Aizawl leh tui

PHE department chuan mipui hnenah hriattirna tichhuakin GAWSS Phase II, Dihmunzawl tui pump-na electric khawl lian pakhat chu September 15, 2023 tlai lam khan a chhia tih an sawi a, "Siam ṭha turin ngawrh takin hmalak nghal a ni. Hun eng emaw ti chhung chu phase-II aṭanga tui pump-na electric khawl lian E.M-I hmang hian tui pump theih a ni dawn lo. Tui sem lamah pawh harsatna a awm rih deuh dawn avangin mipuite hriatthiamna kan ngen," an ti.

Aizawl khawpuiah mihring an pun zel avangin sorkar tan pawh mipui mamawh tur tui pek sèn a ni meuh ta lo a, fur lai pawhin Aizawlah hian tui zuarten a hralh thei zel tho. Khawpuiah hian chhungkaw tam zawk mah hi mi in luah an nih hmel a, mahnia van tui tla dawnna nei lo, mi in hnuaia khawsa hi an tam tham hle. Heng mite tan hian sorkar tui sem hi innghahna a ni a, tui supply a ṭhat loh chuan chhungkaw tam takin buaina an tawk.

Sorkar kan beisei danah hian kan mamawhte min tihsak zung zung tura ngaihna a awm a, chutih laiin tui pek lamah hi chuan sorkar hian hmasawn a mamawh khawp mai. Tui lakna an buaipui laia mihring cheng zat leh tuna Aizawl khawpuia cheng zat hi a inthlau ta hle a, hei vang hian tui lakna lian leh ṭha zawk chu he khawpui hian a mamawh hle a ni.

Sorkar hian a ngaih pawimawh thilah chuan pawisa hi a nei thei reng a, sorkar laipui aṭang pawhin a dik chhuak thei ṭhin. Hetihlai hian Aizawl khawpuia tui hnianghnar taka a pek theih lohna hi a rei ta hle mai a, tui hnianghnara a pe chhuak thei lo a nih pawhin mamawh zualpui phuhru tur khawp tui hi pe thei se, khawl chhia avanga mipui tana harsatna a thlen loh lai pawhin sorkar hian Aizawl mipui kham khawp; tui thianghlim hi a pe chhuak thei ta meuh lo a, ṭan lâk a ngai hle a ni.