Zirtirtute kan beisei dan

School Education Minister chuan Thingsat Primary School Diamond Jubilee lawmnaah zirtirtute fuihin, "Zirtirtute hi zirna sikul neitu thinlung pu an nih a ngai a, hun vawng dik leh sikula awm ṭha an nih a pawimawh avangin tun hnaia zirtirtu lakah a theih chin chinah a khaw mite lâk tum zel an ni," tiin a sawi.

Mizorama sorkar sikul zirtirtu zingah thawk ṭha tak tak, inpe leh taima em em an awm a, heng mite hi an hluin zirna chawi san kawngah mai ni lo khawtlang hmasawnna tur pawha mi thawh hlawk an ni. Hemi lehlamah chiah hian zirtirtu zingah thawk ṭha lo, inthlahdah, mahni post-a awm lo leh aikal lâk ching an awm bawk a, heng mite hi ram leh khawtlang tana mi hnawksak an ni.

School Education Minister neih pawhin fuihnaah zirtirtute chu hun vawng dik tura beisei an nih thu te, an sikula awm ṭha turtein a chah, hei hian kan zirna dinhmun dik tak a tilang. Hun vawn dik chungchang leh mahni hnathawhna leh eizawnna hmuna awm tura kan infuih tawh a nih chuan, kan dinhmun hi a hniam hle tih hai rual a ni lo a, quality education lam pawh kan la sawi phak meuh lo.

Kan ram zirna hian siam ṭhat a mamawh a, a lu ber aṭanga a hniam ber thlengin siam ṭha tura beihpui thlak a ngai. Sikul building tlabal lutuk siam ṭha tura sorkar laipui aṭanga sum kan dil chhuak thei lo leh rulh leh tur NABARD loan puk kan hman duh dan hian zirna kan dah pawimawh lohzia a tilang a, kan ram zirna siam ṭhat hi Mizoram siam ṭhatna tura hna hmanhmawhthlak a ni tih hriat thar a ṭul hle. Hei vang hian sorkar leh mipui pawhin zirtirtute laka kan beisei hi kan tisang ngei tur a ni ang.