PAHOSS hi eng chiah nge a nih?

Traffic jam tihziaawmna tura Mizoram sorkarin a duan, Parking House Support Scheme (PAHOSS) hnuaia ṭanpuina sum pek chhuah tura tarlan cheng nuai 6,139 aṭangin cheng nuai 1,124.80 pek chhuah a ni tawh a, cheng nuai 4,987 chu K-deposit-ah dah mêk a nih thu Deputy Chief Minister chuan a sawi.

PAHOSS hi Mizoram Chief Minister ngaihtuah chhuah a ni a, traffic jam tihziaawmna tura duan a ni. A kalphung en hian thil fuh tawk lo tam tak a awm niin a lang a, sorkarin mimal hnenah sum ṭhahnem tak a pe chhuak tawp mai a, sorkara sum kir leh tur a awm lo. State pachhe tak, sorkar laipui aṭanga sum lo kal ringa nung ni siin khawpuia mi hausa zawkte lirthei dahna tur sak ṭanpuina nuai tam tak tak pe chhuak thei hi kan ni chiah em?

PAHOSS hi a duan danah hian 'parking' tih a ni a, a hman dan hi chu 'garage' ni berin a lang. Traffic jam tihziaawmna tura kan mamawh zawk chu kawngpui lunlai leh chep laia lirthei hûn lawk theihna tur parking ṭha a ni a, tuna PAHOSS kalpui dan hi chu veng kilkhawr thlengin zana lirthei an riahna tur 'sorkarin a siam' a ni ber a, kawngpui lunlai aṭanga hmun hla tak takah mihausa in sakah garage sakna tur sum sorkarin a thawh ve a ang khawp mai.

Engpawhnise, PAHOSS hi a ki an lâk san tehlul nen an thlen chin hi a tawi a, lirthei dahna sa tura thlan 403 zinga mi 11-te building hawn a ni tawh a; tun dinhmunah hi chuan traffic jam tur chu a tiziaawm lem lo niin a lang.