Lo hal hun

State Level Fire Prevention Committee rel angin, Mizoram puma kumina lo/huan hâl hun hnuhnung chu March 15, 2016 a nih thu Mizoram sorkar thuchhuah chuan a tarlang. Lengpui Airport-a thlawhna lut leh chhuak tur lo hâlin a tihbuai loh nan airport hnaiha lo hal turte chu tlai dar 3 hnuah chauh hâl turin a hriattir.

Lo hal hun hi sorkar hian a bithliah ziah a, mipui tam zawk chuan he mi chhung hian lo hal zawh hman tumin
ṭan an la ṭhin. Sorkar thuawih avangin a hun taka lo hal tuma theihtawp chhuah an awm a, hman lo chung chung pawhin dan bawhchhiat duh loh vanga bei an awm ṭhin a, a lawmawm hle a ni.

Hetihlai hian sorkar thu-chhuah zawm lo, lo hal hun bithliah pawn lama lo hal ṭhin an awm a, heng mite chungah hian dan anga engtin emaw hmalak zui a ṭha khawp mai. Khaw tinah village council an awm a, khaw ram chin an nei ṭheuh bawk a, an huam chhunga mite'n sorkar hun bithliah chhung ngeia lo an hal vek theihna turin ṭan la ṭeuh se a ṭhat a rinawm.

Tunah hi chuan a thuawih deuhin ṭan an la a, a ṭhenin sorkar thu an zawm lo a, hrem an tawk chuang lo niin a lang. Sorkar tan khaw tin vil kim sen a ni lo ang a; nimahsela village council tinte chhawr ṭangkaiin an hnenah lo hal hun ngai pawimawh lote hrem theih dan thuneihna sang zawk pe se la, chutih rualin sorkar hun bituk pawn lama lo hal awmna khuaa village council-te chu hrem theih ni ve thung se la a ṭha mai thei?

Sorkar hian thuchhuah siama bawhzui leh loh hi a ching a, lo hal hun hian thil tam tak nghawng a neih theih avangin a hun taka lo hal a nih theihna turin sorkar hian a thupek hi bawhzui rawh se.