Vote thlâk - mi tin mawhphurhna

Mizoram Legislative Assembly inthlanpui kan hnaih ta hle mai a, chawlhkar thum chauhin a dang ta. Political party-te bakah pawl dangte leh an candidate turte pawhin chak ngei tumin theihtawp an chhuah mek a; mipui lam pawh inthlan lam kan hawi ṭhup tawh a, mipui nâwlpui pawhin inthlan tur hi kan ngaihven ta niin a lang.

Mizoram mipui hian sorkar ṭha, mipui náwlpui thleng phâk hmasawnna leh mi rethei zawkte'n hma an sawn a, nuam zawka an khawsak ve theihna tur thlen thei sorkar kan duh a. Mipui duhthusâm kan pe thei kher lo a nih pawhin, pawm tlân theih hmasawnna pek ngei tumna tak tak rilru pu chungin kan political party-te leh candidate zawng zawngte'n he inthlan awm tur hi hmachhawn ila a va lawmawm dawn em.

Mipui pawhin uluk takin rilru sêng ila, tu nge ram hruaitu atan ṭha ang, tu nge vote ila ṭha ang, tih ngaihtuah chungin vote thlâk ṭheuh tum ila. Pathianin kan ram hruaitu atana a ruatte thlang chhuak thei turin Pathian ráwn ṭheuh thei ila a duhawm hle.

Vote thlâk hi ram khua leh tui zawng zawng mawhphurhna, tih ngei tur a ni tih mi tinin hre thar leh ila, vote thlak ngei turin rilru kan siam a ngai. Vote thlâk loh hi intihtheihna chi a ni lo a, mi an lohna chi khat a ni zawk hial âwm e.

Sorkar hi mipui ta, mipui siam, mipui tana siam a ni a, vote thlâk lote chu sorkar siamtu an ni ve dawn lo. 'Sorkar hi ka ta a ni, ka tana siam a ni,' kan tih ngam vek theih nan vote kan thlâk tur a ni a, kan mawhphurhna a ni bawk a. Chuvangin, chhuanlam siam mai loin, vote thlak ngei turin tun aṭang hian inruahman ṭan ila a ṭha ang.