November 7-ah inthlan

Election Commission of India (ECI) chuan Mizoram Assembly General Election chu November 7, 2023-ah vote thlak a nih tur thu leh, December 3-ah vote chhiar a nih tur thu a puang. October 20 thleng nomination thehluh theih a ni dâwn a, inhnuhdawh theih hun hnuhnung chu October 23 a ni a, December 5, 2023-ah inthlan hi zawh fel tur a ni.

Inthlanpui lo awm tur atan hian political party-te chu hun rei tak chhung an lo inbuatsaih tawh a, vote hun puan erawh ṭum danga kan vote thlak hun nena khaikhin chuan a hma deuh. Engpawhnise, thuneitu sang lamin a hun an ruat tawh hi chuan kal tlangpui ngei a nih a rinawm a, vote chhiar hun erawh Pathianni a nih avangin sawn tura nawr ngei a ṭha ang.

Mizoramah chuan inthlanna thianghlim zawk a awm theihna turin Mizoram People Forum (MPF) a ding a, MPF hian hna ṭha tak a thawk. Chutihlaiin hmun ṭhenkhatah MPF hi khauh takin an kal a, hmun ṭhenkhatah chuan an inthlahdul deuh a, rualkhai takin kal thei se a lawmawm ang.

MPF chuan inthlan puan a nih hnuah house to house campaign a khap dâwn a, flag leh banner tar phal chin a bituk dâwn a, kawng tam takah ruahmanna a siam. Hengte hi a thuawih deuh tana hremna ang lekin a kal palh thei a, a bawhchhe huai deuh an awmin mi dang an chawlh ṭhup hnuah chu mite tana hlawkna zawngin a thawk thei a, hei vang hian MPF huaisen, taima leh khauh tak an awm a ṭul ang.

Inthlanin a ken tel fo thil ṭha lo tak mai chu pawisa sem a ni a, tunah chuan internet kal tlangin awlsam taka inthawn theih a ni. Hengte thleng hian MPF hian ngaihtuah tel thei se, inthlanna thianghlim leh fel fai tak awm ngei rawh se.