Hri leng laka inven

Health department chuan Zika virus chungchangah thuchhuah a siam a; tun dinhmunah Zika virus hian India ram a la thlen loh avangin Mizoram mipuite tan lungkham vak a ṭul rih loah an ngai a, "A ṭul anga hma la tur erawh chuan department kan inkau reng a ni," an ti.

Natna hri leng hi a thlen chin tur a sawi theih loh a, hei vang hian insawi ṭhaih ang hrima a hlauhawm thu sawi chiam hi a ṭha lo a, chutih rual chiah chuan a hlauhawm theih dan inzirtir tel erawh thil ṭul tak a ni. India ramah Zika virus hi hmuh a la ni lo a, hei vang hian Mizoram aṭanga tuna lo inhmakhua vak chu a harsa mai thei a; nimahsela ngaihthah chi erawh a ni hauh lo ang.

Vawi leh khata mihring tam tak suat thei leh mipui nawlpui tana harsatna thlen thei natna hri a len reng reng hian media hian tih tur pawimawh tak a nei a, chu chu mipuite zirtir a ni. Media hmanga mipui zirtir dawn hian ngaihtuah chian hmasak erawh a ṭul hle a, a hlauhawmna sawi uar lutuk a awm thei a, a hlauhawmna sawi chhuah loh palh pawh a awm thei bawk - heng thil pahnihte hre chung hian media hmanga natna inkaichhawn theih chi inzirtir hi a pawimawh takzet a ni.

Mizoram sorkarin Zika virus chungchanga thu-chhuah a siam hi a lawmawm hle a, a tih tur dik tak a ti a ni. Tunlai khawvelah chuan ram hla ber pawh kan inbe pawpin chanchin kan inhre tawn thei vek a, hei vang hian mi ramin an manganpui hri leng mek lo ngawihsan reng ringawt hi a fel lo. Eng thil pawh lo thleng se kan theih ang tawka lo hmachhawn ve tura inrin hi thil pawimawh a ni a, sorkar hian thuchhuah siam hi duhtawk mai loin a theihna zawnah lo inralring se, tihdam aiin inven a
ṭha a ni tih lantirna hun remchang tak a ni e.