Written by
- Ngura pa

MPSC ṭang fan fan

Mizoram Sawrkar, I&PR thuchhuah No 3116/2026-2027, Dated 13th November, 2026 chuan, “FCS&CA Department hnuaia Storekeeper hna thawk tura lak tharte tan training kalpui a nih mek laiin 12th November, 2026-ah khan Secretary, Mizoram Public Service Commission (MPSC) hnen aṭangin Storekeeper Written Examination Result FCS&CA DPC-in October ni 16, 2026 tlaia a dawnah mark tabulation tihsual (technical error) pawi tham tak a awm tih lehkha dawn a ni a. Mark tabulation-a tihsual palh a lo awm hi OMR Response Sheet Scanned Data Excel Sheet-a import-na lamah Invalid Roll No. seng luh tel palh vang nih thu tarlangin, he examination result kalpui zel dan tur hi thuneitute’n an la ngaihtuah ang,” tih leh, “Storekeeper recruitment kalpuinaah thil tihsual palh pawi tak a awm avanga harsatna tuartute zawng zawng chu sawrkarin a lainat tak meuh a, an ngaihdamna a dil tak meuh a ni,” tih thu chhiar tur a awm a.

Hemi chungchang hi tawi têin kan sawi zui lawk dawn a. Thupuia kan luh hmain MPSC din chhoh a nih dan han en hmasa lawk ila. India Danpui Part XIV, Chapter II, Article 315 aṭanga 323-in a tarlan angin Mizoramah pawh Public Service Commission din a ni. Kum 1987-a Mizoram state puitling a nih kumah khan MPSC din a nih theih nan Sawrkarin hma a la ṭan nghal a. Tih tur ṭul hang hrang a tih hnuah kum 1989 khan Mizoram Public Service Commission Regulation duan chhuah a lo ni ta a. Tichuan, kum 1991 May ni 1 a lo her chhuah meuh chuan Mizote zinga IAS ni thei hmasa 3-na, Pu SR Vala chuan Sawrkarin a ruat angin MPSC Chairman hmasa ber ni turin a hna a zawm a. Hemi ni hi vawiin thlengin MPSC din ṭan ni atan pawm chhoh a ni ta a ni.

Aw le, kan tumah kan lut ang. Mizoram sawrkarin DP&AR kaltlanga kaihhruaina a siam angin group C hnalakna turah reng reng question set hi MPSC tih tur a ni a, answer paper evaluation pawh ti turin a ngen theih bawk a. Chumi bawhzui chuan FCS&CA department hian MPSC-a ngenna a thlen bawhzuiin question setting piah lam, answer paper endik hna pawh MPSC hian a kalpui chho ta ni. A hriate sawi danin, hetiang chi hi FCS&CA department chauh pawh ni lo, department dangah pawh MPSC hian a buaipui fo bawk. Hetiangah hian personal interview atana koh tur chin candidate-te chu an mark hmuh zat tarlang lovin, in order of roll number (alphabetical order)-in department-ah thawn phawt ṭhin a ni a, personal interview neih hnu, final result siam hma siin an mark hmuh zat dik tak hi a concern department-ah thawn chauh ṭhin a ni. Chutianga hlawhtling taka department dang tan hna a thawh ṭhin tawh laiin, FCS&CA-ah erawh data export sual avanga harsatna a lo thleng ta hlauh mai hi a pawi hle mai. A tuartu tan a na vawng vawng dawn. Sawrkarin thiam takin, ruahmanna felfai tak hnuaiah thil a kalpui turah ngai ang.

Thil thleng tur a thleng zo tawh a, hetiang thil a thlen nawn tawh loh nan engtia hmalak nge ṭha ang tih lam kan en zui ang. Sawrkarin MSSSB a ṭhiah hnu leh group C hna lak kaihhnawih MPSC kuta a dah hnu hian a hna pangngai ni ṭhin (group A leh group B gazetted hna lak kaihhnawih chin) aṭanga tehin za zela sawmruk (60%) zetin MPSC hna a pun belh phah tih a ni a. Hemi hi a dik a nih ngat chuan an hna sensitive dan leh pressure nat dan nen thlirin, a hautak ve hle turah ngaih a ni.

Social media ṭhenkhata ka lo hmuh ve chinah, kum 2026-2027 kum chanve (April ni 1 aṭanga September ni 30 inkar) chhungin examination hrang hrang vawi 106 a buatsaih hman a. Heng zingah hian departmental examination leh group C hna lâk, a kaihhnawih department-te nena exam an huaihawt tlante pawh chhiar tel a ni. Hemi hun chhung hian advertisement hrang hrang vawi 82 tichhuakin, hna lakna hrang hrang atan result vawi 49 a tichhuak hman bawk.

