Ram lei chungchang

Centre for Environment & Social Justice chuan, ram pawn leh state dang aṭanga Mizorama rawn lutte'n, an duh ang anga ram an lei theih lohna tura dan kengkawh turin Land Revenue & Settlement (LRS) Secretary hnenah lehkha an thehlut a; tun hnaiah Mizoram pawn lam miten Mizoramah ram an lei huaiin ṭhenkhat chuan a huhoa chenna tur khawpa zau ram lei an tum niin an sawi.

Mizoram pawn aṭangin chhan hrang hrang avangin Zofate an rawn lut zel a, ṭhenkhat chu raltlante pawh an ni hlawm. Tun hma aṭang tawhin Mizoram pawn mite pawh ram lei an lo awm fo tawh a, tun hnaiah pêm lut thar an tam avangin a thawm a ring deuh pawh a ni mai thei a, ram lei leh hralh pawh a nghawng hle nia sawi a awm.

Ṭhenawmah ram a buai a, Zofaten an sahimna zawngin Mizoram an pankhawm mêk a, heng mite hi Mizoram mipui pawhin ṭha taka lo dawngsawngin chhawmdawlna pawh a pe hlawm a, sorkar pawhin a theih ang angin a lo tuam hlawm a ni. An awm ngheh hlen dan emaw, an inbenbel dan tur leh ram an lei dan turte hi ngaihtuah a ngai a nih chuan, dan ang zela kalpui hi a him ber ang.

Mizorama ram lei chungchangah hian sorkar dan dinglai a awm a, hei hi palzut loh a ṭha ber ang. Khawngaihna leh lainatna te, inhriatthiamna pawh thui tak kan nei a ni thei a; nimahsela sorkar dan dinglai a awm chuan chu chu bawhpelh loh a ṭha a, sorkar pawhin dan awm ang chu a kalpui tur a ni ang.

Zofa, mi mangang lo lutte thiam tak leh ṭha taka lo dawngsawng chung hian sorkar dan awm sâ anga ram lei leh hralh kalpui hi a ṭha awm e.