaini rawn ziah lan, "Sorkar laipui project lian deuhah hian a hre hmasa leh thiltitheite'n ram an lei khawl a, zangnadawmna tam tak tak an lak tawhna hi a awm a, hmun ṭhenkhatah phei chuan official-te nen inthuruala thiltithei deuhte'n kawngin a paltlang ngei tura ram lo lei lawk a awm ṭhin. Tun hnaiah pawh titiah chuan zangnadawmna dawng tura hming lang si lo, mi thiltithei zingah pawi­sa tam tak tak la tur an awm nual a, politician-te leh sorkar official-te hming thlengin titiah chuan an sawi chhuak tawh," tih kha keini kum upa lam tawh pawh hian kan lo ral hriat thei a, Politician zing ah Compensation hmanga in la muk mek an tih te pawh kan rin hriat thei a ni.
Officer Pension pakhat chuan Highway Chiahpuam a ti mai a. Compensation lak theihna tur ram hi a lei khawma hmelhriat leh thurualpui a neih vang pawh a ni anga man to angreng tak hian a lei ngam tlat a ni. He pawisa hi a sawi ang tak hian Chiahpuam chu a lo ni teh meuh maia a thlep aia sang an hlep thei a ni. Hetiang chi hi kan sawi mam mai mai a, thil fel lo, corruption a ni. Compensation reng reng hi pawisa siamna tur ni lovin miin a ram a chân avanga a rulhna tura sorkarin pawisa a pek chhuah a ni a, a ram duhlai tak chu sorkarin hman duhna dang a neih (he thilah hi chuan kawngpui siamna atan a hmang duh) avangin a man hu tawkin a lei sak a ni. He pawisa hi a ram nei lo puiin lo hlawkpui a tum chuan Corruption lian tak a ni. Hemi kawngah hian Official thiam lo an awm a. Politician thiam lo an awm a. Khawtlang hruaitu thiam lo pawh an awm theih bakah mimal zingah dik loa sum siamna tura hming leh Document thawh phal an awm hi an thiam lo a ni.
He Compensation Corruption hi ti tawp theitu chu Politician a ni a, a Concern Minister a pawimawh a, a Bialtu MLA a pawimawh a, a Overall ah chuan Chief Minister ber hian huai taka a duh loh chuan he Compensation Chiahpuam hi chu do theih a ni. Tuna a lan dan chuan Nuai 100 bi ni lova Nuai 1000 bia hausa awk awk kan nei dawn a ni.
- Vanlalmawia

- Vanlalmawia.

