Mi thiamte thiamna hman ṭangkai

Pachhunga University College (PUC) chuan khaw chuam (adopted village) atan Lungleng an thlang. PUC hian Village Adoption Project hi kum 2012 aṭangin an kalpui ṭan a, he project atan hian PUC-a zirtirtu zawng zawngte'n sum an thawhkhawm ṭhin a, chumi hmang chuan an khaw chuama harsatna tawh mekte zir chiangin, ei leh bar, zirna, hriselna leh thianghlimna kawngahte hma an sawn theih nan an pui ṭhin.

Mizoramah hian mithiam ni si an thiamnna chhawr
ṭangkai loh mi tam tak an awm a, kan hnathawh dan system fuh tawk loh vangte leh anmahni lamin an zir loh vangte pawh a ni tel bawk. Mi thiam ṭhenkhat chu sorkar hna an thawh hnuah an thiamna zawnah hman zui an ni lo a, anni lamin hlawh an hmuh tho avangin an thiamna tihpun chu sawi loh an thiamna chhawr zui miah loh pawh pawi an ti lo a, a vanduaithlak hle a ni.

Kan thiamnate hi mahni tana pumbilh a, mahni tan chauha hnathawh zui hi a awm thei a, ṭhenkhat phei chuan an zir thiamna pawh hmang chhuak loin an up ral a ni ber. Kan hnathawh dan kalphungah hian mahni zirna line-a kan zirte a taka hman nghal chatna ang zawngin hna hi kan kalpui lo a, a bikin sorkar hnaah phei chuan mahni thiamna zawn loa hna siamsak mi tam tak an awm ngei ang. Kan zirnate hi hna hmuhna tawk leka kan ngai a nih chuan a fel lo hle a, kan zir thiamnate hi a
ṭangkai zawngin kan hmang chhunzawm
ṭhin tur a ni ang.

Hetihlai hian tun hnaiah Mizo mi thiam ṭhenkhat, an thiamnate a ṭangkai thei ang bera vantlang tana hman duh mi an pung chho zel a, a lawmawm khawp mai. Pachhunga University College zirtirtute'n an tana hlawkna awm lo mai ni lo, mahni insengso chunga khaw enkawl bik tur an thlang hi an entawntlak a, an thiamna hmanga an zir chhuahte hi he khaw tan hian a ṭangkai zui ngei ang.