Health Minister thupha chawina ri a mawi

Covid-19 dona kawnga hlawh nei loa inpete chawimawina huna thusawitu Health Minister chuan, Covid-19 chu do fuh a harsa nia sawiin, "Indona dangah chuan silai tinna tur a chiang a, Covid-19 ah erawh chuan silai tinna tur hriat hleih theih a ni lo. Chêtsual a awl em em a, WHO leh ICMR pawh an che fuh thei lo. Ṭha tak tura an ngaihte a ṭha lo leh ṭhin. Chuvangin, tih dik loh tam tak kan nei ang," tiin an tih dik tawk loah thupha a chawi a, mipui hriat­thiamna a ngen.

Covid-19 avanga kan tha, hun leh sum kan sen hi a tam ta viau mai a, a ram pum mai ni lo khawvel pumin kan buai phah a ni. Mithiam tia kan hriatte pawhin a ngaihna an hre lo a, an rorel dan an thlak fo a, tihfuh loh sawi tur pawh a tam hle.

Mizoramah ngei pawh sorkarin ṭha tura a rel a tuk lawka a thlak leh mai te, thil kalpui dan tura a lo duan lawk sawiselna a awm avanga a tih chhunzawm loh te, hri dona kawnga remchang tura a ngaih a taka kalpuia a ṭhat loh zawk avanga sût leh tâkte a awm ta thluah mai. 

Hei hi khawvel hmun dang­ah pawh a thleng lo bîk lo a, Mizoram chu a vannei ber pawl niin he hri avanga thi pawh kan la nei lo. Heti chunga an tih fuh tawk loha Health Minister-in thupha a chawi hi a zahawmin a tilawmawm takzet a, insawifiah leh insawithiam reng renga ṭhenkhatin hun an hmanlaiin mahni tihdik loh pawm ngama thupha chawina ri hi a ngaihnawm takzet a ni. 

Hetihlai hian Covid-19 dona tura sum hmanna ṭhenkhat erawh sawifiah ringawta fiah tawk lo, hmun danga an zawrhna rate aia to uchuak taka thil lei a awm a, miin hri dona tura mahni sum an thawhlaia sum hmanna rinhlelhawm a lo awm tel hlauh mai hi a vanduaithlak hle a ni. 

Kan sorkar hian theihtawp chhuahin hri do kawngah ke a pen a, mipui pawhin mahni insengsoin kan ṭawiawm a, tih fuh loh palh awm kara thupha chawi ngam hi a huaisenthlak a, he hri dona kawngah hian i ṭang tlâng zel ang u.