Faina leh Mizoram

October 2-9 chhung hi kum dang ang bawkin Faina Hapta a ni a, Mizoramah khawpui fai inelna kalpui tur a ni. UD&PA department changtu Deputy Chief Minister sawi danin,  khawpui fai intihsiakna chu Census 2011-in notified town atana a puan khawpui 23-ah kalpui a ni dawn a, zirna-in, sorkar pisa, damdawi-in, khua leh veng, khawlai, hotel, restaurant, bazar leh sumdawnna hmunte endik a ni dawn a; tunlai hripui léng mek do lêtna atana sorkar inkaihhruaina dan an zawm ṭhat leh ṭhat loh endik tel a ni bawk ang. 

Sorkar laipuiin India ramah faina beihpui thlakin Swachh Bharat Mission a kalpui a, sum leh pai ṭhahnem tak dah a ni a, hei hi Mizoramah pawh kalpui a ni. Heng kan sum hmuhte hi eng angin nge kan hman chiah a, mipui vantlangin a ṭhatna an chhawr phak tak tak nge tak tak lo tihte leh heng pawisa hlawm lian lo luh hnuah Mizoram hian faina leh thianghlimna kawngah eng ang chiahin nge hma a sawn, tihte hi uluk taka zirchian chhoh zel a nih a rinawm a; kan sum hman ralte leh a rah chhuahte pawh nakinah bûk a la ni chho zel ang. 

Tun hma chuan Mizote hi hnam fai taka sawi kan ni ngai lo a, Kristianna a lo luh hnuah erawh zawi zawiin faina leh thianghlimna kawngah hma kan sawn zel.

Swachh Bharat Mission a din hma pawha pawisa phût lo leh beisei miah loa khawtlang faina atana hnatlang ṭhin hnam kan ni a, mahni in seng­soa khawtlang faina tura lo bei tawh ṭhin kan ni. Hetihlai hian mihring chen tamna pawh ni lo, inenkawl harsa tak tur pawh ni si lo Mizoram hi India rama fai tehna hrang hrangah kan la tiṭha tawk lo a, sorkar lam pawh a ṭan lehzual a ngai a ni. 

Faina leh thiang­hlimna kawngah hian khaw tam tak chu sorkarin a nawr ngai loa entawntlak khawpa fai an awm a, khua leh veng ṭhenkhat chu an khaw hming leh faina a inzawm tlat emaw tih tur an ni hial tawh; heng khua leh vengte pawhin faina hi an kalpui thei a nih chuan, Mizorama veng tin leh khaw tin ṭang rual ila, sorkar lamin a tih tur ti bawk se, India rama state fai ber leh khawpui fai ber kan ni thei dawn lo'm ni?