National highway-a zangnadawmna thualna

Kan Bible-a Juda Iskariota chanchin kan hriat chu a ṭha lo lam deuh hlir tih mai tur a ni a, mahse, Isua'n amah zui tura zirtir a koh chhuah zinga mi ve tho a ni. Isua team-ah khan pawisa vawngtu (Treasurer) a ni a. Isua leh a zirtirte khan donation te leh thawhchhuahte pawh an nei ve a ni mai thei, kha an pawl sum leh pai lo vawngtu kha a ni a (Johana13:29). Mahse, a chanchin hi a ṭhat vak loh vang nge, Bible-ah hian a lang tam lo hle. Johana 12:3-6 ah chuan Juda Iskariota hian tangka a hlep ruk ṭhin thu kan hmu a. Tangka ip a kawl a, chu'nga mi chu a lo la ru ṭhin a, rukru a ni tiin Bible-ah kan hmu a ni. Isua chawimawia a awmlaite pawh khan a hlep ruk tur ringawt a lo ngaihtuah a ni mahna; uirenu'n Isua hriak rimtuia a chulh pawh khan a lo ui hle a nih kha. Isua zirtir ni tura koh ni ve thlap siah chuan a laktlak loh viau niin a lang a, a chanchin ṭha lam sawi tur a awm lo hle.
A tawpah phei chuan tlem tlem an pawl pawisa lo lak rûk mai kha duhtawk mai lovin, an hotupa ngei kha tangka sawmthumin a hralh ta hial a nih kha. Heng hunlaia tangka sawmthum (30) tunlai hun anga an chhutnaah chuan India pawisain cheng singhnih sangkhat vel ni awm tak a ni a. (https.//www.grandrapidscoins.com. 26-Oct.2022) Tunlai hun angah a pawisa hlutna hi tam tak angin lang lo mah se, kha'ng hunlaia pawisa vàn dan leh hlut dan ngaihtuah chuan a hlu khat viauin a rinawm. Chutiang khawpa sum duh leh koham a ni a, mahse, a nun chu nuamin a hmang lo va, a tawpah phei chuan inchhirin a inawkhlum ta hial a ni. Isua zirtir ni ve tho zingah chuan a chanchin hi a entawntlak lohvin, a khawngaihthlak zawk hle a ni. Isua khan a zirtir ni tur a koh ve thlap tho kha, setana thlemna do zo lovin bul ṭan ṭha viau siin a tawpna erawh a chhe ta hle thung a ni.
Thufing pakhat chuan, “Bul ṭan ṭhat hi a chanve zo a ni,” a lo ti a, nimahse, bul ṭan ṭhat hle a, a tawp thlen leh si loh chuan kan bul ṭan kha a tichhe vek thei tho. Chhungkua leh pawlah te pawh kan buaina leh intihthiam lohna ṭhin chu sum (pawisa) a ni fo ṭhin. Rawngbawltu tam tak hmingchhiatna pawh sum tho a ni ṭhin a, chutiang bawkin ram hruaitu leh sorkar dept. ah te pawh ni tho bawk. Oliver Cromwell chuan, “Mi satliah tam tak ai chuan mi rinawm tlem te an hlu zawk,” a lo ti a. Politics khela ṭhahnem kan ngaih hle mai te pawh hi pawisa vang nge ni ang a, ram kan hmangaih vang? tih te pawh hi zawhna pawimawh tak a ni awm e. Hruaitu nih kan inchuhna te, pawla buaina lo awm fote pawh hi pawisa vang a ni fo bawk. Tunah pawh hian kan rama sawi neuh neuh titamtu chu pawisa vanga lo thleng tho a ni a.
Khawvela dan bawhchhiatna tam berte zinga mi chu sum (pawisa) vanga thleng a ni ṭhin a. Sum avangin tual an that a, nupa an inṭhen a, ruk rukna a hluar bawk. Kan ramah pawh hian sum avanga buaina a tam ta hle. Ruihhlo tawlh ruk man te, rukru man te an awm reng, sum (pawisa) hian min va han tibuai tehlul em! Sum itna avanga tualthahna thlengte hi kan ramah pawh a tam ta hle mai bawk. Chhungkaw keh darhna lo thlen ṭhinnate pawh sum vang a ni fo bawk. Kan ramah pawh hian eirukna a hluar hle a, heng eiruknate hi a nihna takin han chhuichhuak phei se chuan a rapthlak tih piah lam a ni hial ta ve ang. Kan rin loh deuh deuh hi an man sup sup mai dawn a ni. Kan kristianna leh kohhrante hi kawrah kan hmang a, inphen nan kan hmang emaw tih mai tur a ni. Khawvela serial killer hlauhawm tak tak an man chhuahte pawh hi, an hmel han en a dam dup mai; kohhran hruaitu zinga tel ve mai awm tak, mi fel tak ni mai awmte hi an tlat ṭhin a ni.
Kan ram ngei pawh hi sum duhamnain kan khat tual tual a, pawisa hmuhna tur a nih chuan ringtu tiha mawi leh mawi lo pawh kan thliar tawh lo. Sum kan hmuhna tur a nih chuan a bawhin kan bawh huam huam ta mai zawng a nih hi. Isua zirtir zinga Juda Iskariota lo tel ve pawh hi Pathian thuin zirtir tur min neih vang a ni ngei ang. Isua phei hi chuan pawisa a sawi dan hi – sum lem a ti kher a ni; kan mamawh tawk bak duham lo turin min zirtir nasa hle. Mi retheite lah an rinawm na hek lo va, a hausa lahin duh chin tawk an nei hek lo. Hei hi kan Kristian rama mi ṭhenkhatte dinhmun a nih tawh avang hian dan bawhchhiatna hi chu a pung tulh tulh dawn a ni. Tunah chuan poiliticsah pawh sum duhamna tel lova ram hmangaihna tak tak nena ram hruaina hna thawk ngam kan mamawh hle mai.
Juda Iskariota anga a tira Isua’n amah zui tura a thlan ni ve si, sum duhamna avanga Lal Isua hralhtu, phatsantu hi kan ramah eng zat tak awm ang i maw? Sum duhamna hian kan ram hi min eichhe mek a, therhlo laka inthiarfihlim ngam khawpa huaisen, mi dangte aia danglam ngam, Isua zuitu, a tawp thlenga tuar ngam hi kan ram hian a va mamawh em! Mite mithmuha mi thianghlim leh fel, ringtu ṭha nia lang, mi te mithmuh lohva ruk ruk hreh hauh lo nun hi kan paih ngam a, kan hnawl ngam a ngai ta. Juda Iskariota hi kan thiam lovin, kan lo dem viau pawh a ni thei e. Nimahse, Juda Iskariota aia nungchang bawlhhlawh leh duham, Isua hralhtu hi kan lo ni reng thei a ni. Kan rama sum thianghlim lo chheprelh awm ṭhin nia lang hi a chanve chauh pawhin lo kiang ta se, kan ram hmasawnna chu (tute emaw tih dan takah) a zuan zuanin a zuang ngei ang. Zoram mipuite hi harh ila; thinlung kehsawmin, thil dik lo chu sirah hnawl ngamin, simna tak tak nen Lalpa I au teh ang u.
 
