Zirtirtu dil belh

School Education Minister chuan tun hnai khan sorkar laipui dawrin Mizorama Hindi zirtirtu 855 aṭanga 812-a a titlem chu tipung leh turin a ngen a, Samagra Shiksha leh PM Poshan Scheme hnuaia sum la pek chhuah lohte pe chhuak turin a ngen.

Mizoram sorkarin tun hnaiah sikul ṭhahnem tak chu dinhmun sâng zawkah a hlangkai a, zirtirtute leh khawtlang tán thu lawmawm tak a ni. Hetih lai hian sikul dinhmun ṭha zawka hlankai zingah hian Siahaa Zasai Memorial High School chu; sikul awm tawh lo leh tawp tawh niin an sawi a, hei hi chiang zawkin sorkar hian ennawn se a ṭha hle ang.

Hindi zirtirtu kan indaih loh hle tawh hnua an rawn titlem hi a zia lo hle mai a, sorkar laipui lama Minister a zualko nghal pawh hi thil lawmawm tak a ni. Sorkar laipuiah NDA an sorkar mêk a, Mizoram enkawl mektu hi an thawhpui MNF an ni a, state sorkar leh sorkar laipui hi thawk dun an nih piah lamah NDA-a awm tlang vek an nih avang hian Mizoram duhsak pawh a phu a, hei hi kan hotute pawh hian an phût ngam bawk tur a ni ang.

Tunah phei chuan inthlan kan hmachhawn ṭep tawh a ni a, dan pangngaia thil a kal chuan sorkar hun hman mêk pawh a tawp lam a ni tawh a, chutihlaia Hindi zirtirtu min tihtlemsak hi a lungawithlak loh a, School Education Minister hi a thil dilah hian hlawhtling ngei se a ṭha ang.