Inthlan campaign thianghlim se

November 7, 2023 hian Mizoram General Election neih a ni dâwn a, political party lam pawh an inbuatsaih nasa tawh hle. Mizoram pumah inthlan boruak a lian tawh a, Party mite campaign-a an ṭul vanglai a ni.

Inthlan lo awm turah hian Election Commission of India chuan bial khata sum ham theih zat a bithliah chu cheng nuai 28 a ni.

Inthlan a hnai tawlh tawlh a, titi leh thuthang hrang hrang a awm chho mêk. Kum dangah chuan pawisa semte leh therhli dang semte sawi rik ṭhin a nih laiin kumin inthlan turah chuan thil dang lian tham tak tak sem leh intiamna kan hre ta zel. Hengte hi ngun zawka chhui a, uluk taka inven a nih loh chuan state danga kan hriat ṭhin 'inlei tling' tih ang hi a awm ang tih hlauhawm tak a ni.

Mi retheite retheihna remchanga hmanga vote zawnna atana sum chelek hi tih loh atana ṭha ni mah se, a sum nei apiang hian an awmna party lam pawh ni loin sum hi an hmang chiam ṭhin a, hei hi chu tihtawp theih ni se a ṭha ngawt mai.

Inthlang tur kan nih hi kum nga kal ta aṭangin kan hre lawk tawh a, chumi hmachhawn tur chuan mahni theihna zawn ṭheuhah dik leh thianghlim takin kan thawk chhuak tur a ni. Chumi ni loa inthlan dawn hnaiha retheite retheihna remchanga hmanga sum leh thil dang hmanga vote zawn hi tihtawp ni tawh se a ṭha ngawt mai.