Ṭhenawm driver-te kuta awm reng mai hi!

September 12, 2020 zana Lailapur-a Mizoram oil tanker tihchhiat leh driver kutthlak chungchangah Mizoram Oil Tanker Driver's Association (MOTDA) leh Silchar Truck Driver's Association (STDA)-te chu tun hnai khan an inbia a, MOTDA thil phût an tihhlawhtlin avangin Mizorama lirthei lut tur dan tumna awm chu  ṭhulh a ni.

Tun hnaiah hnam dang driver Covid-19 positive-te enkawl danah state ṭhenawm driver intêl khawm pawlin Mizorama lirthei lut tur an lo dang tawh a, he mi hnu hian Mizo driver chu kutthlak a ni leh bawk a; Mizoram driver lamin Mizorama lirthei lut tura dan an tintuah laiin Silchar lam driver-te'n Mizoram driver-te thil phût tihlawhtlingin inremna an nei thei ta a ni.

Mizoram awmna hmunin a zir loh miau avangin Silchar leh a chehvelte hian kawng hrang hrangah min tibuaiin min vau reng dawn tih chu thil chiang a ni a, tun hma aṭanga an chin ṭhan a ni. Hetihlai hian Cachar district-a hnam dang awmte chunga kan innghahna ai mah hian, anni lam hi keimahniah an innghat lian hial mai thei a, Mizoram tel loin an tan sumdawn leh sum hmuh a harsa hle ang. Hei hi hre rana thiam taka kan vau lêt emaw, kan tana ṭha tura ṭan kan khawh ve zel hi thil ṭul tak a ni.

A pawimawh ber chu state sorkar pahnihte thiam taka  indawrna leh inremna fel fai tak neih hi a ni a, state pahnih inkara buainaah hian tun hma aṭang tawhin kan sorkar hruaitu lu an indawr ngai lo a, district level-a official-te mai an indawr ṭhin avangin buaina hi a khat tawkin a awm nawn fo reng niin a ngaih theih.

Engpawhnise state pakhat ve riang ruang ṭhenawm state-a driver pawl pakhatin min vau ṭhin te, Assam-a district kilkhawr lama an pawl lian pawh ni loin min zar buai fo maite hi a tlawmthlak a, hetianga kan awm zui zel lohna tura hma la thei sorkar hi nei thei  ila a duhawm ngawt mai.