Assam Rifles sawn chungchang

Parliament session neih mekah tun hnai khan Lok Sabha MP C Lalrosanga chuan, Assam Rifles-te Aizawl khawpui chhung aṭanga an awmna tura buatsaih Zokhawsangah sawn chhuah vat a ṭul thu a sawi a; AR insawn chhuahna tura Ministry of Home Affairs-in February 19, 2019-a hriattirna a chhuah tawh chu kengkawh thuai turin sorkar laipui a ngen.

Lok Sabha MP sawi danin, Zokhaw­sanga AR awmna tur in 327 sak zinga 289 chu AR hnenah hlan a ni tawh a, an awmna tur panna kawng pawh siam zawh a ni tawh a; nimahsela tun thleng hian AR-te hian Aizawl khawpui laili­ah bu an la khuar tlat a ni.

Khawpui chhung aṭanga AR-te insawn chhuahna tur hian kan sorkar neih tawhte hian ṭan an la hle tih chu phat rual a ni lo a, an awmna tur hmunte hial Zokhawsangah lei a ni a, an chenna tur in te pawh sak zawh thawkhat a ni tawh. Hei mai hi ni loin an mamawh angin power leh tuite pek an ni a, a panna tur kawngpuite pawh siam a ni vek chunga an la chhuak lo hi chu a mak ngawt mai. 

Kan chief minister ngei pawh an ṭawng sualtir tawh a, Lammuala Chapchat Kut lawmnaah Mizoram mipui hriatah AR-te sawn chhuah an nih tur thu hi a lo sawi tawh a; amaherawhchu AR chhuah tur thu a sawi hnuah kum a liam leh tawh a, tun thlengin an la insawn chhuak lo. Tunah kan MP-in Parliament House-ah hial India ram pum hriatin a sawi nawn leh bawk a, he ti chung pawha an chhuak lo a nih chuan kawng hrang hranga NDA sorkar thlawptu Mizoram sorkar tan chuan a tlawmthlak hle ang.

AR-te chhuahna turin engkim tihfel a ni tawh a, MHA ngei pawhin kum 2019-ah khan hriattirna a chhuah tawh a ni. Chuti chung pawha Parlia­ment-a nawr ngaia sorkar laipui an la awm hi hriatthiam a harsa a, NDA lam ṭang state sorkar kan neih hi hetiangah te hian lang thei se, kan khawpui laili aṭang hian AR-te hi min sawn chhuahsak thuai rawh se.