Damlo inenkawlna senso

Mizoram sorkar chuan a hnuaia thawkte damloha inenkawlna senso a pek tur Rs. 5,07,18,383 chu Mizoram chhung leh pawn damdawi in hrang hrangah a ba mek a; hengte hi Mizoam sorkar department 44-te'n sorkar hnathawk medical reimbursement pek tur an bat zat belhkhawm a ni.

Sorkar-in heti zat damdawi in hrang hranga leiba a nei hian kan sum enkawl dan fel lo chiang takin a pholang a, pawisa tam tham tak chinfel loha awm hian inthlahdahna a lantir bakah sorkar department-te inkaihhruai dan fel lo leh sum enkawl dan fuh lo a tilang chiang hle. Sorkar hian sum a nei emaw nei lo emaw, leiba tam tham chinfel loha dah hi chu sum neih loh lam aiin inthlahdahna lam hawi a kawk zawk mah awm e.

Hei aia ngaimawhawm chu sorkar hnathawk medical reimbursement kalphung hi a ni a, hei hi Mizoram sorkar lu tihaitu chu a ni. Tun dinhmunah hi chuan Mizorama damlo tam zawk hian sorkar aṭangin MR an bill emaw tih mai tur a ni a, a bill thei chinte ziakin lang vek mah se sorkar hnathawkte chhung hla deuh thlenga MR bill dan phuahchawp a awm
ṭhin a, a buaithlak hle a ni.

MR bill thei leh thei lo piah lamah thil kal fuh lo lian tak a la awm a, chu chu damlo-te phai lama kal tura kan intirh dan leh kan damdawi in pante hi a ni. Kan natna leh a kaihhnawih thilah mimal pawisaa inenkawl tur ni ta ila treatment kan lak dan leh sorkarin a rulh leh tur a ni tih hriaa treatment kan lak dan a inang lo a, a enkawltu lamin a sum ren lo thei ang berin an lo buaipui bawk a, Mizoram sorkar pawisa hian khawi phai damdawi in emaw hi kan vulh lian mai mai a ni thei em?

MR bill thei chin hi fir zawka kalpui tawh a ṭhat a rinawm a, MR bill theih chinte pawh chiang zawka ziah a ṭha ang a, damdawi in pan tur thlan dan pawh enfel ngam a ṭha tel awm e. Tun ang zela kan kal chuan damlo inenkawlna sensoah sorkar sum tam tak a kal ral a, chumi phenah chuan thil kalphung fuh zan lo a inphum niin a rinhlelhawm bawk si a, sorkar hian huaisen takin medical reimbursement kalphung hi chingfel rawh se.