ZOFATE INPUMKHATNA – KAN HNAM DIN THAR LEHNA TUR
Zofate kan nihna leh kan inpumkhatna
Zofate hian hun kal tawhah hnam hming hrang hrang kan lo pu a, Chin, Kuki, Lushai, Mizo, Zomi, Lai, Hmar leh hnam hming dang tam tak kan nei. Heng hming hrang hrangte avang hian kan inṭhen darh a, kan thlahtu bul leh kan nihna dik tak pawh kan theihnghilh mêk a ni.
Kan thlahtu hming chu Zo a ni a, Zo, Dzo, Jo, Yo leh Zou tia sawi a ni ṭhin. Chuvangin kan zavaia kan nihna huapzo chu Zofate a ni. Kan ṭawng, kan hnam nunphung, kan sakhua leh kan khawsak dan a inang vek lo mai thei, mahse, heng kan danglamnate hian min ṭhen lovin, kan hnam hausakna leh chakna a ni zawk tur a ni.
Thing pakhat hian zar tam tak a nei thei a, mahse, a zung chu pakhat a ni. Chutiang bawkin Zofate pawh hnam hrang hrang angin lang mah ila, kan zung, kan nihna leh kan thlahtu bul chu pakhat a ni.
Ramri hrang hrangah awm mah ila, hnam khat kan ni. Tun dinhmunah Zofate chu India, Myanmar, Bangladesh leh khawvel ram hrang hrangah kan awm darh a, ramri leh ram rorelna avangin kan inṭhen darh rih a ni. Amaherawhchu, kan unau nihna hi ramriin a sut chah mai mai theih a ni lo.
Tuna kan chenna ram dan leh thuneihna kan zah tur a ni. Leilung ramri siam chawp hian min ṭhen hrang rih a ni thei e, kan thinlung leh unau kan nihna erawh a ṭhen ngai lo vang. Pathianin kan chenna atan min pek ram hi kan ram a ni a, Zofate awmna apiang chu Zoram a ni.
Pathian kohna – Zofate kulh chim din thar lehna
March 12, 2012 khan Pathianin ka pianna ramah kir leh turin min ko a. Nehemia chu Jerusalem kulh chim din thar tura a tirh ang khan, Zofate hnam kulh chim din thar turin min tir a ni. Kum 2016 aṭanga 2026 thleng hian Zofate hnam din thar lehna atan kum sawm chhung kan lo thawk ve tawh a. Lal Isuan Johana 17:21-ah, “An zain pumkhat an nih theih nan” tiin a ṭawngṭai a; Sam 133:1-ah pawh unaute inpumkhat taka an awm ho chu a ṭhat thu kan hmu. He inpumkhatna hi Pathian vision a nih tlat avangin kan ngai pawimawhin kan ngaihlu tur a ni.
Zofate Kristian kan nihna chu kohhran chhungah chauh ni lovin, kan hnam leh khawtlang nunah pawh a lang tur a ni. Pathian thu kan hril laiin hnam inhuatna kan nei reng a nih chuan kan Kristian nihna hian a tum a thleng lo tihna a ni. Pawl (denomination)-in min ṭhen darh a nih chuan Kristianna leh hnamah kan chiang lo tihna a ni ang. Zofate inpumkhatna hi Pathian ropuina leh a lalram zauh zelna atan a ni tur a ni.
Hun kal tawha hliamte tihdam a pawimawh
Kan hnam chanchinah inrem lohna, indona, politics avanga inṭhenna leh hnam hming avanga inhnialna tam tak a lo awm tawh a, hengte hi kan theihnghilh mai thei lo. Mahse, kan thlahte kal zelte hnenah inhuatna leh inrem lohna kan rochuntir zel tur a ni lo. Tun hi Zofate tan hnam zar peng inkara inhuatna tihbo a, inremna leh inpumkhatna din thar hun a ni. Kan lo inhliam tawhnate tihdam a, kan kulh chimte din thar leh turin kan ṭanrual a hun tak zet.
Chhuan tharte tana kan mawhphurhna hlen a ngai
Khawvel ram hrang hranga Zofate chhuan tharte hian thlahtu bul, ṭawng, hnam nunphung leh chanchin kan hriat a pawimawh hle. Kan hnam chanchin kan ziah chhuah a, kan pi leh pute thawnthu kan vawn nun a, kan ṭawng leh hnam nunphung kan humhalh tur a ni.
Kohhran, zirna lama mithiamte, hnam pawl hrang hrang leh ṭhalaite hian kan hnam inpumkhatna atan kan ṭanrual a ngai. Tunah hian technology avangin khawvel hmun hrang hranga Zofate inbiakpawh a awlsam tawh a, he remchanna hi inhuatna thehdarhna atan ni lovin, inpumkhatna leh inṭhian ṭhatna atan kan hmang tur a ni.
Hnam peng hrang ngaihtuahna leh tundin tumna aṭangin hnam pum ngaihtuahna leh dinchhuahna tura kan harh a ngai
Zofate hian kan hnam chhunga peng hmingte kan inzahsak zel tur a ni. Mizo inti chuan Mizo nia a hriat te, Hmar, Lai, Paite, Thadou, Chin, Kuki leh hnam peng dangte pawhin an nihna anga an lo inhriat kha kan inzahsak vek tur a ni. Mahse, heng kan nihna peng hrang hrangte khaikhawmtu, kan zavaia kan nihna dik tak leh a kungpui Zofate hi chu kan pawm tlan vek tawh a ni tih kan hriat a ngai.
“Eng hnam peng nge i nih?” tih aiin “Ka unau i ni” tih rilru kan pu tur a ni. Kan hnam leh kohhran hrang hrangte hian zirna, hnam nunphung humhalhna, khawtlang hmasawnna, retheite ṭanpuina leh remna siam kawngah kan ṭangrual tur a ni a. Inpumkhatna chu inkhawmpui neihna leh thu mawi sawi mai ni lovin, kan ni tin nunah a taka kan lantir tur a ni.
Zofate hnam thar din thar lehna
Tun hi Zofate tan hun pawimawh tak a ni. Kan hnam chanchin thar kan ziak dawn em, nge kan inṭhen darhna hlui kan chhunzawm zel dawn? Kan hnam hming hrang hrang anga kan lo hriat tawh avangin kan inhaw tur a ni lo. Hnam dangte’n ramri hrang hrang min siamsak avangin kan unau nihna kan theihnghilh tur a ni lo. Kan ṭawng, kan hnam nunphung leh kan ro hlu kan humhalh ang a, kan thlah kal zelte tan kan hnutchhiah tur chu thlahtu bul pakhat, nihna pakhat, hnam pakhata kan nihna hming chu Zofate a ni tih hi a ni. Tu dang kan ni lo, kan pu Zova thlah Zofate vek kan ni.
- Rev. Dr. Zaichhawna Hlawndo