Written by
- Dr. C. Lalrampana

RAMRIA DRONE CASE: NIA-IN A HNUKDAWK

Tunlaia kan buaipui leh sawi nasat chu Mizoram-Manipur ramria drone rukru case a ni. Ramri venhimna, geopolitics, Russia-Ukraine indona leh India ramri venhimna zawng zawng a kaihhnawih a tih theih hial awm e.

He case-ah hian mi 7 man an ni a–Matthew VanDyke–American, Filmmaker, Military Trainer hlui leh Ukrainian mi 6 an ni. Anni hi March 2026 khan Mizoram leh Manipur ramri bula an awm laiin man an ni.

National Investigation Agency-in a puh dan chuan, Mizoram leh Manipur ramriah drone warfare technology drone hmanga indona thil an buaipui a, drone assembly equipment–drone siamna hmanrua an kawl. Communication jammers inbiakna tihchhiatna khawl an nei bawk. Hengte hi Manipur-a hnam leh hnam, chi leh chi inrem lohna, Meitei leh Kuki inkar buaina neih laiin a rûk a rala hralh tumah puh an ni.

Unlawful Activities (Prevention) Act (UAPA) hnuaiah man an ni a, Tihar Jail-ah dah an ni. November 10, 2026 khanNIA-in chargesheet a thehlut a, UAPA (Terror Act) puhna chu a paih ta tihna a ni thei mai em? Immigration leh visa dan bawhchhia chauha puh an ni ta lek fang thei. NIA-in terror thil tih finfiahna chiang a hmu lo a ni thei bawk. Delhi Court-in default bail a pe a, Tihar Jail aṭangin an chhuak ta der mai!

Mizoram tan eng nge a awmzia ni ta le? Kan ramri a pawimawh. Mizoram hi Myanmar nen km 510, Bangladesh nen km 318 ramri kan nei a, ramri hi India ramri venhimna atan a pawimawh ber pawl a ni. Khawvel ram hrang hrangin kan ramri hi an enthla reng a ni.

Manipur buaina nen a inkungkaih. Manipur-a Meitei-Kuki buaina hian Mizoram a nghawng nasa, raltlan 40,000 chuang Mizoramah an awm. Drone ang chi thil hi Manipur buainaa hman a nih chuan, Mizoram pawh a him lo ṭan tihna a ni thei.

Zalenna leh venhimna inkar hi ngaihven a hun tak zet ta. Ram dang mi an lo kal a, an thil tih kan hriat loh chuan kan ram a him lo thei. Mahse, mi dik lo ni lova dâwt phuah chawpa puh buai pawh a dik chuang lo.

He case-ah hian thu dik la chiang lo tam tak a awm. Anni hian drone an hralh tak tak em? NIA-in finfiahna a nei lo nge, a nei a, mahse, a puang duh lo zawk? Russia a inrawlh em? Anni hi anmahniin he thil hi an ti nge, tute’n emaw an a tihtir? Hengte hi court-in a la rel fel lo, thu chiang a la awm lo. Thu dik kan hriat chhun chu–NIA-in terror charge a hnûkdâwk, bail-in an chhuak, visa case chauh a la awm tih vel a ni.

Mizo tan zir tur a la tam hle. Kan pi leh pute hun aṭangin Mizote hi ramri vengtu kan ni. Nehemia 4:14-ah, "In unaute, in fapate, in fanute, in nupuite, in inte tan indo rawh u," tih kan hmu. Ramri venhim hi sipai hna chauh a ni lo. Chanchin kan hriat, mi mak kan hmuh, thil mak kan hmuh chuan sorkar hriattir hi kan mawhphurhna a ni. Mahse, ram dang mi kan hmuh apiang terrorist tia puh nghal a dik chuang lo a, thu dik zawn hmasak tur a ni. Mizoram hi ram zalen leh ram muanawm a ni a, kan ramri hi thianghlimin tak leh dik takin kan vawng reng tur a ni.

- Dr. C. Lalrampana