Written by
- Zodinsanga

MNF leh Ballygunge – A pawi lua e!

Chief Minister hmasa Pu Zoramthanga kaihhruai MNF sawrkar khan Ballygunge, Kolkata-a Mizoram House leh a hmun/ram, Mizo mipuite'n kan ui rawn em em chu an hralh a nih kha. A hnuah Pu Lalduhoma kaihhruai ZPM sawrkarin ram hralh chu tihfel vek a la nih loh avangin tihtawp tumin hma an la a, Calcutta High Court-ah an kal a, thutluknaah an lungawi loh avangin a hnuah an appeal leh bawk.

Mahse, Calcutta High Court chuan tun hnai mai, November ni 13, 2026 khan thutlukna a siam nawn a, Mizoram sawrkar dilna (appeal) chu a hnâwl nawn leh ta a. Kar 8 chhunga ram hralh leh lei chungchang bawhzui turin Mizoram sawrkar a hriattir bawk. Court meuhin thutlukna a siam leh takah chuan Ballygunge-a Mizoram House hmun hi kan chân hlen ngei dawn niin a lang ta! A va uiawm tak em.

Kolkata hi hun eng emaw chen kan lo awm ve tawhna a ni a. Kan awm ve lai chuan Ballygunge-ah leh Salt Lake-ah Mizoram House a awm a, New Town-ah hian Mizoram House a la awm lo. Ballygunge hi Kolkata khawpui laili a ni a, hmun changkang lai zinga mi a ni bawk a. Ballygunge-a Mizoram House hi kan awm ve laia Mizote'n kan belh ber a ni a, Mizote'n kan hmang ngunin kan hmang ṭangkai em em a, CMCS Ṭhalaite'n Pathianni tlai tin fellowship kan neihna hmun a ni.

Kolkata-a kan awm ve hma te, kan awm ve laite leh a hnu zelah pawh Mizote tan Ballygunge Mizoram House kha Kolkata-a Mizote inpui ber tak tak a ni a. Kan hun lai khan Salt Lake-ah Mizoram House awm mah se, Ballygunge House kan ngainat tak takna thinlung ang khan Salt Lake House lamah chuan kan pu pha lo deuh a ni.

Ballygunge hi Kolkata-ah chuan hmun laili a ni a, Kolkata khawpui chhung khawi hmun pawha kal turin hla lutuk a awm lo. Bazara kal turin a awlsam a, damdawi in hrang hranga kal turin a awlsam. Sawi tawh angin, hmun nuam lai, hmun changkang lai a ni bawk.

Hengte avang hian Ballygunge-a Mizoram House leh a hmun Mizoram sawrkarin an hralh ngawt mai hi chu a uiawm chuang a; khatiang hmun ṭha kha Mizoram hian kan nei leh tawh ngai kher lo ang. MNF sawrkar thil tih kha a pawi takzet a, kei chuan 'Mizoram mipui pawi an sawi a ni' ka ti. Min ṭâwmpuitu an tam viauin ka ring.

Khatianga hmun ṭha MNF sawrkarin an han hralh ngawt mai kha 'a mak' tih piah lam a ni a. Ka rin dan phei chuan MNF sawrkara hotu sang tak emaw, an vua leh vângte emaw zingah lo hlâwkpuitu an awm ve hi ka ring tlat nia! Hlâwkpui ve an awm ka tihna a ni lo va, ka rin dan ka sawi a nih chu. Ka rin dan hi a dik a nih phei chuan, sawi ngaihna pawh ka hre lo zawk e!

MNF sawrkarin Ballygunge-a Mizoram House leh a hmun an hralh hi a pawi lungrun hi a ni ringawt a; kei chuan ka ngaidam ngai lo vang.

- Zodinsanga