- Reuben Lalnunthara Hnamte

﻿﻿- Reuben Lalnunthara Hnamte

JUDA ISKARIOTA

Kan khawvel hmasawn­na hi a zuanin a zuang mai a ni tawh lo, a thlawh­in a thlâwk tawh a ni ber e! Khawlthlûaknei (Com­puter) chhûngah hian khawl thlûak chak lehzuak a la awm ta cheu a. Chu khawl thlûak tha zet mai chu Artificial Intelligent (AI) an ti a. Chu AI hmang chuan tunhnaiah khan mihring leh kháwl (AI) inbiakna bâwm an siam leh a, chu chu ChatGPT an tih hi a ni. 
ChatGPT hi a lampum chu 'Chat Generative Pre-training Transformer' a ni a, he software kaltlang hian Artificial intelligent (AI) an tih mai chuan kan zawhna leh hriat duh apiang kha chawp leh chilhin min rawn chhang nghal zat zat thei a ni! A thlawnin a hman theih a, version thar an siam zel a, upgade version erawh chu a man chawia hman a ngai thung. 
ChatGPT chu engnge?
ChatGPT an tih chu OpenAI behchhana chatbot an siam a ni a, inbiakna leh indawrna bâwm a ni ber ang chu. Nikum (2022) November ni 30 khan he khawlthlûaknei nena inbiakna bâwm hi hman theiha hawn a ni a. OpenAI corporation chhunga a chungnung ber GPT 3.5 leh GPT 4 version hmanga duan a ni a, 4 foundational large language models (LLMs) an tih hmanga thuam niin, khawvel tawng chi hrang hrang lar zual khung vek a ni a. Awlsam takin an tawng hriat duh zawngin an zawhna zawng zawng hi AI hian a chhang thei vek a ni. 
Zawhna leh hriatna dik leh rang taka a chhan zung zung theih avangin ngaihven a hlawh hle a. He ChatGPT an tlangzarh hnuah hian nasa takin he thil hian ngaihven a hlawh a, kumin 2023 ah phei hi chuan he thil avang hian OpenAI hlutna chu US Dollar billion 29 ah a kaichho tawh a ni.
ChatGPT hi a tirah chuan GPT 3.5 version hmanga tlangzarh a ni a, mahse reiloteah a khawl hi tichak lehzualin GPT 4 version in thlak a ni a, he GPT 4 version hi kumin (2023) March 14 khan tlangzarh a ni a, he version thar hi chu pawisa chawia a software hi hman theih tura duan a ni zui bawk.
ChatGPT chhung chu le...

