Sorkar sikul dinhmun ṭha zawk

Council of Minister tun hnaia ṭhukhawm chuan, Adhoc-grantin-aid-a awm mek sikul 180-te chu sorkar sikula dah (provincialised) a remti a, October 1, 2023 aṭanga kalpui tur a niin kum hnih chhung probation angin an awm ang a, kum 2025 aṭangin sorkar sikul tak tak an ni ang.

Sorkarin sikul 180 zet mai dinhmun ṭha zawka a dah sang hi thil lawmawm tak a ni a, a bîk takin zirtirtute tán a lawmawm zual ang. Khawtlangin rualawh avanga an din sikul ṭhenkhat hi hun rei tak chhung chu dinhmun ṭha lo takah awmin zirtirtu hlawh tur khawtlangin a tumsak hialte pawh an awm a, sorkarin dinhmun ṭha zawka a dah ta hi an lawmpuiawm hle a ni.

Hei hian ken tel a neih tur chu sorkar sum sen belhna lam a ni dâwn a, kan leibat zat leh kan sum indaih loh dan en hi kan sorkar hian kalpui dan tur ṭha tak a hre ngei a nih a rinawm.

Hemi piah lamah hian dinhmun ṭha zawka an kaisan hian zirtirna lamah pawh hmasawnna awm thei se, naupang result-ah pawh danglamna awm tel thei bawk se a lawmawm hle ang.