Ruihhlo zalenna ram?

Excise and Narcotics Department (END) chuan kum 2023 (January - August) chhungin ruihhlo hlauhawm heroine kg 63.37 an man tawh a, hei hi tun hnai kum thuma an man nen a inzat vêl a ni.

END hian heroin hi kum 2022 khan kg. 33.41 an man a, 2021-ah kg. 18.90 manin, 2020-ah kg. 11.70 an man. Kum thum chhunga an man zat belhkhawm hi Kg 64.03 a ni a, kumina man zat nen a intluk thuak a ni.

Kumin thla riat chhunga END man ringawt pawh hi a tam tham hle mai a, END ni lo Police department bakah Assam Rifles leh Customs official lam man a awm dâwn a, tlawmngai pawl mante pawh a awm bawk ang a, kan ramah ruihhlo a zalen hle tih hi phat rual a ni lo.

Kan khawpui berah chuan chhûn èn laiin khawlaiah ruihhlo an zuar a ni mai lo a, khawpui lûnlaiah an inchiu ngam ta hial mai a, heti taka kan rama ruihhlo a zalen ta mai hi a pawi a ni. Mawhpuh tur zawng duh tana kawh tur awlsam leh langsar ber chu sorkar a ni a, tun aia ruihhlo man tuma ṭan la nasa zawk sorkar chu awm se, heti em em hi chuan kan chhe lo ang.

He sorkar hian term tir lamah ruihhlo ngai enkawlna thuam ṭhata tih len a tum a, a hma aia lianin a inenkawlna lam an siam hi a lawmawm. Chutihlaiin a ruihhlo lut tur ven kawngah te, ram chhunga a darh zel tur ven kawngah tun aia ṭan a lak deuh a ṭul.

Dik tak chuan tlawmngai pawlte hi awm lo phei se; he ramah hian ruihhlo zuar leh ruihhlo hi an zalen hle dawn tih a chiang a, a hranpaa ruihhlo do beihpui thlak ngai hial khawpin kan khawpui hmun pawimawhte a ṭawp zo ta a, ṭan lâk kan ngai takzet a ni.