Free Inthlan leh social media

Kum 2023 hi Mizorama MLA inthlanpui neih kum a ni a, kum tawp lamah hian Mizoram kaihruaitu tur thlanna neih a ni dâwn. Hei vang hian social media lamah politics lam thu lêng vêl a tam tawh hle.

Social media hi hman thiama ṭangkai tak ni thei, hman thiam loha mahni tana chhiatna thlen thei thil a ni a, fimkhur a ṭul hle a ni. Fimkhur a ṭulna hmun ber hi kan fimkhur lohna hmun a ni tlat hi a pawi a, tuna kan kal dan en hi chuan tu tute emaw hi chuan nakina kan inchhirna tur thil kan thehdarh nasa hle niin a lang.

Politics hi ram rorelna a ni satliah lo a, ken tel tam tak a nei a, chu'ng zingah chuan a hamṭhatna tèl tumte nun a nghawng dan hi a langsar chu a ni. 'Politics-a eizawng' tih mai tur khawpa political party ṭan zawng an lal chânga hamṭhatna leh duhsakna ûm ṭhinte hian, an chak leh theihna turin theihtawp an chhuah a, thil dik lo hial pawh ti duh an awm a, social media-a dawt ngialngan theh darh duh thlengin an awm a, a zia lo khawp mai.

Social media hi political party lamin an hman thiam chuan an hlawkpui thei a, tuna party worker inti ṭhenkhatin social media an hman dan en hi chuan, anmahni party tán pawha hlawkpui tur ni lo hi a tam hmel a; politics kaihhnawihah hian social media hman hi fimkhur a ngai hle a ni.