Rs 3,00,000 sem tumin Rs 25,000

Supply Minister chuan, Mizoram ei leh bar leh sum leh pai dinhmun (economy)-in hma a sawn a, mipui an intodelh theih nan leh ei zawnna ngelnghet nei lote'n eizawnna ngelghet an lo neih theih nan SEDP chu sorkarin a ruahman tih a sawi a, "SEDP thawh thumna (Phase 3) pawh a tahtawla chhunzawm zel tura ruahman a ni a, Governing Board leh Executive Board-te'n an pawm tawh. Ṭanpuina hi la sem chhunzawm zel tur niin, Rs 3,00,000 thleng pek tum a ni," a ti.

Mizoram sorkar hian flagship programme a neih chu SEDP ni a, hemi chhunga mipui hriat hlawh ber chu Rs 3,00,000 sem tur thu hi a ni a, he thu hi kum 2018 inthlan hmaa MNF intiamna niin tuna kan Chief Minister hian a tlangaupui ṭhin. MNF chu an sorkar ta a, Rs 3,00,000 an sem thei ta lo a, Rs 25,000 in a tahtawlin instalment vawi hnihah an sem a, hei hi an la sem kim thei lo.

Mipuiin an beisei leh phût vang pawh ni lo, mipui hnena intiamna liau liau Rs 3,00,000 sem tihlawhtling thei loa Rs 25,000-a sem chunga term tawp dawna ruaia Rs 3,00,000 sem tum thu la sawi hi mipui zah lohna a kai thei lek lek em? Sorkar hian Covid-19 chhuanlamah a hmang fo a, a duhnaah chuan, 'Hripui karah hmasawnna kalpui a ni' tiin inzawrhna atan an hmang lawi si a, mipui chan tur pawisa sem theih loh chhuanlama Covid-19 hmang a, tute emaw contract thawh theihna remchanga pawisa pe chhuak reng thei sorkar kan nei niin a lang.

SEDP kalpui mêk chungchang sawi a, 'ei leh bar leh sum leh pai dinhmun (economy)-in hma a sawn a, mipui an intodelh theih nan leh eizawnna ngelnghet nei lote'n eizawnna ngelghet an lo neih theih nan,' tih phei hi chu thil sawi zahthlak tak tur a ni a, SEDP sum an sem dan pheuh pheuh leh an sem zat en hian, eizawnna bul ṭanna tur emaw, economy chawi kanna tur emaw chuan hman theih niin a lang lo a, Rs 3,00,000 sawi rik nawn pawh hi mipui bum nawn tumnaah a chang ang tih a hlauhawm ta hle.