Ṭhiante hêk hreh lo ram hruaitu

ZPM Legislature Party (ZLP) leader Lalduhoma chu MNF party MLA ṭhenkhat chuan dan bawhchhiaa puhin, MLA aṭanga bàntir turin Assembly speaker Lalrinliana Sailo an ngen. MNF MLA-te chuan, Lalduhoma’n Indian Constitution 10th Sche­dule Para 2(2) a bawhchhia nia tarlangin, Lalduhoma chu independent ticket-in MLA atan thlan a ni a, MLA a nih anga a thil tih zawng zawngah party dang ZPM a zawma a lan avangin bàn turah an ngai a ni. 

MNF hi ruling party an ni a, eptu lama MLA pakhat an hêk hi paih lo ni ta ang se sorkar nam tluk theihna tur lam a ni lo a, ramin hma a sawn phah sawtna tur lam a kâwk lo a, a bial chhung mipuite tana ṭhatpui tur lam rim a nam lo bawk; eng ti kawng zawng pawha MLA aṭanga bantir hrim hrim tumna lam a kawk ber niin a lang. 

ZPM legislature party-ah hian MLA pariat an awm a, 2018 inthlan dawnah independent-a inziak lut mah ni se party inang hminga ding vek an ni a, symbol inang an hmang a, engkim an tiho vek. An tlin hnu pawhin an zavai hian ZLP legislature party chhungah awmin ṭha takin an bial ṭheuh an vil a, an phak tawkin ram rawngbawl hna an thawk niin a lang a; hetihlaia an zinga mimal pakhat chiah dan bawhchhiaa puh bika Speaker hnena a MLA nihna hlihsak tura an nawr hi Mizo leh Kristian thiltihah chuan inhmeh lo tak a ni. 

An hêk tak MLA hian a thlangtu mipui phatsanin pawl dang a zawm san lo a, chumi hre chiangtu chu Mizoram mipuite an ni a, a thlang tlingtu a bial mipuite’n an hre chiang lehzual ang. Chutihlaia inthlan hma aṭang tawha a awmna sa reng hming lama ṭawngkam a lo neihte ‘dan bawhchhiatna’ tia hek duhtu MLA rual kan nei ta mai hi a vanduaithlak hle a ni.

Politics-ah chuan inbeih hi thil thianga ngaih a ni a, MLA leh MP hial pawh inchhuhsak tumin an bei nasa ṭhin a, sorkar siamna tur leh sorkar paihthlakna tur a nih chuan thiam chikimin an rel ṭhin. Tun ṭumah hi chuan sorkar siamna tur lam a hawi lo a, sorkar paihthlakna tur lam a ni bawk si lo a, he MLA hi Assembly House-a thu a sawi zui zel tur huphurhna leh hlauh lâwkna avanga MLA aṭanga ban tura hêk nia ngaih theih turin a ruling party lam zawk an che chhuak hi a mak hle a ni. 

Mipuiin ring tawkin kan ramah MLA 40 kan thlang tling a, chung kan ram hruaitu zinga mite chet dan en hian kan ram kal dan hian ngaih a tiṭha lo. Lalna leh thuneihna neih theihna tur a nih phawt chuan engmah pawisa lo, elpuite tihchhiat theihna a nih chuan tih hreh pawh nei lo ang maiin kan hruaitute hi an lang palh thei a; mahni MLA puite ngei pawh ‘pawi lian tham a khawih ta’ tih lam sawi tur awm lo chunga MLA aṭanga bantir hial tuma hêk duh mai ram hruaitu kan nei hi a vanduaithlak a, ṭhangtharte hnenah kan ram hruaitute hian eng nge an hnutchhiah ang le?