Speaker thutlukna Mizoramin a nghak

MLA aṭanga ZPM Legislature Party leader Lalduhoma bàn a nih theih nan MNF party MLA 12-te chuan tun hnai khan Assembly speaker Lalrinliana Sailo hnenah hêkna lehkha an thehlut a; MNF MLA zinga lehkha thehluttute hi MLA-a vawi khat tlinna vek an nih bakah - chief minister, deputy chief minister, speaker, minister, deputy speaker leh govt. deputy chief whip ni lo zawng an ni. 

MNF MLA-te chuan, Lal­duhoma'n Indian Constitution 10th Schedule Para 2(2) a bawhchhia nia tarlangin, MLA a nihna aṭanga bàn (disqualify) turin Speaker an ngen. Lalduhoma chu independent ticket-in MLA atan thlan a ni a, MLA a niha a thil tih zawng zawngin party dang ZPM a zawma a lan avangin bàn turin Speaker hnenah hian an hek ta a ni.

Hetihlai hian Congress party president leh kum 2018 MLA inthlana Serchhip biala Cogress party candidate ni bawk Lal Thanhawla chuan, MNF MLA-te chet dan chu Serchhip bial mipui bakah, Mizoram mipui zahlohna leh pawisak lohna lian tak a nih thu a sawi a, "Congress party tan ZPM hi hnawksak viauin lang mah se, mipui thlan tlin an nih miau avangin Pu Lalduhoma leh a thawhpui MLA-te hi ZPM MLA-ah Congress party chuan kan pawm thlap a ni," tiin MLA inthlan hma aṭang tawhin mipuiin ZPM mi leh sa an ni sa tih hre chungin an thlang a, Election Commission of India (ECI)-a registration an la neih loh avang chauha independent-a ding an nih thu a sawi a, MNF MLA-te thil tih chu a dem. 

Tunah chuan Speaker kutah engkim a awm tawh a, eng angin nge rorelna a kalpui dawn tih mipuiin an hre châk dawn hle a ni. Dan mit aṭanga thlirna lam hi mipui nawlpui chuan an hrethiam ve kher lo ang a, dan hre mite pawh an ngaihdan a inang vek lo ang. ZPM hi kum 2018 inthlan hma kha chuan ECI hriatpui loh an la nih avangin an candidate-te pawh independent-a din mai bak kha tih theih an neiin a lang lo a, tuna ZPM tana hna an thawh tak avanga ban tura nawrna awm hi thil danglam tak chu a ni awm e.

He thila kan ngaih pawimawh ber tur nia lang chu a thlang tlingtu mipuite an ni a, "Serchhip bial mipuite hian he thil hi eng angin nge an ngaih ang?" tih hi ngaihtuah tur a nih hmel. Anni lam hian an thlan tlin tâk an MLA hian a phatsan nia an hriat chuan independent-a ding chuan ZPM rawng a kai hi an dem tur a nih hmel a; nimahsela a thlangtu mipui lam ngaihdan pawh ngaichang loa eng emaw vang mai maia a paih theihna dan awm nia lang hai chhuah tumna hi chu Mizoram history-a chuang reng loa nawh reh theih ni se a ṭha ngawt mai.

Engpawhnise tunah chuan Speaker kutah hekna a lut tawh a, eng ang Speaker nge kan neih a, eng tin chiah nge a kalpui dawn tih Zoram mipuite'n an ngaichang mek a ni.