CYMA-in tihhlawhtlin theih manifesto an duh; Rui ṭhin leh eiru candidate an duh lo

Central YMA chuan Mizorama inthlanpui awm tur pualin inthlan thuchah an tichhuak a; manifesto-ah a taka tihhlawhtlin theih ngei tur chauh tarlang tura political party-te an ngen bakah, zu ruih hmang, eirûk chíng leh nungchang thlahdahte vote lo turin mipuite an chah.

Central YMA inthlan thuchah hi ngun taka ngaihtuah chuan Mizoram dinhmun chiang tak pho chhuaktu a ni thei a, an duh loh an sawi zawng zawngte hi duh loh chhan an nei niin a lang. Tute emaw chuan inthlan dawnah vote zawnna atan mipui hnenah thil lian tak tak an tiam a, chu chu ring tawkin mipuiin an vote ta ngei a, thlan tlin an nih hnuah tihhlawhtlin theih loh chhan chhuanlam an siam ta a ang.

Thil ṭhenkhatah 'hripui lenlai pawhin hmasawnna châwl loin a kal' tiin chhuang takin kan sawi a, thil tih theih loh chinah hripui kan puh leh a nih chuan mipuia intiam tawh tihhlawhtlin theih loh chhana hripui puh mai hi thil awl tak ni tur a ni.

MLA atan zu rui ṭhin an duh loh thu pawh hi a khal ṭha èl àwl hle mai a, dan anga zu zawrh tihtawp a nih hnu phei hi chuan zu ruih chungchang hi sawi ṭul tawh lo tura ngaih a ni a, tuna MLA atana zu rui ṭhin duh lohzia CYMA-in a la sawi hial mai hi zu zalenzia sawina a ni tel thei ang.

Eiruk chungchang hi ngun taka ngaihtuah ngai a ni a, tu chin hi nge eiru chu ni ta ang le? An in leh lo, an thil neihte en mai pawha an sorkar hmaa mi nena inthlau lutuk te, chhungkaw eizawnna kan hriatpui reng chunga politician hausa uchuak kan nei ta fo hi eiruk vang a nih loh chuan chhan dang puh tur a vang hle.

CYMA hian inthlan thuchah hi a mawiah nei mai lo se, a taka tipuitling ngei turin huaisen takin ke pen ngam se, Mizo mipui thlàwp a hlawh ngei ang.