Lirthei endik versus a tlanna kawng endik

Mizorama lirthei kaihhnawih pawl intel khawm chuan Vairengte - Sairang kawng chu lirthei tlanna tlaka siam ṭhat a nih loh chuan October 9 aṭanga tlan loh an rel. Hetihlai hian Aizawl khawpuiah Mizoram sorkar chuan lirthei endik runpui a kalpui mek a, document felfai lote chu pawisa an chawitir ṭhin.

Lirthei neih man hi a to hle mai a, a lirthei leina senso piah lamah hian chhiah chawi tur a tam hle mai a, a bikin commercial vehicle-ah chhoah pek tur a sang zual. Dan dik taka chhiah chawi tur ang hi chu pek mai tur a ni a, chhuanlam siam a ṭha lo a, a lirtheia kan duh a nih si chuan lirthei kaihhnawih document hrang hrang neih kim hi chu a neitu bat a ni.

Hetihlai hian lirthei tlanna kawngpui ṭha zawk hi sorkar hian a siam ngei tur a ni a, lirthei tana tlan ngam lohna khawpa kawngpui kan nei chhe leh ta hi a lungchhiatthlak takzet a ni.

Congress-in rorelna vawn fung an chelh lai khan MNF-in kawng hrang hrangin lungawi lohna an lantir tawh a, tunah MNF-in sorkar an enkawl lai ngeiin lirthei tlan hleitheih loh khawpin hmun tam takah kawngpui a chhe leh ta a, kan châk lâkna kawngpui pawimawh ber pawh a chhe hle a ni.

Kan ram hruaitute hian lirthei document felfai lo an endik ang bawk hian lirthei tlanna kawngpui lam hi endik ṭhin se, lirthei document fel lo pawisa an chawitir ang hian kawngpui a chhiat hian a enkawtu sorkar zawkin pawisa chawi theih dan awm se a ṭha ngawt ang!