He inbiakna bâwm chhungah hian mihringin an hriat duh eng thil pawh zawh theih vek a ni a, chu chu khawlthlûaknei (AI) chuan a rawn chhang thin a. Rimawi lam a ni emaw, sports a ni emaw, Pathian thu leh khawvel lam zai thlengin eng subject pawh he bawm chhungah hian a inbilh lut vek a. "Krismas sermon han ziak teh" tih pawh han type ringawt la, zanhnih khat sermon daih tur chu minute khat pawh tling mang lovah a rawn ziak nghal zung zung mai ang. 
ChatGPT hi a kimchang­in a hawl zau hle a, computer program a ziak thei a, a debug thei a, celebrity CEO te style a entawn thei a, business pitch a ziak thei a, rimawi, teleplay, lasi thawnthu leh zirlaite essay thlengin a phuah thei a. Test zawhna a chhang thei bawk a, a chang chuan test a zirin mihring pangngai aia sang levelah a awm thei bawk. ChatGPT hian chatbot dang chaklohna pakhat chhânna dik lo leh rin tlák loh pek thin lakah nasa takin a tha fál nalh a. A tum ber pawh chhánna dik leh rin tlák pek a ni.
He inbiakna bawmah hian i lut ve duh anih chuan Chat.openai.com ah khan lut la, khatah khan log in ve a ngai a, email ID leh password siamin i inregister ve ang a, tichuan chu khawl­thluaknei inbiak­na bawmah chuan an lo lawm­lut ve mai dawn che a ni. 
Member thar i ni tih tumahin an hre chuang lova, inthlahrung lo takin i zawh duh kha chatbot-ah khan i zawt mawlh mawlh thei a, AI chuan rang takin a rawn chhang nghal miah miah mai ang che. I zirlaia i hriat thiam loh pawh kha han zawt la, a mawi tawkin a rawn chhang nghal zung zung mai ang che. 
A ṭhatna: ChatGPT hian kawng tam takah ṭhatna leh awlsamna a hring a. Kevin Roose-a chuan The New York Times-ah heti hian a ziak a, "Mipui vantlang hmuha Artificial Intelligence chatbot tlangzarh ṭha ber a la ni," a ti. Hriatna bawmpui tih takah kan hriat duh apiang he chatbot-ah hian a zawh theih a, information rang leh chak taka chàk làk nan chuan hmanraw ṭangkai elhkhen a ni. Chawp leh chilha kan hriat duh min hrilh nghal zung zung theih avangin hmanhmawh thilah a ṭangkai zual a. Zirlai leh research tite tan pawh puitu ṭangkai tak a ni ngei ang.
He thu ka ziah lai ngei ngei pawh hian "ChatGPT hi eng nge a ṭangkaina?" tiin ka han zawt chhin mai mai a, rang zetin heti hian min rawn chhang nghal par par mai!
As an AI language model, ChatGPT has several advantages, including:
a) Wide range of knowledge: ChatGPT has been trained on a large corpus of text data and can provide information on a wide range of topics, from history to science, technology, and popular culture. This makes it a versatile tool for learning and seeking information.
b) 24/7 availability: ChatGPT is available 24/7, which means that users can access it at any time and receive quick responses to their queries. c) Fast and efficient: ChatGPT is designed to provide fast and efficient responses to user queries, which means that users can get the information they need quickly without having to wait for a human response.
d) Non-judgmental and unbiased: ChatGPT is an impartial and non-judgmental source of information. It does not discriminate based on factors such as race, gender, or nationality and provides information objectively and without bias.
e) Personalization: ChatGPT can learn from user interactions and personalize its responses over time, providing a more tailored and personalized experience for the user.
Overall, ChatGPT provides a convenient and efficient way for users to access information and learn about a wide range of topics. A ṭhat lohna:
Thil engkim hian ṭhatna leh ṭhat lohna an nei vek a, he ChatGPT pawh hi a ṭangkaina mualah chuan ṭha elhkhen mah se, famkim erawh a ni bik lo. Chhanna dik lo pek chang pawh a nei ve tho mai. Online Technology blog pakhat, Mashable neitu Mike Pearle-a pawhin ChatGPT hnenah hian zawhna tam tak a zawt a. A zawhna pakhat, Central America rama ram zau ber, Mexico tiam lovin eng nge?" tih zawhna chu ChatGPT hian "Guatemala" tiin a chhang a, mahse Mexico dawta ram zau ber chu Nicaragua zawk a ni.
Zirlai leh research tite tan pawh fimkhur a ngai. Rinrawl bera neih atan chuan a him lem lo. Kumin January 2023 khan International Conference on Machine Learning (Khâwl thil hman chungchanga inkhawmpui lian) chuan ChatGPT ina chhanna a pekte hi document rintlak atan chuan hman loh a him tih an pass a, abikin zirna paper submit tur chi angah chuan hman a rem loh thu an pass nghe nghe. Australian MP Julian Hill pawhin an ram parliament-ah AI lo ṭhang chho zel leh hmasawn zel chu chhiatrupna (mass destruction) thlen thei a nih thu leh inven a ngaih thu a sawi bawk.
March ni 28, 2023 khan Elon Musk leh Steve Wozniak te chuan thuchhuah inṭawm siamin 'Future of Life Institute' tih thupui hmangin AI experiment zinga ChatGPT chu vantlang leh mihring tana him tâwk lo an tih thu leh AI hmanga chatbot chu chawlhsan rih tura an ngenna thu an ziak.
ChatGPT hian ṭhatna tam tak a neih laiin fimkhurna tur pawh tam tak a awm. Pathian ang maia engkim hria anga ngaih tur a ni lo va, khâwl a ni tih hriat reng tur a ni. Hmasawnna reng reng hian ṭhatna leh ṭhat lohna a nei vek kan tih kha, a pawimawh chu a lo dawngsawngtu mihring bawk hi a ni.
 Khawl ṭha elhkhen pawh ni se, kan hman thiam si loh chuan min tichhetu, vanduaina min thlentu a ni thei. Chutiang bawkin heng hmasawnna thil chhuak tharte hi a hmang thiam tan chuan rual khum áwk áwkna tham khawpa ṭangkai leh puitu an ni thei.
Khawvel thiamna leh hmasawnna hi ṭhang chakin advance hle tawh mah se la, siamtu kutchhuak mihring thluak ang tluka chak leh thiltithei erawh hi chu a la siamchhuak thei lo va, he thluakin a neih, chhia leh ṭha hriatna thiang (conscience), a ṭha leh ṭha lo thliar thei tura uluk taka duan, awmze neia siam erawh hi chu a la pha thei chuang lo. Khâwl siamchhuah chu ropuiin changkang hle mah se, a siamchhuaktu mihringin a control thei a, a siamchhuaktuin a tih tura a duan ang bák a ti thei lo.
Kan Bible chuan 'Pathian âtna chu mihring finna aiin a fing zâwk' a ti a. Hei hi a dik hle. Mihring finna sâng ber pawh hian Pathian âtna hi a tluk thei ngai lo vang.
 Kan Pathian hi chu chungnung deuh asin!
- PC Nghaklianmawia

- PC Nghaklianmawia

Hringnun: CHatGPT i hmelhriat ve tawh em?

