Term tawp dawna thil khèk

Kum 2023 kum tawpah hian Mizoram Legislative Assembly inthlan neih a ni dâwn a, inbuatsiahna pawh kalpui mêk a ni. Tun hnaiah sorkar thil hawn thar, hna lak thar leh hmalakna thar hmuh tur hmun tinah ṭhahnem tak a awm.

Mizoramah hin inthlan a hnaih hian state sorkar hian thil hawn tur hi a ngah ṭhin hle mai a, hei hi inthlan dâwn hnaia hawn tura khek nge, an peih hunin a nang ve hrim hrim, tih erawh inhnial theih a ni ang. Building sak ang chite hi chu an sak zawh fel hmaa hawn chi a ni lo a, an sak zawh hun leh inthlan tur a rual a nih chuan sawisel ngawt chi a ni lo ang.

Chutihlaiin sorkar hnathawk tur lak tharte hi chu sorkar kum engtik hunah pawh lâk theih a ni a, term tawp dawnah hnathawk tur mamawh thar thut a ni ngai lem lo a, inthlan awm turah hna pek thar chhungkuate vote hmuh beiseina avanga an pe a nih chuan sorkar hna inpek hmanga campaign tihna a ni a, a fel lo hle a ni.

MLA fund hmanga hna thawh tur pawh kum li chhung khawih che mang lo a, kum nganaa kan thawk luai luai mai hi ram leh bial hmangaihna rawng a kai lo lek lek a, pawisa hmanna thuhmun pawh hi an hman hun leh an hman duh dan aṭangin a kawh tum a dang daih thei.