Tuikual South hmalak tumna

Tuikual South Branch YMA chuan September 25, 2023 aṭang hian Zodin Square leh Aizawl Tennis Court inkarah 'ruihhlo do leh veng humhimna beihpui' an thlak dâwn.

Tuikual South YMA chuan, Zodin Square leh Tennis Court inkarah hian ruihhlo a hluar hle tih tarlangin, "Kan veng chhungah zan khatah in pathumte rawk a ni. Kan man chhunte chu kan veng pawna mi an ni deuh zel," tiin ruihhlo zuar leh ruihhlo ti ṭhinte an punkhawm ṭhin avanga an harsatna tawhte an sawi.

He lai hmun hi Aizawl khawpui lunlai leh hmun pawimawh a ni a, sorkar hmun pawimawh leh sumdawnna hmun a nih bawk avangin mipui pungkhawm an ṭhahnem a, ruihhlo zuar leh ruihhlo ti ṭhinte pawhin remchanna an lo lei ve zel niin a lang.

Ruihhlo zuar leh ruihhlo ti ṭhin an punkhawm tam chuan rukruk a hluar duh a, ualau taka ruihhlo tih chingte an awm a, naupang zawkte mit hmuh phaka heng mite an awm tam hian naupang ṭhan lenna atan pawh a him lo.

Tuikual South-in veng chhung then thianghlim tuma ruahmanna an siam hi a lawmawm a, anni vengah hian veng pawn leh khaw dang aṭanga pungkhawm ṭhin an tam avangin a hna pawh a hautak hle ang. Sorkar lam pawhin helai hmun venghim tur leh vawng thianghlim turin ṭan la deuh se, hmun pawimawh leh lunlai hmun ṭawp tak anga lang hi a veiawm hle a ni.

Tuikual South khawtlang hmalak tumna hi a lawmawm a, hun leh tha leh sum a duh deuh pawhin tha thlah loin ṭang mar se, sorkar leh mipui nawlpui pawhin ṭawiawm thei ila, a lawmawm hle ang.