Fisheries minister a fakawm

Fisherries minister chuan tun hnai khan Serlui B tuikhuaha Fisheries department-in Fish Cage Culture an siam a tlawh a, cage-a dah tur sangha chi chu a nih tur ang a nih loh avangin supplier-te chu an sangha chite hi lakir leh vek turin a hriattir. 

Mizorama thil thleng khat tak, state dang leh hmun danga thleng fo ṭhin chu sorkarin thil dik lo leh tling loa supply an hnawl ṭhin hi a ni. Mizoramah chuan an thil supply a chhe deuh a, a tling lo deuh a, supply tur an chhan laia a sample an pek ang a nih chiah loh pawhin thuneitu lam an tilungawi a nih loh pawhin thuneitu lamin an vei zui tak tak ṭhin lo. 

Tuna kan Fisheries minister hi chuan sangha chi supply reng reng a nih tur ang zel supply a nih loh chuan pawm a nih dawn loh thu sawiin, "Sangha supply kalphung pawh thlak danglam tum a ni. Sum tam tak senga hmalakna hi hlawhtling ngei se ka duh. Supplier-te'n sangha chi a nih tur ang ngei an supply loh chuan pawm a ni lo," a ti. 

Hetiang taka Fisheries minis­ter hi a kal tlang ngam a nih ngat chuan Mizoramah danglamna thlentu a nih theih a beiseiawm a, sorkar hmasa a ni emaw, sorkar awm tawh zawng zawng leh tuna sorkar meka department ṭhen­khatah supply ṭha lo leh contract hna fel lo leh hralh chhawn mai mai hmuh tur a tam hle a ni. 

Zep thu a cheng lo, tuna minister ni mekte zingah hian tun hmaa an hna pek dan leh vil zui dana hming ṭha lo tak takte pawh an awm a, hnathawk chi an nih laia an hnathawh dan leh hna hmuh dan thlenga sawi hlawh takte pawh an awm. 

Engpawhnise hetianga minister pakhat a huaisen ngam chuan a ṭha zawnga danglamna a thlen theih beisei ila, a minister dangte vengtu leh tihhmuhtu ni thei se, a term chhunga a huaisen tlang ngam a nih chuan khuareiah fak a la hlawh dawn chauh ang.