Traffic Police-in ṭan la zel se

Tun hnaiah Aizawl khawpuiah Traffic Police-te'n ṭan an la thar hle a, parking hmun loa lirthei inhung an man a, hmun ṭhenkhatah lirthei document a fel leh fel loh an endik a; Aizawl khawpuia zan dar 8:30 hnu lama lirthei veivak lakah pawh khauh takin dan an kengkawh. 

Kan hriat ṭheuh angin tun hnaiah Bawngkawnah driver pakhat kutthlak avangin Traffic Police pakhat leh Police constable pakhat suspend an ni a, he mi hnu maia Traffic Police lamte ṭan lak tharna hmuh hi thil lawmawm tak a ni. Traffic Police-te'n khauh zawka dan lekkawh an duhna hi Bawngkawna thil thleng nena inzawmtir kher tum tur a ni lo ang a, kha thil thleng vanga an lo khauh thar ta a nih pawhin a lawmawm zawnga pawm a ṭha ang.

Traffic Police lam an khauh deuh loh chuan Aizawl khawpuiah lirthei a tlan hleithei ta lo emaw tih tur a ni a, India rama Traffic Police ṭha ber pawla chhal ngam kan nei chung pawh hian kan khawpuiin a zir loh avangin traffic a jam nasa ṭhin a ni. Covid-19 hri len avangin mipui an tawm im deuh a, chuti chung pawhin tun hnaiah chuan Aizawl khawpuiah traffic a jam leh ṭan ta. 

Traffic Police-te hmalakna hi 'phuba lakna' ang zawnga thlir loh tur a ni a, eng vang pawhin ṭan an la thar thei a, dan kengkawh tura ṭan an lakna hi dan pela an kalpui a nih loh chuan mipui vantlang ṭhatna tur zawk a ni ang. Mizoramah hian 'dan' kan sawi ṭhin a, a taka kalpui dawn chuan a harsatzia kan hria a, inhriatthiamna tel lo chuan kan tlin lo fo ṭhin. Hetihlai hian inhriatthiamnaa kan kal zel chuan dan hi dan a tling zo lo ve fo a, chuvangin Traffic Police lamin khauh deuh hunlai an nei te hian thil ṭha a thlen i beisei ang u. 

Kan Traffic Police-te hian traffic dan fel taka kenkawh thupuiah neiin ṭan la zel se, dan pela chetna nei loa dan kengkawh tura hma an lakna hi chu mipui nawlpui pawhin an thlawp ngeiin a rinawm a, khawpuia lirthei mumal zawka a kal zel theihna turin taimak chhuah lehzual se a lawmawm ang.