Tun ṭuma mi chu Lunglei lo chhuahna bul lam ve thung a ni. A ṭobul chu hei hi a ni. Seipuia (Theiriat Bul Zaupui Lal) chuan a pa, Lutpawrha ram a rochun ram a ni. 
Kum1889 kum bul lamah Gen. Treager-an Seipuia ram hi in benbel nan Capt. Shakespear leh C.S. Murray-te tirin a dil a. 
Pek a nih hnuah November 1889 khan Saikuti Hall tlang hi rawn thlengin an in bengbel a. A ram hming put sa chawiin Fort Lungleh (Lunglei kulh) an ti a. Chutatang chuan a khaw hming atan pawh, 'Lunglei' tih a ni ta a ni. 
A AWMNA HMUN:
Saikuti Hall awmna zawn, khaw chhak lam kawr ruama awm a ni. Lunglei Ramthar Veng hnuai lamah kalin, motor-in minute 20 vel lek kal a ni. 
LUNGLEI CHU: 
Lunglei hming put chhan chu i zuk thlen chuan, kawr ruama Lei indawh zui turah ngai lo la, lei tih ve theih tur hian, kawrah lungpui lianpuiin kawr hnawh phui si lovin, chu lungpui hnuaiah chuan tui a luang tlang a, chu chu Lunglei ti Lunglei-tu chu a ni. 
A HMUNHMA: 
He Lunglei hian mi hlut a hlawh avangin a bul vel pawh Sorkarin an thiam tawkin an chei ve a. A entu chawlhna hmun turte, a en nawm nan tih ni awm tak, Lunglei thlangah Lei siamchawpte a awm. A hmunhma chei nana an sum sen hi a tlem lo tawp ang. 
A KALKAWNG CHU LE:
Lunglei khua hi, tlang dunga inrem phei zui mai a ni a. Tlang dung kawng tih loh chu, Veng inkalpawhna kawng hi a chhuk vut hlawm mai a, kawng zikzak awm ve lovin, chhuk vut hian kan Zuhrei haw lam kal vut vut mai a. Hruaitu hmasate khan Step an uar lutuk a ni maithei, motor a lo tam takah, chu Step chu thiatin, motor kawng atan an siam leh mai ni tur a ni. A chhuk vut vut hlawm khawp mai.
He lunglei kawng pawh hi, Ramthar Vengah chhuk vutin i pan ang a, veng chhung i pelh hunah a lo ziaawm tawh ang. One Way kalkawng zimte hmangin, cement a chhun kawng i zawh thla zel ang a, Lunglei i thlen hma KM 1.5 vel chu cement a chhun a awm tawh lo ang. Ruah tui tlak hnu chuan Motor a tlan ngam a ni lo. Ke in i kal thleng tawh mai dawn nia. 
KAN NGAIH PAWI­MAWH HMASAK NI THIN HI: Miten an hmuh chak leh Tourist te hip nana kan hmalakna reng reng hi, a kal­kawng lam aiin a hmunhma lo chei khalh hi kan ching khawp mai. Tourist spot kalkawng tha tak hi kan la nei reng reng lo. Kal ve theih pangngai bak hma kan la la lo. 
He Lunglei pawh hi, a hmun­hma chei khalh aiin a kawng siam hmasa ila, miin an hmuh duh chu Lunglei khu a ni mai a, a hmun hma chei lam chu kawng siam zawh lamah la ni chauh zawk awm kha a ni a, a hmun hma lo chei vel nana kan sum hman hi, kawng siam nan hmang ila, nuam takin motor in kan thleng ang a, mipui pawhin an tlawh huai huai tawh ang. Kan ngaih pawimawh hi a inlehkhalh zawng hian kan che ṭhin. 
Hmasawnna atan building ropui takte kan han sa hluai a, a kalkawng chhe zetin kan siam leh a, hman ṭangkai theih lohva building ṭawl ta pawh hi a awm nuk tawh mai. Development hi chu, kawng aṭanga ṭan chi a ni mawle. 
Engpawh nise he Lunglei panna kawng pawh hi cement a siam loh a thui tawh lo va, hma lak vat chi a ni ang, sum tam pawh a ngaih tawh hmel loh. Cement chhun kawngin a hmun a thlen hun chuan, mipuiin an la pan sup sup ang. 
- Lalrinliana Colney