Sawrkar kum chanve chhung hian personal interview ṭum 28 (ni 99 chhung) neih a ni a, DPC meeting pawh vawi 182 neih hman niin ka lo hmu. Heta an tarlan loh, LDC tana typing test te, skill test an huaihawt dan te, Police/Excise-a thawk turte tana Physical Efficiency Test (PET) neih te, UPSC aiawha Aizawla exam a buatsaihte pawh a la awm fo maithei bawk e. Kum chanve kal ta chhunga sawrkar pisa kai ni awm zat, ni 121 aṭanga chhût chuan MPSC hna lak tamzia leh hnathawh tur ngahzia hi pawn lam aṭang pawhin a hmuhpui theih ruai ruai awm e.

Engtin nge ni zel ang? A hnuaia mi te hi ka rawtna siam a ni.

1. MPSC-in examination a conduct ṭhin ṭhenkhat–departmental examination hi ATI hnenah hlan chhawn mai a ṭhain a lang. MPSC hian PWD, PHE, P&E leh IWR hnuaia SDO/AE (Mizoram Engineering Service)-te tan leh heng department hnuaia Junior Engineer tan te, Excise & Narcotics Department hnuaia ASI, Sub-Inspector leh Inspector te tan kum khatah vawi 2 (June/July leh Novemner/December-ah te) exam a buatsaih ṭhin a. Group A chin hlan chhawn a rem lo a nih pawhin group B chin tal hi chu ATI hnenah hlan chhawng ta se, MPSC hna hautak lutuk tur hi a phuhru ngeiin ka ring. Tun sawrkar kum kal mekah hian hetiang chi hi exam vawi 12 neih a ni tawh a, November/December-ah neih leh a ni ang.

2. Group C hnalak turah te a tam thei ang ber department-in examination leh answer paper endik hna thawk se. Question setting chinah hian MPSC hi insawrbing thei bawk se. A thawkte sawi danin, department lamin exam buatsaih leh answer paper endik hna thawk tura nasa taka an nawr chuan hnar harsa an ti ṭhin a ni awm e. Hna ṭul dang an ngah avangin department-te ngenna hi tun hnuah chuan hnar inthlahrung tawh lo se a ṭha ang.

MPSC hlutna

Zu rui pakhatin, “Ka bawnghnute in an sawi duh lo a, ka zu in chauh an sawi alawm,” a tih ang deuh khan, thil ṭha tam tak ti mah se, a thil tihsual a langsar em em zel mai a; hei hi a thawkte pawhin ṭan lak zual sauh sauh nan hmang se, fimkhur lehzual rawh se. Dik tak chuan kan ram ro hlu zinga pakhat a nih miau avangin tihsual chang awm bawk ṭhin mah se, hei hian a hlutna a hloh phah tak tak thei chuang lo. Mi ṭhenkhatin, “MPSC hi deh a khirh, a ngéng, a luhlul, ngaihdan sawhsawntir a har,” an ti ṭhin. Eng ministry emaw, eng party sawrkar emaw pawh lo ding se, hetia nghet taka nghîng mai mai lova MPSC a ding ngat mai te, state-a ruling party tumahin an duh lam hawi tura an kuai her thei ngai hlek lo te hi ngaihtuah chian chuan hlu tak a ni. Thawktute han insangmar lehzual se, tihsual awm tawh miah lo turin ṭan han la teh se. An tihsual an hriat chhuah rual ruala an puangzar nghal ngam ṭhin hi an fakawm. Chutihrualin, hetiang puanzar tur awm lo hi mipuiin kan duh ber chu a ni thung a, chutiang chu MPSC kan beisei dan pawh a ni bawk.

Ṭhalaite hriat hlawh tak, ‘I hlutna’ tih hla, Jaui sakah khan tu emaw mi hlu tak chungchang a sawi a. Khatiang deuh chiah khan, MPSC hi kan ram tan, sawrkar tan, hna zawng laite tan mai bakah, hna hmu tawh tan pawh a hlutna a sang em em a. Vawi 100 thil ṭha tih nei mah se, tihsual vawi 1 a neih chuan a ṭhil tha tihte aiin a ri ring zawk zel lo thei lo. Hei tak hi MPSC hlutna chu a ni daih thung. Khaw khata nula hmelṭha che fuh lo chu kar lovah a lâr hluai a, nula tlangchhuak lem lo che fuh lo chu tumahin an sawi zui chiam ngai lo. MPSC hi chu a hlut êm avang zawkin a tihsualah kan chuk luai luai zel lo thei lo a ni.

MPSC, i hlutna, i hum luah chhunzawm zel turin, ṭang fan fan rawh le.

- Ngura pa