Written by
- Hausanga Hauzel

AW ZORAM, LO DING CHHUAK RAWH

Mizote zingah hian politician thusawi thiam tak tak kan ngah hle mai a. Heng politician-te hian thu tak leh dâwt chawh pawlhin thiam tak takin thu an sawi ṭhin a, an thusawi han ngaihthlak hi chuan kan ram leh hnam hi an hmangaih hmel em em a ni. An kaihhruaina hnuaiah kan Zoram hi a dingchhuak ngei dawna ngaihna chinte kan nei fo va, nimahsela, an kuta kan ram rorelna kan han nghah chiah hian, dinchhuah chu khawi lamah, hnam boralna kawng min zawhpuiin chhiatna bawihah kan lut thûk tial tial emaw tih mai tur a nih hi.

Kan polician-te thusawi thiam avanga kan ram hi dingchhuak tur chu ni ila, hmân hmânah kan ram hi kan dingchhuak daih tawh ngei ang. Amaherawhchu, tun thlengin kan la dingchhuak si lo a nih hi.

Hun kal tawh a, kan ram hruaitute thusawi ṭhenkhat, kan ram leh hnam tana ṭha tura ka lo beisei vete chu, "Corruption a zung nen kan pawt phawi ang a, kan pho ro vek ang," tih leh, "Damlote inenkawlna tur, chhung tinte tan cheng nuai hnih kan dah," tih thu te kha, ka lo phurpui ve em em mai a. Nimahsela, thu chauh, hla chauh a ni ta si.

Corruption a zung nena pawh phawi chu khawi lamah, anmahni khan Zoramah hian corruption zung an kaih belh sauh sauh zawk emaw tih tur an ni si a. Damlo inenkawlna tur sum, chhung tinte tan cheng nuai hnih pawh hmuh tur a awm chuang hlei lo va. Leiba an ngahzia thu erawh kan hre thung si a nih hi. Anni khan corruption a zung nen lo pawt phawiin, lo pho ro ni se emaw, damlo inenkawlna tur chhung tinte tan cheng nuai hnih lo dah tak tak ni se la, Mizote hi kan thawveng ve deuh tur a nia le.

Nimahsela, thu chauhin ram an lo hmangaih a, a tak hmuh tur a awm si lo a ni. An kaihhruaina hnuaia kan ram thil tawn pawi em em chu, kut tling lova sum hmuh tumna chi an tuh hi a ni awm e. Mizote sum ngainatna bâwihah min hruai lut a, hlemhletna chi hrang hrang kan ramah a huangtau ta em em a, Setana thangah âwkin, corruption leh ruihhlo bâwihah kan kûn ta mai a nih hi. Kan mi hmasate’n, "Aw, Zoram, lo ding chhuak rawh," tia beisei taka an lo thlir chu hmânlai an chang zo ta si a. Dinchhuah chu khawi lamah a ni ringawt tawh a, sawi ngam chi pawh a ni tawh lo a ni.

Mizote hi Kristian kan ni inti si hian, thluaka sum lut kan tam em em mai a. Sum hmuhna tur a nih chuan ruihhlo pawh kan zuar hreh lo a, sum kan hmuh theihna tur a nih phawt chuan mi dangte chu chhe vek mah se la kan pawisa hek lo. Heti khawpa kan ram a chhiat hnu pawh hian kan sawrkar kal tate khan kan ram siam ṭhaa dinchhuahna kawng zawh turin mutmawh hnarmawhah an nei lo reng reng. Kan ram zim têa ruihhlo leh corruption hluar em emte hi thapui thawhin han do ni se la, dinchhuah lam kan hnaih tur a ni a. Nimahsela, sawrkar berin sual dona kawngah mit a siai tlat si. Kan ram chu ruihhlo leh corruption hluarna ram niin, thihnain thla a zar a, kan rûm vawng vawng ta mai a nih hi.

Hetia Mizote beidawng taka dingchhuak thei tawh lo tura kan inrin hial tawh hnu hian India ram state zinga corruption tlemna ber state kan han ni ta mai hi a lawmawm em. Hei hi Pathian malsawm rim nam chu a ni. Tun hma zawnga kan lo awh em em ṭhin, ram changkanga mipuite’n an dam loh nikhuaa an inenkawlna dan zûlzuia Mizoram Universal Healthcare Scheme (MUHS) kan han nei ta mai te hi, kan ram dinchhuahna kawng chu a van ni chiang em. Kan ram hmelma lian leh chimawm ruihhlo do beihpui Opetation Trident hlawhtling tak kalpui an ni leh zelte avang hian kan ram tan hian dinchhuah theihna beiseina lian tak min neihtir leh ta a ni.

Beidawng taka awmte tho ila, beiseina êng a lo lang leh ta. "Aw, Zoram, lo ding chhuak rawh. I tan khua a var dawn ta. Hun sûl ang a her liam a, lenkâwl a lo êng e."

- Hausanga Hauzel