- Lalrinliana Colney

LUNGLEI KAWNG BAWK KAN SAWI LEH ANG

Kan ram dinhmun kan hria a, veng leh khaw hrang hranga sorkarna fawng vuantute dinhmun pawh kan hre tlang vek awm e. 
Khawtlang hma­sawnna kan hmuh leh chhiar, kan hriat leh sawi tam tak, kan duh khawp lohna te hi tih reh thut theih a ni dawn lova, pawn lam aṭang ngat phei chuan heng khawihtute hian kan thu hla an ngaisang vak lo maithei a ni. Ngaisang se chu sum leh hna inmil lo hmuh tur a vang tawh ngawt ang.
In ṭhenawm khaw veng, chhak leh thlangah te khan han vak vel la, i lung a awi chuan a ṭha e. 'Hei ai hi chuan a la thawh ṭhat zawk theih ang maw le', i ti a nih erawh chuan bracket chhung aṭanga i chhuah a ngai tawh a nia aw... 
Kan sorkar kal tawh te, local poli­tician te, khaw hrang hrang party block/ unit hruaitu tam takin ram, khawtlang, mimal tan thil ṭha tam tak an lo ti tawh a, an hahna leh inpekna te a zahawm em em a ni. Heng, kan senior ho te pawh hi an hah ve tawh a, hnathawh kawr ha tute kan inchhawk tlan a ngai ve tawh a ni. 
He kan thil sawi mek hi indona mual a ni a, sual leh ṭha indona a ni. Hmasawnna hnathawh khawihtu tam tak te he indona field-ah hian chak lo zawkah an lo ṭang fo tawh a, ṭang mek pawh an awm ngei ang. Mi chak tak nih pawh a ngai lem lova, mi zeihawi tak nih pawh a ngai lem chuang lo. He ramah hian awm a, rinawmna um zel mi an pawimawh ta hle mai. 
Kum 2023 MLA election pawh kan lo thleng dawn hnai ta, tun aṭang hian bracket chhunga mite kan chet chhuah ve a ngai ta hle mai. Kan lo ral thlir leh ngawt chuan kan duh khawp loh te bawkin a nia kan khawtlang developement khawih leh dawn ni. 
Thla reilote danah hmasawnna te hi a ngaiah rawn kal sek se chu a la enliam theih a, mahse, kan step te, kan zunin, kan kawng siamte hi kum tam tak a tlak phawt loh chuan sum a rawn kal leh mai ṭhin si lo. Chuvangin a tira hna ṭha taka thawh hian kum tam tak a daih tih hre mi te, Zorama khaw hrang hrangte hian a mamawh a che u. 
Ramthar field a work camp zuk nei zeuh zeuh te aiin buh hmun ngeia missionary awm chilh tuten ring thar an sengkhawm zawk ang hian, aw nang ring he ram tan hian i ke rawn pen chhuak ve ta che. 
- Eddie Lalhmangaihzuala Huha

