Footpath zau hek hawkin aw
Assam Rifles chhuah-san tâk hmunte enkawl zui dan tur leh hmalak dan tur ngaihtuahtu Advisory Committee on Assam Rifles Land a awm a, chak takin hma an la mek niin a lang. AR hmun rau rauah, Lammual leh a chhehvel hi a zau lai ber leh hmun ṭha lai ber a ni bawk nen, mipui pawhin kan ngaihven lai ber a ni a, tunah sawrkarin hna a ṭan tawh pawh hi kan ngaihven tlang em em a ni.
Advisory Committee on Assam Rifles Land hotute November ni 2, 2026-a Chief Minister hova ṭhukhawm chuan Lammual chhehvela hmalakna kal mek an thlir a. He ṭhutkhawmah hian tuna kawngpui laih zauh mek chu zauh belh leh hret an rêl thute leh thil dang an rêl chungchangte media lamah kan lo hmu a. Sawrkar hmalakna a lawmawm em em a; hmalakna kal mek behchhanin duhthu i han sâm teh ang.
Tunah hian Canteen Kual chhehvelah kawngpui zauh mek a ni a, meter 14-a zauh tura tih tawh chu zauh belh leh hret an rêl niin a lang a, a lawmawm. Kawngpui zauh mek hi a zau thei ang berin ni se, tuna kawng awm sa sîra kea kalna (footpath) hi a zîm em em a, kawng zauh a nih hunah chuan footpath awm sa hi a zím berah metre 2 tala zau a nih theih nan kawngpui zauh mek hi zau hek hawkin ni thei se.
Tin, footpath awm sa zauh a nih bakah, kawngpui lehlam, tuna an laih zauh mekna lamah pawh hian footpath metre 2 vel tak bawka zau awm thei se a ṭha hle ang. Kawngpui zauh mekin footpath a ken tel nia sawi metre 1.5 hi chu a la zîm mah mah ang. Mihring kea kalte zalen tak leh him zawka an kal theih a pawimawh tak zet.
Sipai damdawi in awmna ṭhin tláng báwk têa 'Aizawl Square' siam a ni tur hi a ṭha tak zet. Mitthlaah Srinagar khawpuia Laal Chowk te, London khawpuia Trafalgar Square te, Beijing-a Tiananmen Square te a lo lang. Aizawl Square siam turah hian lirthei luh phal loh ni se, chutihrualin, rîkrum thilah pawimawhna a neih theih avangin lirthei tlan luh theiha siam erawh a ṭha ang.
Vanapa Hall kawt hi lungawi lohna lantir nan leh thil lawmna lam hawia punkhawmna atan hman a ni fo mai. Punkhawm a nih hian traffic a tih-jam nasat bakah, a châng chuan kawngpui danchah a ni ṭhin a, mipui tan harsatna nasa tak a thlen ṭhin. Vanapa Hall kawtah punkhawm a nih tawh loh nan a thlâkna tur ruahman a ṭul a, hmun ualau leh langsar, kawngpui dep maia awm, kawngpuia lirthei tlan tibuai lêm si lo a awm a ngai. Chutiang atan chuan Aizawl Square siam tur hi a thlakna tur ni thei se a duhawm khawp mai.
Hmasawnna tura hna thawh hrang hrangah hian thing kih a ngai nual ang a, eng emaw zat chu kih a ni tawh bawk. Mipui ṭhat tlân zawkna tur a nih phawt chuan thing kih hreh loh ni se, mipui pawhin hrethiam tlang ila. Roreltute lamin thing kih tâk aia tam zawk, Mizoram thing ngei awmze nei zawka phun an tum kha. Assam Rifles hmun ṭhina hmasawnna hna thawh turte hi tluang takin kal zel teh se.
- Zoramchhana