Sorkar sum pûk

Reserve Bank of India (RBI) in a tarlan danin, kuminah Mizoram sorkarin open market borrowing (OMB) hmangin ṭum hnih sum a puk leh dâwn a, tun sorkar kum chhungin kum 2023 bikah cheng vaibelchhe 700 a puk dâwn tihna a ni.

Mizoram hi India ramah sum thawh chhuah GSDP aṭanga tehin leiba ngah ber state a ni mek a, tunah hian a puk belh leh dâwn ta a ni. Sorkar sum bat chungchangah hian inhnialna tam tak a awm ṭhin a, leiba ngah teh dan pawh mahni remchan ang angin kan hrilhfiah mai ṭhin a, RBI lamin a teh danah chuan leiba ngah ber state kan ni mêk.

Kan ram sum dinhmun en hian puk belh zel lo thei lo dinhmunah kan ding tihna a ni a, hei hi sum kan enkawl thiam loh vang bakah; thawh chhuah mumal nei lo state kan nih vangte pawh a ni bawk ang.

A sum hmuh belhna lam ngaihtuah si lo a, a hmanna tur lam kan insiam belh zel hian kan ram hmabak hi a thim hle ang ang tih a hlauhawm a, state inrelbawlna ṭha zawk leh sum enkawl dan fel zawk hi kan mamawh hle a ni.