- Eddie Lalhmangaihzuala Huha

BRACKET CHHUNGA  MITE LO CHHUAK RU

Hmanlaia Chin-Kuki hnam an tih ṭhin kha tunlaia Myanmar ram Chin State leh Sagaing Region Kalay-Kabaw Valley, Bangladesh ram Chittagong Hill Tracts, India Mizoram, Tripura, Manipur leh Assam state-tea cheng tlang mite hi kan ni a, kan zavai huapzo hnam hming atan Chin, Laimi, Zo, Zomi, Mizo, Zohnahthlak, Chinlungchhuak tih hmingte hmang tura rawtnate a awm ṭhin. Hnam tin lungrual tlanna (Consensus) hming erawh a awm thei rih lo.
Heng Chin-Kuki hnamte hi hnam hlawm lian Mongoloid hnamah kan tel a, Mongoloid hnam peng Tibeto-Burman group-a mi kan ni leh a, Tibeto-Burman group ṭhensawm British hun laia Chin-Kuki an tih group-ah kan awm vek a ni. A hnuah Chin-Kuki tihah hian Lushai belh a ni a, chutichuan “Chin-Kuki-Lushai hnamte” tia sawi ṭhin leh hriat kan lo ni ta a ni. Chuvangin, heng article-ah pawh hian Chin-Kuki-Lushai hnam hlawm hming hi kan hmang dawn a ni.
Hman aṭang tawh khan, Chin-Kuki-Lushai hnamte hi thisena inzawm kan nihna kan hria a, a changin indo ṭhin mah ila, nupui pasalah inbiain kan innei tawn a, ṭampui mangan hunah kan inchhawmdawl tawn a, inpem tawnin, kan intlawh tawn fo ṭhin. Hmanlai chuan ram, entirnan Lai ram, Lusei ram, Mara ram, etc tiin Centralized Administrative System a la awm lo a. A khua khuain an awm a, khaw tinin lal an nei a, lalte chuan ram an nei a, khaw zalen (Independent City State) an ni vek a ni. British Empire chhunga kan awm chinah chauh, Chin Hills District, Lushai Hills District, Northern Arakan Hills District, Chittagong Hills District, etc tiin a ram leh District-tein ṭhenhran kan ni a, District-te chu Sub Division-tein ṭhen lehchhawn a ni bawk. Sub Division-te pawh Circle-tea ṭhen lehchhawn a ni a, Circle-te hnuaiah chuan hmanlaia Independent City Statete kha an awm ta a ni.
British sawrkar khan, chi leh ṭawngte a ngai pawimawh hran lo va, an rorelna veivahna awlsam zawkna ngaihtuahin, ramrite an ṭhen a, chuvangin chikhat leh ṭawngkhatte chu an ṭhendarh ta vek a ni. Chutiang a nih pawhin, British hunlai kha chuan, sawrkar pakhat hnuaia awm hun a nih a, Chin-Kuki-Lushai hnamte chu thisen zawmpui kan nih avangin, nupui pasal atan inbetawnin kan innei tawn zel a, kan tam hunlai pawhin kan inchhawmdawl tawn a, inpemtawnin, khapna dan awm lovin kan intlawhpawh chhunzawm thei a ni.
India leh Myanmar ramte zalenna (Independence) kan hmuh hnhuah erawh chuan, vanduaithlak takin, British hun laia British India leh British Burma ramrite hman chhunzawm a ni a. Chin-Kuki-Lushai hnamten India-ah emaw Myanmar-ah emaw awm lo va, British-ina a hrana awp turin an dil a, chutia awp chhunzawm a rem loh pawhin, Independent ram hrana siam ve turin an thlen a ni awm a, mahse a hlawhtling lo.
Chutichuan India-in zalenna a hmuh ni, August 15, 1947 zing ni lo chhuak chu, Chin-Kuki-Lushai mi tam takte chu mahni ram ngeiah foreigner kan ni ta a ni. Kilometer tlem te chauh hlaa awm Sabyh (Mara ram) khuaa a pu Sabyh lal hmu tura zin Zyhno (Mara ram) lal fapa chu a pu inah chuan foreigner a lo ni ta a ni. Myanmar-in January 4, 1948-ah zalenna a hmuh hnu phei chuan, Chin-Kuki-Lushai hnamte chu a nghetin ram hrana kan inṭhen hlen ta a ni. India leh Myanmar ramteah pawh chuan hnamkhat leh ṭawngkhat chu State hran leh District hranah belh darh leh zel kan ni ta a. Entirnan, Myanmar rama ṭawng hran neih Mara fate chu ṭawng dang hmang Township hran pathumah belh an ni a, an township tinah chuan minority an ni ta a ni.
Khatia thisen inzawm Chin-Kuki-Lushai hnamte ram hran leh sawrkar hrana dah a, ṭhenhran kha, British sawrkar, a hnuah India leh Myanmar sawrkarten Chin-Kuki-Lushai hnamte chungah pawi lian tak an khawih a ni a, sapṭawngin, “Crime against humanity” an tih a tling pha hial ang.
Awlsam téa ram khatah insuihkhawm leh theih a ni tawh lo. Nimahsela, thisena inzawm chikhat hnamkhat kan nihna chu India, Myanmar leh Bangladesh sawrkarten an hrethiam hle a, India leh Myanmar ramte chuan ramri aṭang ngil taka teha (thlawhtheihna thlawha a inhlat dan tehna) Km 16 thleng chu ram dang tlawh phalna (Visa) ngai lo va tlawh theihna (Visa Free Movement Regime) min siamsak a, kan intlawhpawhtawn zel theih a ni. Km 16 kan pelh ta a nih pawhin, sawrkarin haider zelin, kan inpemtawn pawhin min hrethiam zel bawk. Chuvangin, hemi chungchang takah hi chuan, Chin-Kuki-Lushai hnamten India leh Myanmar sawrkar chungah lawmthu sawi tur kan nei a ni.
