MPF huaisen ngam se

Mizoram People Forum (MPF) chuan tun hnai khan Annual General Meeting vawi 16-na an hmang a; Mizoram Legislative Assembly inthlanpuia vote chhiar ni atan December 3, 2023 Pathianni ruat a ni chu ṭha an ti lo a, sawn turin Election Commission of India (ECI)-ah ngen an rêl.

Inthlanpui lo awm tur hi thianghlim leh fel taka kalpui a nih theihna turin sorkarin theihtawp a chhuah a, chumi tichak turin MPF a awm hi a lawmawm takzet a ni. MPF hian inthlanna thianghlim a awm theihna turin tha a thawh nasa hle mai a, tun aia chak zawkin ke pen zel se a ṭha hle.

Tun hnaiah inthlan dawna pawisa sem inkhap leh inven a harsa chho tawlh tawlh dâwn a, internet hmanga pawisa inthawn a awl tawh avangin MPF pawhin inven dan a thiam a ṭul hle ang. Tun hma deuha vote thlak dâwn hnaia pawisa sem tur invenga duty ṭhin ang kha hmun tam takah chuan a ṭul ber lo thei a, inven dan ṭha zawk ngaihtuah a ṭul hle ang.

Sorkar tha chakna hmanga sem leh dawn theih thil pangngai a awm a, chutih laiin thil sem ṭhan ni lo sem te, thil sem dan ki dang deuhte a awm thei zel. Heng thilte hmachhawn a, a ṭul anga bawhzui tur hian MPF lam pawh an inbuatsaih zel a ṭha ang.

MPF leh political party thawhhona thuthlung awmte hi huaisen takin MPF lamin bawhzui zel se, a bawhchhe ngamte vanneihna lekah a chang palh thei tih hriain thuawihte tana campaign dan a chêp zawk lohna turin huaisen taka dan anga an hrut rual ngam a ṭha ang.

MPF dinna ni si, political party ṭhenkhatin an palzut ngam awm lo se, political party lam pawhin inremna thuthlung zawm thiam se a ṭha ang.