Aizawl Municipal Corporation

Aizawl Municipal Corpo­ration (AMC) executive coun­cillor atan tun hnai khan mi pathum lakluh an ni a; AMC mayor chuan, executive councillor an awm avangin AMC a chak phah sawt tur thu a sawi. 

AMC term hi kumin Decem­ber-a tawp mai tawh tur a ni a, September thla tawp lama executive councillor lakluh an ni chauh mai hi thil danglam tak a ni. He thil hi dan tihdanglam vanga tih theih chauh ni mah se, dan thara executive councillor ruat phalak an nih hnuah an inruat lawk lo a, term tawp dawna ruaia an han inruat lah hian titi a titam lo thei lo.

Aizawl Municipal Corporation kal tawh dan en hian mipuiin AMC an hmuh dan lam aiin a AMC-a councillor-te ngeiin AMC an kalpui dan aṭang hian an ngai hlu thiam tawk lo a ang a; AMC hmasa berah councillor-te'n a thlang tlingtu mipui lam zah loin an awmna an insawn kual nasa viau tawh a, tunah AMC term tawp dawna 'chak phah sawtna tur' an han inruat leh chûk chûk mai hian ngaih a tiṭha lo hle a ni. 

Nikum December-ah khan 'chak phah sawt' theihna turin sorkar chuan gazette-ah executive councillor pali neih belh phalna hi a lo pe daih tawh a, hri leng avanga in lakluh theih loh anga sawi ni si hri vei hmuh chhuah tam vanglai taka an han in lalut leh hnuhnawhte hian ngaihtuah a tithui tlat a ni. Engpawhnise AMC inthlan lo awm tur er vang ni lo, chak zawka hnathawhna turin AMC executive councillor-te hi ruat an nih ngei i ring phawt ang u. 

Municipal corpo­ration chak leh a ngaih­na hria chuan India ram khawpui tam takah thil thlak danglam thei khawpa chakin ro an rel a, hna an thawk a ni. Mizoram khawpuia kan municipal corpo­ration pawh hian hmasawn chho zelin Aizawl  leh a chhunga chengte dah pawimawh hmasain rorel ve se, political party ṭhatna lam aiin Aizawl ṭhatna dah hmasa ber zel se a lawmawm khawp ang.