Mizoram buai lai pawh khan, Mizoram aṭangin mi tam tak Chin State leh Sagaing Region-a Kalay-Kabaw Valley lamah an pem a, Myanmar rama Chin-Kuki-Lushai hnamte zingah an awm a, hun a kal zel a, Myanmar ramfa nihna (Citizenship) pawh an nei nghal vek a ni. An thlah ṭhenkhatte chu Myanmar national politics-ah Member of Parliament (MP) thlengin an ni thei. Chin-Kuki-Lushai hnamte chenna Bangladesh ram Chittagong lama pemte pawh, chutiang bawkin Bangladesh ram mi nihna an nei nghal vek bawk ngei ang. Myanmar ram aṭang pawhin Chin-Kuki-Lushai hnamte Mizoram lamah an lo pem thla zel bawk.
Chin State leh Sagaing Region-a Chin-Kuki-Lushai hnam zawng zawng khi Mizoram lamah lo pem thla vek ta se la, nuai nga chuang awrh an ni ang a, chu chu India tan phurrit a ni hran lo ang a, ram zau tak nei Mizoram tan pawh phurrit a tling hran lo ang. Chutiang bawkin India-a Chin-Kuki-Lushai hnam zawng zawng hi Myanmar ram Chin State lamah pem vek ta ila, chu chu Myanmar tan leh ram zau tak nei Chin State tan phurrit a ni hran lo bawk ang. Chu thil awmzia (Scenario) chu India, Myanmar leh Bangladesh sawrkarten an hria a, chuvangin inpemtawnna (to and fro migration movement) a awm pawhin, haiderin, pem thla leh pem chhoh tlem te te chu an va pemna ramfa nihna (Citizenship) pawh an nei thei zel a ni. Thisen chu ramri lui tuite aiin a tak zawk si a, chuvangin thisen inzawmte intlawhpawhtawnna leh inpemtawnna khapna dan nghet tak hman chu a ṭha ber lo ang tih India, Myanmar leh Bangladesh sawrkarten an hriat chian vang a ni ngei ang.
East Pakistan (Bangladesh) zalenna an sual lai khan, Bengali mi, abikin Hindu sakhaw betute) nuai 30 chuang Tripura, Assam leh Meghalaya State lamah an lo raltlan a. Tunah chuan India ram mi nihna an nei vek tawh. Mithiamten an zir chiannaah raltlan (refugee) tam zawk chu, an ram a ralmuan hnuah pawh, an ramah an let leh tawh lo. United Nations High Comission on Refugees (UNHCR) 2020 report-in a lantirnaah chuan, kum 2019-ah khawvelah refugee nuai 260 (26 million) zinga, 100 a 1.2 (nuai 4.2) chauh an ramah an let leh a ni. An rama lêt lote chu, refugee an nihna ram ramfa (Citizen) an ni nghal mai a ni.
Population tlem lutuk hnam nih chu hnam chak leh thiltithei nih a har hle. Mizoram pawh hi mi tlem te kan ni a, Lok Sabha (LS) leh Rajya Sabha (RS) MP pakhat ve ve chauh kan nei thei. Chuvangin national level-a awka (voice) kan neih tur angin kan la nei thei rih lo va, kan chak tur ang pawhin kan la chak thei rih lo.
Bible-in Israel fate tan hnam dang leh ram dang mi a tih chu, Israel hnam ni lo leh Israel hnam sakhua zui lote an ni. Hemi eng aṭanga thlir chuan, Myanmar lama Chin-Kuki-Lushai hnamte khi Mizorama Chin-Kuki-Lushai hnamte tan hnam dang leh ram dang mi an ni lo. Kan thisen zawmpui leh kan mi leh sate, kan chipuite an ni. Hemi avang tak hian a ni ang, sawi tawh angin, Bangladesh leh Myanmar aṭanga kan chipui Chin-Kuki-Lushai hnam kan State-a lo raltlan leh lo pemte kan humhim hi, India sawrkar refugee policy ding lai kalh mah se, India sawrkar chuan a hrethiam a, nakinah chuan India ramfa (Citizen) nihna pawh a phal mai thei a ni.
Tunlai Manipur buainaah pawh hian, kan thisen zawmpui Chin-Kuki-Lushai hmamte chanvo chhiatzia leh tuarnaa kan rilru natpuiin kan tuarpui hle a ni hi. Hetiang tur reng hi a ni, thisen chu ramri lui tuite aiin a tak zawk si a.
Pathian thuin, “Lehkha thu mai chuan a tihlum si ṭhin a, thlarau erawh chuan a tinung ṭhin a ni,” a ti a (2 Korinth 3.6). Heta lehkha thu hi dân sawina a ni a. Dân chu dân a ni. A dik. Nimahsela, kan hnam thisen leh kan Lalpa Isua Krista thisen zawmpui kan nih tlat avangin mihring siam sawrkar lehkha dânin Chin-Kuki-Lushai hnamte thisen inzawmna tihlum (ṭhiat) tum ṭhin mah se, Pathian siam kan thinlung leh thlarauin a tinung tlat ṭhin.
Chuvangin, thisen inzawm kan nihna hre rengin, Mizorama lo raltlan leh lo pem leh kan zinga khawsak duh Myanmar, Bangladesh leh India State dangtea kan chipui Chin-Kuki-Lushai hnamte chu pawm thiam tum ila, kan State ramfa (Citizen) an nih theih dan kawngte i zawnpui ang u. Thisen chu mihring siam chawp ramri lui tuite aiin a tak zawk a, ram dân ziahna lehkhatui ai pawhin a tak zawk si a.
- Laiu Fachhai